برياني تونه من مطبخ نهّووود .

اليووووم براويكم طريقتي في طبخ برياني التونه … طبعا ً كلكم تعرفون التونه … أنا أعتبره المنقذ يوم ما أكون حاطه في بالي أسوي شي معين أو ما يكون عندي وقت إني أطبخ دياي أو لحم أو سمج ..
المهم … ما بتفلسف زياااده …

حبوبات الرجاء عدم الرد على الموضوع لين ما اخلص منه عشان يكون متسلسل وواضح في الشرح … خخخخخ … مصدقه عمرها …

أول شي بحط لكم صورة مطبخي … عشان تعيشون الدور وياي …

والحين نبدأ في الطبخه ..

المقادير …

بصلة متوسطه مقطعه
ثوم مقطع
فلفل أخضر حار مقطع
طماطم مقطعه
كاسين رز تيلدا
قوطيين تونه (علبتين)

* بهارات مطحونه ( مكعب ماجي – ملح حسب الرغبة – ملعقة أكل بزار – ملعقة أكل كركم – ملعقة أكل فلفل أحمر بارد مطحون "بابريكا" – ملعقة ليمون يابس مطحون )

*بهارات غير مطحونه ( 4 حبات هيل – عود قرفه – ورقتين غار )

أول شي نحط زيت في الجدر ونحط عليه البصل ونخليه لين ما يستوي لونه ذهبي .. بعدين نضيف عليه الثوم والفلفل الأخضر الحار .. نخلطهم مع بعض لين ما تشوفين لون الثوم بدا يتغير والفلفل طلعت ريحته …

نضيف الطماط على البصل والثوم والفلفل …

نحط البهارات المطحونه ( مكعب ماجي – ملح حسب الرغبة – ملعقة أكل بزار – ملعقة أكل كركم – ملعقة أكل فلفل أحمر بارد مطحون "بابريكا" – ملعقة ليمون يابس مطحون )

نضيف البهارات الغير مطحونه ( 4 حبات هيل – عود قرفه – ورقتين غار )ونخلط المقادير كلها ويا بعض …

نغطي الجدر تقريبا خمس دقايق ونخف ع النار عشان الطماط يذبل والبهارات تعطي نكهتها …

بعد الخمس دقايق بيكون شكل الخلطه جذي …

الحين نضيف التونه على المقادير …

نخلط التونه ويا المقادير ونغطي الجدر ونخليه عشر دقايق ..
بعد العشر دقايق خلصنا من الخلطه …

طبعاً بعد ما تغسلين العيش وتنقعينه في الماي الفاتر مدة نص ساعه .. تشخلينه (تصفينه من الماي ) … تغلين ماي في الجدر تحطين العيش عليه وتخلينه يغلي لين ما تشوفين الرز ارتفع في الماي المغلي وحباته استوت …

نشخل العيش ( نصفي الرز) …

بعدين نحط شوية زيت في الجدر ونحط عليه نص كمية العيش …

نحط عليه خلطة التونه … مثل ما هو مبين في الصوره …

وهني بعد ما غطينا العيش بخلطة التونه …

الحين نحط الباقي من العيش على الخلطه ونغطيها كلها …

نخف على النار ونشوف الساعه … ونخلي العيش يتسكر مدة نص ساعه …

بعد نص ساعه … بتكون أكلتنا جاهزه للتقديم …

وهذا شكل طبق التقديم … وبالعاااااااااااااااافيه عليكم …. لا تنسون دعواتكم حق ولدي …