فضفضه

انا عمري 24 .. ومن 5 سنوات فيني سكر تايب 1 يعني سكر اطفال

قبل لا امرض يمكن عشرين واحد متقدملي وكنت ارفض بحجة الدراسه .. من دخلت المرحلة الإعدادية وانا ما ايلس شهرين الا وواحد متقدملي .. وانا ايلس اطلع هذا جي ماباه هذا مادري بلاه ماباه .. ومن داخلي انا اصلا ارفض عسب اكمل دراسة واشتغل

انا انسانه جي , ااااااخر همومي العرس! كل همي اكون انسانه ناجحه دارسه بشهاده بدرجات عاليه بوظيفه راقيه براتب وااايد اوك ,, ف حياتي كلها ما افكر بشي ثاني الا اني اتميز وكل ما اسوي شي لو شو ما كان سخيف لااااازم اتفوق فيه

والحمدلله بالرغم من اني مرضت عقب امتحانات الثانوية العامه وتنومت في المستشفى اكتشفت ان فيني السكر! بالرغم من صغر سني ووحده طول هالفتره ما تسمع شي الا يحليلها الله يعينها بعدها صغيره كيف بتسوي كيف مادري شو والخ من الكلام الا انني كنت اسير الكليه ودرست وطوفت الفاونديشن والجي بي اي كله قريب ال 4 وفي مواد اييب فيها 4
وعقب سنتين ف الكليه سويت اضراب ف البيت عسب اخذ الليسن والحمدلله خذته ف شهر .. وبعدين امي الله يطول بعمرها خذتلي سياره يديده من الوكاله وكنت اسير وارد الكليه بروحي بالسياره.
والحين انا متخرجه بشهادة البكالوريوس وحاليا موظفه. وأفكر اكمل ماجستير.

ونسيت اخبركم, كل شغل البيت علي انا, حتى لو امي ما تقولي اسوي شي بس انا اسير وياها. شغل البيت ما اقصد به طباخ وتنظيف وغسيل, لا اقصد الاشغال الخارجيه اغلبها انا اسويها بحكم اني اكبر وحده
الحين لما حد ايي يخطبني يقولون ما شاء الله البنت حلوه وغيره من هالكلام لكن من يعرفون ان فيني السكر يوصلني الرفض من الام! انزين ليش انا فيني سكر اطفاااال لا اني بعادي ريلي ولا بينتقل للاطفال فليش الامهات مكبرين الموضوع

انا محافظه على جسمي محافظه على صحتي والحمدلله اللي يشوفني ما يقول ان هاي وحده فيها السكر, لدرجة اني لما خبرت حد ف الدوام انصدم! قال مووول ما يبين عليج. يعني انا حياتي عاديه واتعب واشتغل يمكن اكثر عن اي وحده ثانيه ما فيها ولا مرض. انا انسانه اعتمد على نفسي ما احب اقول شي حق حد واذا حطيت شي ف بالي يعني اسويه اسويه لو ان شاء الله يبقالي نص صبع صاحي

اللي يقهر كلام الناس تحبطني ساعات يعني شو حليلها هاي ! مب محتاجه شفقة حد انا. شو الشي اللي ناقص ف حياتي عسب اي حد ايي يقول هي عسب السكر ما قدرت؟ كل شي فيني بيرفكت ما شاء الله حتى تعرفون عن فحص الدم اللي كل 3 شهور لازم مريض السكر يسويه نتيجتي طلعت بييييرفكت. حتى الدكتور يقولي انتي متاكده فيج السكر!

اعترف اني لما اشوف بعض من ربيعاتي عرسن استانس لهن وافكر متى بيي دوري لكن اقوي نفسي اول اشغل نفسي بشي ثاني, اقنع نفسي ان شي بنات من اهلنا مب متزوجات وهن اكبر عني فانا بعدني ليش استعيل

المشاركة الأصلية كتبت بواسطة bintal3ood

اختي الغاليه امتياز الله ويوفقج ان شاء الله وبييج نصيبج قريب باذن الله
خلج قريبه من رب العالمين واستغفري وباذن الله قريب نشوفج عروس
بنت خالي كان عمرها 25 سوت رجيم حاد لدرجه صار فيها السكر تستخدم الابر نفس الشي
كل حد يتقدملها يعرف ان فيها سكر يهون صبرت لين جاها واحد وقال راضي فيج وهذا مرض من
رب العالمين ولا اعتراض فيه وتزوجت وعمرها 27 وشالنها شل ويحبها وامه ماشاء الله عليها ماتقصر
وشافيتنها مثل بنتها وعندها الحين بنت وولد والحمدلله عايشيين بسعاده

فلا تفكرين وايد واحمدي الله على مانتي فيه

سبحان الله .. نصيب .. الله يديم المحبه امبينهم

المشاركة الأصلية كتبت بواسطة DK1

فديتج الله يشفيج اول شي. ثاني شي اختي يعني مافي داعي الناس كلها تعرف فيج هالمرض المفروض الانسان القوي ابدن ما يبين للناس انه فيه شي ودااام انتي ما ترضين حد يقولج حليلج خلاص لاتقولين حق زملائج ف الدوااام هم ما بينفعوج بمرضج بالعكس كل ما شافوج قالو وحليلها ما تستاااهل. وبعدين فديتج العرس بتعرسين ان شا الله. اساسا المفروض ما تقولين حق العرب اللي يخطبوونج فيج سكر. ويمكن اصلن مافيج سكرر يمكن انتي سويتي فحص الدايابيتز وقت انتتي ماكله شي وثبتوه انج مريضه بالسكر. الله يشفيج

ترا المشكله ما نروم نخش شي .. من طحت اول مره واكتشفو فيني السكر هاي قالت حق هاي والثانيه راحت قالت حق الثالثه .. يعني انتشر بين الكل وعاد انتي تعرفين الحريم كيف
واللي في الدوام ينعدون ع الاصابع اللي يعرفون واحس صدق اني غلطت لما قلت .. يعني جي كانت زله