اخويه تزوج للمره الثانيه ابا شوركن !!

شحالكن يميع اتمنى ان الكل بصحه وسعاده

بدخل بالموضوع

من اسبوع جيه ياني ريلي وقالي انه شاف اخويه صوب مزرعته ووياه وحده بالسياره انا انصدمت قلت له اكيد حرمته عيل منوه قالي لا حرمته اعرف شقايل تظهر بنقاب وجيه بس اللي وياه حاطه بس شيله وهب متغشيه قال اتوقع انه معرس قلت له مب معقوووول اخويه يعرس على حرمته مستحييل جان يقولي عادي مب غريبه انه يعرس عليها اصلا اهما من زمان مب متفاهمين ويا بعض بس مستمرين عسب عيالهم وجيه

عاد الصراحه انا تميت منصدمه ولا هنا لي رقاد ثاني يوم سرت بيت اخويه ويلست ويا حرمته نسولف جان اقولها ما سرتوا المزرعه قالت اي وحده قلت لها اللي صوب عيمان قالت لا ما سرنا الصغاريه عليهم اختبارات وجيه بس اظني بنسير بالاجازه ,عاد انا تأكدت انه في وحده فعلا المهم ما رمت اخبرها شي وغيرت السالفه

يوم رديت البيت تم قلبي ياكلني لان حرام اسكت المهم اتصلت على اخويه مع ان ريلي قال لا تخبرينه وخلج بعيده بس انا ما رمت الصراحه لان حرمة اخويه بنت عمي بنفس الوقت واحبها وبغيت اعرف شو مستوي المهم رد علي اخويه وقلت له اباك بموضوع ضروري قالي شو السالفه حد مستوي له شي قلت له لا بس اباك بموضوع قالي خلاص انا عندي ميلس بس اخلص بمر عليج ,وفعلا ياني البيت ويلست وياه جان افتح الموضوع قلت له ان وحده من ربيعاتي شافته ويا وحده بسيارته وتحسبت اني انا ويوم اتصلت قلت لها اني مب انا واني بالبيت لاني الصراحه ما بغيت اقوله ان ريلي اللي خبرني وتستوي بينهم مشكله وجيه الله يسامحني جذبت بس لغرض شريف المهم قالي متى وبدا يحاول يبرر قلت له شوف انا ما بخبر حد بس قولي شو السالفه وياريت ما قلت له

قالي شوفي انا الصراحه بدوامه وزين يوم انه الموضوع عرف فيه احد لاني تعبت منه قلت له شو عندك
قالي الصراحه انا عرست واللي شافتها ربيعتج ويايه هاي حرمتي ………… تزوجتها من سنتين الحينه ما اقولكم شو استوى بي حسيت الارض تلف فيني والله كانه ريلي اللي معرس علي مب اخويه والله

المهم قالي انه مب عارف شو يسوي بوضعه لانه يحب هالبنت ولا بقادر يفارقها وثاني شي ما يبا يهدم بيته لانه وايد يحب عياله ولا يروم يفارقهم ولا يخرب حياته وقال انه يحترم زوجته اللي هي بنت عمي لانها انسانه دينه وتخاف ربها ومربيه عياله احسن تربيه ويقولي انه متأكد مليون بالميه انه اذا خبرها بالسالفه راح تطلب الطلاق وتسير بيت اهلها وهالشي هو ما يباه ابدا يستوي

وقالي بنفس الوقت انا محتار وتعبان وايد ومب عارف شو اسوي ويا البنت اللي اخذتها لان من عايله وايد محترمه …… و انه يحبها وايد وهي بعد تحبه وايد ولا بقادرين يفارقون بعض ويقول انه يحس انه ظالمنها لانه حارمنها من العيال لانهم مب موثقين عقد زواجهم بالمحكمه لانه خايف على مركزه وصورته جدام الناس واكثر شي لان نحن من عايله وايد معروفه فخايف الناس تتكلم عنه وعن زواجه ويوصل الجلام لحرمته الاوليه وينخرب بيته وهو ما يبا هالشي يستوي

المهم انا حسيت انه وايد تعبان من هالشي ويفكر فيه كل يوم وانا اعرف اخويه انسان دين ويخاف ربه وهو اصلا قالي انه ما يبا يسوي شي بالحرام وعسب جيه عرس عالبنيه وسوا عقد وياب اصحابه شهود ومأذون بس باقي له توثيق العقد لكن خايف من الفضيحه

انا الصراحه مب عارفه شو اسوي لانه طلب مني اشوف حرمته الثانيه وايلس وياها لانه دايم تقوله خاطري اعرف حد من اهلك واحس انه حياتي طبيعيه شرا الناس بس انا مب قادره لاني احس اني راح اخون بنت عمي واعرف اني لو فكرت اخبرها راح تستوي مصيبه واذا ما خبرتها راح اتم الحرمه الثانيه مظلومه بعد والله تمنيت اني ما عرفت السالفه وكل يوم الوم ريلي ليش خبرني اصلا وهو يلومني ليش انا اتصلت على اخويه وخبرته

اعرف اني طولت عليكم السموحه بس والله محتاره وايد ولا بعارفه شو اسوي فدخيلكن ابا شوركن بالموضوع