السلام عليكم…
مشكلتي احس اني تعبت من كثر المشاكل واحس اني ماقدرت افهم ريلي…
صار لي متزوجه 3 شهور ومن اول شهر وانا وريلي في مشاكل واروح بيت اهلي وبعدين يردني …
وفي مرة من المرات يوم ردني من بيت اهلي قال لي انا ماكنت ابا اردج اليوم بس امي جبرتني اردج…
مشكلت ريلي انه وايد عصبي ويرمي علي كلام يجرحني ويتشرط وااااايد و أي حد من ربعه بيقوله نصيحه بيطبقها علي حتى لو كانت غلط… ومايحب يعترف انه غلطان…
اللي قاهرني ان الكل يعرف ان ريلي ملتزم ومتدين والحمدالله بس المشكله يابنات اني اشوف بنات عنده ويطرش لهن مسجات ويوم ناقشته قال ان هالبنات سكرتيرات فالدوام وطوفتها وسكت وانا اتأسفت له..
بس اللي خلاني انفجر انه يباني قبل لا ادخل عليه الغرفه ادق الباب ويعصب اذا مادقيت ويوم انفجرت قلت له انا مب مجبورة ادق علي الباب قال لي انقلعي عن ويهي… ويوم رمسني اونه بيراضيني قال انتي الغلطانه والمفروض تتأسفين ويوم قلت له انا ماغلطت قال روحي بيت اهلج..
يوم حد يسأله انت اتحب زوجتك يقعد يحلف انه يموت فيني بس ارجوووووكن ساعدوني ماقدرت افهم حياتي مع هالشخص 
الله يهديكم
الله يهديه ريلج
ادعيله بالهدايه توكم ف اول المشوار
شوفي انتي شو المناسب تعرفي ع شخصيته اكثر بتعرفين شقايل تتعاملين وياه
الله يسخره لج
الغاليه اصبري بس لا تخلينه على كيفه يتصرف وحطي لكل شي شروطه
المشكله انه مايعطيني فرصه ومسوي فيها سي سيد مع اني حبيته وسويت اللي في خاطرة وغيرت حياتي وتنازلت عن السواقه والشغل واني اكمل دراستي واشياء وايد بس احس مب امبين في عينه …. شسوي ؟؟ 
يمكن عشان توكم ف بداية الزواج ولازم تستوي مشــــــاكل لين تتفاهمون وتعرفون بعض اكثر …
ان شاء الله بتتعــــودين عليه ,, بس اصبري عليه شوي ..
الله يسخر لج ريلج …
الله يعينج حبوبه.. كنت ناوية اطلع من المنتدى بس لما شفت مشاركتج رجعت .. الله يهدي ريلج ويبعد عنه بنات الحرام ويجمع بينكم بالخير ..