لكل وحده مالجه او مقبله على الملجة .

كوني قد ما تقدرين انسانه مطيعه هاديه مبتسمه .. تراه هالريال الي ملج عليج اول مرة يشوفج ويتعامل معاج .. لا تعطين انطباع سيئ ابد ..

لا تعاندين ولا تفرضين رايج في تجهيزات العرس .. صح كل وحدة منا تبا عرسها من ليالي الف ليله وليله .. لكن تأكدي من شي ..

لو العرس كان مب ذاك المستوى الي يرضيج .. تراه في ويهه هو … يعني محد بيعيب عليج انتي وهلج .. فلا تعاندين..

شاركي بس في الراي .. لو هو شاورج في شي قولي رايج وشورج وتأكدي لو الريال عنده استطاعه ما بيقصر بالعكس بيلبيه لج ..

اهم شي البساطه في الطلب والرقه.. والقنـــاعــة ..

طيعيه في اي شي .. وهالنقطه وايد مهمه تدرون ليش ؟؟ لأنه الوحدة اول ما تملج تستغرب بعض الاوامر والطلبات من الزوج .. لأنه مب متعوده حد يتأمر عليها غير ابوها فما تتقبل الموضوع في البدايه ..

بس انا اقولج .. مهما تضايجتي ايام الملجه .. ترا اول يوم تدخلين فيه بيته.. بتلقين نفسج اتطيعينه وتسوين الي يباه .. فليش اتطولين السالفة وتعاندين ايام الملجه؟؟

لا تقارنين ريلج بحد ابد مهما يكون … سواء كان ابوج ..اخوج .. ريل اختج .. اخوه اي من يكون .. وهالنقطه مرتبطه باللي قبلها ..

يعني لو ريلج طلب انج تسوين شي ابوج ما يفرضه عليج .. لا تقولين والله ابوي اللي هو ابوي ما قالي جي سوي .. الحين تباني انته اسويه ؟؟

هالكلمه تقهر الريااااال بشكل .. وتحسسه بالنقص .. وبيقولج انا والله مب ابوج .. انا ريلج .. فاقتنعي بالهشي .. مب كل شي يحبه ابوج او ما يحبه بيكون ريلج نفسه ..

وتذكري السبب ..(انتي من بيئه وهو من بيئه ثانيه) حتى لو انتوا من نفس العائلة .. كل بيت له طقوس خاصه فيه

مب عيب انج تحسسينه بالشوق والحب .. شي بنات يتثاقلون شهور .. اوكي فهمنا اول شهر .. بس الريال ما يفهمها ثقل منج .. يفهم انج مغصوبه عليه او متضايجه منه ..

ونفس الشي لو طلب انج تتقربين منه او يمسك ايدج او حتى يعطيج قبله عالطاير مب عيب تراه ريلج جدام رب العالمين والناس .. صح انه في رياييل يتمادون وفي هالحاله يختلف الوضع لأنه حلاة الشي في وقته عيل شو خيلنا للعرس ؟؟

بس لا تمنعينه من الشي البسيط .. حلو المستحى .. بس بعد يستوي ماصخ لو زاد عن حده .. واللا الريال ليش يبغي يملج قبل العرس بفتره ؟؟

والكلمه الطيبه تهد جبال .. فلا تبخلين عليه فيها ..

وحطوا رياييلكم في عيونكم