السلام عليكم ورحمة الله وبركاته
خواتي الحبيبات الحمد لله انا ربيت في 26/3 و
وحبيت اقولكم قصة ولادتي وكيف تغيرت الامور في اللحظة الاخـــــــــــــــــــــيرة .
يا طويلات العمر انا اراجع الكرنيش ويوم 21 /3 كان عندي موعد وقالتلي الدكتورة بما ان عندج سكري فلازم نولدج في موعدج وموعد ولادتي كا تاريخ 25/3 ويصادف يوم جمعه طلبت منها ان تاجل لين يوم الاحد عسب اقضي ويا عيالي الويك اند فوافقت وعطتني موعد يوم 27/3 عسب ايي يسوولي طلق صناعي( تحاميل) المهم خبرت امي وام ريلي قالولي ماتسيرين طنشي انتو تعرفون كلام الكبار المهم يوم الجمعه اشارت علي ام ريلي اشرب زيت خروع مثل بجري اعتطني زيت خروع وربيت من دون مشاكل والحمدلله لكن مثل مايقولون موب كل مرة تسلم الجرة 
شربت الزيت وسرت امشي ع الكرنيش انا وريلي ساعة او اكثر وفي الصبح ياني ويع بسيط والله يكرمكم اسهال فظيع مانه الكمية ماكانت وايدة 15 ملي اما في حملي الاول شربت فنجان مال القهوة متروس المهم يوم حسيت بالاوجاع قلت الحمدلله خلاص باربي من دون طلق صناعي واستانست وايد تميت لين الساعة وحدة الويع خفيف ومايزداد مثل ما هو المهم 1:30 بالضبط نزلت موية الراس ولونه اخضر جنه مخلوط بالحنة هني خفت اول مره ينزل ماي الراس في البيت ولا لونه موب طبيعي سرت المستشفة ع طول خبرتهم ودخلوني عنبر الولادة يةم ريلي سالهم ليش الموية لونها جذي قالت نعتقد ان في شيء ازعج البيبي فسوا براز داخل الرحم وهذا الشيء موب زين وخبرتها اني شاربة زيت الخروع قالت ماله دخل.
المهم شيكت وقالت 2 سم مفتوح وركبتلي جهاز التخطيط وطمنتنا ان كل شيء اوكي والامور طيبة تميت لين الساعة 4:30 على هالحال يتني الدكتورة قالت راح نعطيج طلق عن طريق الوريد قلت لها اوكي وتمت تشيك قالت الراس موب في السنتر اقلبي يمين يسار حتى يستوي الراس في السنتر ونقدر نعطيج الابرة وتميت اتقلب اخرا قالت خلاص الراس نزل في السنتر بس قالت راح اسوي الترسوند عسب نتاكد وفجئة اختفى نبض الجنين وهنا بدات المعاناتي يلست تصرخ ولمت كل الي في المستشفى لانها شغلت جهاز الطواري المهم دخلو واير داخل ولقو نبظ عنطريق راس البيبي بس خفيف ويوم ييني طلق خفيف ينزل اكثر نبظ البيبي مرات يختفي فقالت الدكتورة حق ريلي لازم عملية وباسرع وقت لان في شيء خانق البيبي قالت تخيلو بهالطلق البسيط يقتفي النبظ في حال اعطيناها طلق شو راح يستوي في البيبي؟ قالت اظني الحبل السري خانق البيبي فيوم يي الطلق يخنقة اكثر. ع فكرة في موعدي الاخير سوتلي الترسوند وكل شيء اوكي يعني معقول ما شافت ان الحبل ملفوف؟
ماعلينا اتخيلو يا خواتي يعني قبل عشر دقائق كل شيء كان طبيعي وكنا نسولف ويا الممرضة وفجئة يقولون في مشكلة!! المهم دخلوني غرفة العمليات على الساعة 6 بالظبط وربيت 6:30
اسال الله ان يسهل على كل انثى حامل على هالارض ويقومكن بالسلامة وتشوفون نونوهاتكن بكامل الصحة والعافية.
وان شاء الله يجمعنا بكم في الفردوس الاعلى
تقبلو مني اجمل التحيات
حمدلله ع السلامتج وسلامت نونو
يتربى بعزكم ان شاء الله
بس ما خبرتينا شو يبتي
الحمد لله على السلامة
ويتربى بعزكم
الحمدلله ع سلامه مهم صحت وصحه البيبي
الحمدلله على سلامتج والله خوفتيني الحمدلله
والله يخليه لكم ان شاء الله
الحمدلله ع سلامتكم
بس فعلا ما يبين ان الحبل السري ملتف ع رقبة الياهل في السونار
كذا وحدة من الاهل نفس الحالة ما بين الا حزة الولادة
الحمدلله ع كل حااااااااااااااال وربي ينبته نبات حسن ويجعله قرة عين لكم