مشكلتي عدم الاستقرار

ما اعرف اكتب باختصار بس بحاول.. فالبدايه انا متزوجه من 4 سنين و عندي ولد و حاليا حامل تزوجت عن حب بعد رفض اهلي و اصرار مني و مشاكل كبيره فالنهايه تزوجت و حياتي حلوه الحمدلله زوجي انسان رائع خلوق طيب محترم لكن .. امكانيته ضعيفه اي وضعه المادي صعب شوي طبعا هذا الشي انا كنت اعرفه قبل الزواج و رضيت فيه لكن بعد الزواج في امور تتغير المشكله الثانيه و الاكبر هم اهل زوجي.. ناس ما يتعاشرون ما ابالغ لو قلت وحوش والله ما عندي وصف اوصفهم و لو بتكلم عنهم يبالي كتاب طبعا هذا الشي الي ماكنت اعرفه قبل الزواج و انصدمت صدمه كبيره لاني ما كنت اتخيل ان في ناس فالدنيا بها الشر صدقوني ما ابالغ و المصيبه اني عايشه وياهم فالبيت لان ريلي طبعا مايقدر يأمن لي مسكن مثل ما قلت لكم بسبب ظروفه و هذا الشي انا كنت راظيه فيه كنت راظيه اني اسكن وياهم مع ان اهلي كانوا رافظين بس فالنهايه رظوا لانها رغبتي بس قالوا لي بالحرف الواحد نحن مالنا علاقه باي شي يستوي بعد العرس هذا اختيارج و هذا قرارج و انتي تتحملينه.. و رظيت و سكنت معاهم ما كملت شهرين الا و بدت المشاكل وما قمنا نكلمهم و لايكلمونا حبيت اذكر نقطه اهل ريلي هم (مرت ابوه و عيالها) ريلي ماعنده لا ابو ولا ام عشان جي الكره و الحقد طبعا لما صارت المشاكل و انقطعت علاقتنا فيهم مجبورين انتم فالبيت بس ما ناكل و لا نشرب فالبيت و مانستخدم اي شي فالبيت هذا شي طبيعي لان كل الي فالبيت محاربينا شو نسوي كل يوم يا ناكل فالمطاعم او اسير بيت اهلي نحن انغسل ثيابنا و انظف الحجره و كل شي ما عندنا خدامه و طبعا ممنوع خدامة البيت اتسوي لنا اي شي لانها خدامتهم غير هذا لما اكون في بيت اهل ريلي اتم يالسه فالحجره ما اقدر طبعا اطلع لاني ما اكلمهم و لا يكلموني فاتخيلوا حياتي في غرفه وحده واذا ريلي طلع عنده شغله يا اتم يالسه بروحي فالغرفه او اسير عند اهلي والله احس البيت هذا مثل سجن. مشيت الموضوع سنه لين حملت و تعبت فالحمل وايد طبعا كنت معظم فترة الحمل في بيت اهلي و عقب ما ربيت تميت 6 شهور لين يبت لي خدامه .. شليت الخدامه و رديت عند ريلي طفشوا لي الخدامه و يبت الثانيه و الثالثه و نفس الشي كل وحده اتم شهر و لا شهرين و اتقول مابا اشتغل تميت اكثر من سنه سايره راده على مكاتب الخدم و لا استقريت على خدامه و طبعا طول الفتره هاي انا اتم اسبوع عند اهلي و ابات ليله و لا ليلتين عند ريلي و الحين ولدي عمره سنتين واذا سرنا يوم و لايومين عند ريلي ولدي يتم يصيح طول الوقت لانه يمل من يلست الحجره يبا يطلع يتحرك ماعدنا غير الحجره اظطر اني ارد عند اهلي عالاقل يطلع يلعب يشوف حد ما اقدر احبس الياهل فالحجره و لا مرات انتم عند اهلي و الفليل انرد نرقد هناك و الظهر انرد مره ثانيه عند اهلي لين حملت مره ثانيه و تميت فترة الوحام عند امي..و من شهر وصلت الخدامه الرابعه الحين قلت ما بوديها هناك لان الخدم الي هناك بيطفشونها مره ثانيه و ما اقدر اخليها في بيت اهلي عالطول لاني الحين محتايه الخدامه اكثر اقترحت على ريلي انييب الخدامه بس انخليها في غرفه بروحها مش مع باقي الخدم عشان ما تصير مشاكل و اتكون منعزله عنهم و ما يطفشونها .. طبعا ريلي ما يكلم اهل البيت عشان يقولهم انه بياخذ غرفه من غرف البيت حق الخدامه للعلم في اكثر من غرفه محد يستخدمها فالبيت ونحن يالسين في غرفه وحده و حتى مب قادرين انييب الخدامه و كل ما افتح وياه الموضوع يقولي اصبري مع اني مخبرتنه عن الموضوع من شهور و لي الحين ما سوا شي.. الحين مشكلتي اني مب مستقره ابدا مب حاسه اني معرسه طول الوقت عند اهلي تعبانه نفسيا وايد علاقتي بريلي اتاثرت وايد طبعا بسبب البعد و احسه هو اتعود على هالشي بس انا مب مرتاحه ابدا دايما الناس تسال انتي ساكنه عند امج انتي ليش دوم في بيت امج ومن هالكلام ما اعرف لين متى بتم جي بنات بليز ابا حل لمشكلتي مب عارفه شو اسوي فكرت اني اطلع اسكن في شقه طبعا صعبه على ريلي انه يدفع الايجار بس انا خلاص مليت و تعبت من هالعيشه حتى اهلي مب عايبنهم الوضع بس ساكتين عشان ما ازعل بس دايما اسمع نغزات و اضايج و اسكت انا قررت اني اطلب شقه على الاقل بعيش مثل الناس مستقره ويا ريلي ماعندي غير هالحل بس انا متاكده ان ريلي بيرفض هالشي و بيقول ما اقدر!! بس في حال اذا رفض ألجأ للمحاكم و لا شو رايكم لان اهلي ما بيدخلون و ريلي ما بينفذ لي الي اباه لاني طلبت منه ابسط من هالشي و ما سواه بس الي يقوله اصبري و اصبري انزين لين متى للصبر حدود ارجوكم ساعدوني انا وايد مضايجه

انتي معوده الياهل يلعب ويركض وما يتم محبوس

انا بنتي لين 3 سنوات كانت محبوسه فالمنز تخيلي ؟ اكلها وشربها ونومها فالمنز ونتم تطالع تلفزيون .. وحتى انا كنت محبوسه طول الوقت فالحجره والنفسيه زفت بس كنت ابا ريلي الصراحه اهم شي هو وياي

انتي حبيتيه وتخلينه لفتره طويله وتيلسين بيت اهلج ؟؟؟؟؟؟؟؟؟؟؟

واكيد البعد مأثر ع ريلج وتعود ع هالعيشه .. وريلج وحليله ظروفه ما تساعد واكيد حالته النفسيه صعبه (( حرمه ابوه وعياله وفوق هذا ظرفه المادي ما يساعد وفوق هذا حرمته محد ولا ولده لا ام ولا ابو ))

اللي اشوفه ريلج وحليله مب مستقر ما عنده حد

تبين نصيحتي سيري عند ريلج ويوم هو يطلع مكان سيري بيت اهلج وعقب يوم يخلص اشغاله ياخذج وياه بيتكم ( اللي هي الحجره ) والولد شوي شوي بيتعود ع الحجره .. وانتي الحمل مأثر فيج وايد اصبري بتحصلين الفرج ان شاء الله ..

وشوي شوي ع الريال اللي ما عنده حد غيرج انتي وولده