مرحبا السعاع بكل سنعه شرفتني في هذا الطلب و عسى ربي يرزقها الاجر و الثواب ان شاء الله..
حبيباتي انا وحده ما لي خبره كبيرة في المطبخ و الطبخ و الاعتراف خواتي بالحق فضيله ..المهم قلت عاد بس من المساخه لازم الحرمه تستوي سنعه و ترتب عزايمها علشان يستانس ريلها مع انه محد مينني غيرة كل ما اقوله شوه اتحب اسوي لك في العزيمه يقول ذبيحه و سلطه وبس ..مع انه يوم يروح لحد يمدح عزيمتهم ويوم اقوله شوه امسوين يغير الموضوع قلت خلاص بس ما بدهاش اطلب الفزعه من خواتي ..
محد منا ما تحب تبهر ريلها وريلي ادري انه بيستانس اذا شاف شي يديد بس مثل ما قلت اني ما عندي خبره وايد في العزايم و هذا راجع لعدم روحتي للعزايم وايد ..
الحين عزيزاتي الفزعه اريد كل وحده اتقول لي بالضبط شوه اتسوي يوم ايكون عند ريلها غدا او عشاء رياييل شوه يعني الاطباق اللي اتسويها بجانب الذبيحه طبعا ..وحتى اللي تتفنن في التقديم ياليت اتساعدني ..
وجزاكن الله الف خير ورزقكن على كل حرف تكتبنه الف حسنه ..
الغالية انا بريحج مادام هو بيسويلج الذبيحة يعني عيش ولحم في المطبخ يا الدور علييج اتكملين الطبق الرئيسي اول شي بالمقبلات سوي تبولة او فتوش او اي سلطة يديدة وغريبة ويا مثلا ممكن محاشي يا تطلبين او بروحج تسوين ويا كثر الوصفات السهلة وثاني شي الطبق الرئيسي يبا طبق رئيسي جانبي يا تسوين مثلا اممممم فريد وممكن دياي مشوي مدام الذبيحة لحم وممكن اتسوين فته …وكملي اطباقج بكم طبق حلو وطبعا لاتقولين حق ريلج شو اسوي او شو بتسوين فاجئي عشان يستانس وطبعا ممكن تاخذين اطباق البوفييه او ممكن اتسوين مدة حلوة واجهزين عليها الصحون والخواشيق وخواشيق الغراف والماي والبيبسي والسفن أب ولاتنسين اول شي القهوة والجاي وياهم حن تمر ومادري بعد الله يبيض ويهج واي سؤال من عيوني لو تبين اي مساعدة …
ام عبدالله ..يزاج الله الف خير وجعله في ميزان حسناتج ..
شوه ماحد سنعه الا ام عبدالله ..وينكن يا بنات
أنا بعدي عالبيض و البطاطا و الزهره و لامره سويت عيش
مشكووووووره الغاليه
اممممم
شوفي اذا كانت العزيمه كبيره
ممكن يعني تقسمين اتسوين نص ذبيحه وانتي سوي سمج مشوي او دياي مع بطاطس وبصل وطماط وتبهرينه مع دبس الرمان وتحطينه في الفرن
وسوي عيش بالشعيريه
وسوي سلطه يونانيه
ولا سيزر سلط ولا فتوش
وسوي بسباس
الي هوه حطي قرون فلفل حار في الخلاط مع ليمون وعقب افرمي طماط بالسكين واخلطيه معاه
و ابشري خيار وجزر مع روب واتفنني في الحلويات للتحليه مثلا ام علي ولا جيز كيك ولا كيك
وبس
واذا اتذكرت شي بقولج
مرحبا اختي سوي عدال الذبيحه مكرونه بالبشملا وكفتة لحم ومحاشي ومضروبه وكروسون وتشكيله من السلطه بس لازم اترتبين قبله بكمن يوم مثلا لفي المحشي وحطيه بالفريزر والسمبوسه والكفته بعد .وبالعافيه عليكم.