مستشفى النور اليديد تعالو بخبركم عنه

باذن الله انا ناويه اربي في النور اليديد .. و اليوم كان عندي موعد و طلبت منهم يراووني قسم النساء و الولاده .. طبعا المستشفى شرح لانه يديد و مافيه زحمه .. و موظفين الاستقبال كانو وايد متعاونين و طرشوا ويانا واحد .. كان القسم في الطابق الثالث .. المكان مب وايد واسع ، استقبلونا النيرسات و يت رئيسة القسم و سوتلنا الجوله .. بصراحه انا لاعت جبدي من لون الارضيه .. لونها برتقالي غامج -اع ما ادري منو مسولهم الديكور- مع ان الالوان في عيادة النساء حلوه .. و شفنا الغرف .. القسم كان وااااااااااااااايد هادي حتى شكيت ان ما في حد عندهم بس هم قالوا ان فيه كمن وحده .. فتحولنا غرفه خاليه كان لونها اورنج -ان شاء الله في الوان ثانيه- .. اول مره اشوف غرفه وحده والده بها اللون .. الغرفه وايد صغيره بس لا بأس بها .. و طلبنا نشوف غرف الفي اي بي .. قالت بعدهم محد استخدمهم ، لان ما خلصوا ترتيبهن .. و المفارش مالت الشباري ماو وصلت .. المهم غرف الفي اي بي واااااااااايد صغيره اصغر من الغرفه العاديه بس تي معاها طبعا غرفه ثانيه .. و لون الاثاث فيها حلو -عنابي-
غرفة العمليات القيصيريه بعدها مب شغاله .. و شفنا الحضانه كانت خاليه .. بس فتحت مكان سبوح البيبيات و حصلنا بيبي عنوني يعابلونه -و هنيه اتأكدت ان في حد في القسم لاني بديت اشك من كثر ما المكان هادي-
في قسم للعنايه بالبيبيات القصر بس اظني بعده مب شغال .. و طلينا على غرف الولاده ، اعتقد في اربع غرف ولاده .. الغرفه الي راوونا اياها شرحه و ارتحتلها ما ادري ليش
و عادي يلست مسؤولة القسم -وحده بريطانيه- تسولف ويانا .. و قالت ان سياستهم يخلون البيبي عند امه و ما ياخذونه الا عشان السبوح او يرضعونه اونه عشان تزيد الرابطه بين الام و الطفل .. جان اسألها في مستشارة رضاعه و قالت في مستشار رضاعه ريال .. بصراحه انصعقت .. عنبو جيه وين هم
و قالت على شهر 12 بيكون القسم شغال بشكل كامل
بصراحه ما ادري انا وحده وايد اتأثر بالشكل و الديكور و ما عيبني شكل المكان وايد بس مع ذلك بتوكل على الله و اذا الله رادلي بربي عندهم خصوصا ان المكان بعيد عن الزحمه و قريب من البيت
اتعالج عند الدكتوره ماجده .. بس في وحده ثانيه اسمها فوزيه و دكتور ريال اسمه مروان
و ان شاء الله تكونون استفدتو من التقرير

من زمان اتريا حد يخبرنا عن النور اليديد..

بس ياليت لو صورتي وحطيتيلنا كم صورة عشان نشوف..