صدمة كبيرة ما توقعتها ف حياتي !! لا تحرموني من نصايحكم

وصلتني رسالة ع الايميل من أحدى العضوات طبعا هي موجودة من بينكم وحبت انها تعرض مشكلتها وراح تقرى ردودكم ان شالله

السلام عليكم
اسمحولي على اسلوبي في طرح الموضوع وعلى طوله بس الصدمة الي فيني خلتني انسى كل اساليب التعبير!

انا بنت الحمدلله من عائلة زينة تربيت على الاخلاق العالية والكل يشهد بذلك ، ما عندي سوالف وخرابيط بطالية ، امي وابوي الحمدلله ما في منهم ,,بتقولون وين المشكلة ؟؟
الله يسلكم تقريبا من عشر سنوات او اكثر اختي الكبيرة كانت في الجامعة وتعرفت على وحدة ما شالله عليها بنت ناس هم 3 خوات وحدة منهم بسني وخلينا نسميها (فاطمة ) هي الوسطى مثلي تماماً امهم وابوهم متوفين ما يعرفون اي حد من اهل امهم لان امهم من دولة عربية اهل ابوها تبروا منهم بعد ما تزوج ابوها يعني من الاخير ما عندهم حد ! ااااابد ! للعلم هم في امارة ونحن في امارة بعيدة شوي !

اختي لما تعرفت على البنت اعتبرتها اختها واكثر فلنسمي اخت فاطمة (مريم ) مريم الكل يشهد بأخلاقها وتشددها في تربية خواتها والتزامها الديني حاولت اختي ان تعرفها على امي علشان تعوضهم الحنان وفعلا هالشي صار وبفترة بسيطة بس كسبنا بعض صرنا عائلة وحدة 24 ساعة عندنا اللهما بس وقت الرقاد كانو يردون بيتهم . تعرفوا على كل اهليتنا / اي عزيمة او مناسبة لازم هم يكونون معانا م اي غرض امي تاخذلي لازم تاخذ لهم / اذا تعبوا او مرضوا لازم نجابلهم / ع سفراتنا على كل شي هم معانا دوووم / انا كانت علاقتي مع فاطمة علاقة ربع واكثثثثثثثثثثثثثر كنت اعتبرها اختي تشكيلي واشكيلها وكانت دائما تنصحني وتذم البنات الي عليهم حركات بس انا بطبعي ما احب ارمس كلة اقول الله يهديهم وبس!
مرت الايام انا دخلت الجامعة وهي دخلت الجامعة الي في امارتهم وبهالفترة صارت عندنا عدة مناسبات وطبعا هم اول الناس الي يعرفون في كل شي اجازاتهم عندنا ،، امي وابوي تعودوا عليهم يعني اذا يوم واحد ما مروا عندنا او ما سمعنا صوتهم تسود الدنيا بعينناا ونحس ان فعلا في شي ناقص ..
الحمدلله انا تخرجت وهي تخرجت ، واشتغلت وانا اشتغلت عقبها بفترة وبحكم علاقتنا القوية مع بعض
فأنا كنت أقولها عن طبيعة شغلي واني الحمدلله مرتاحة واااااايد لان اشتغلت بشي يناسب تخصصي واااااايد ، كان عندي مسؤول في الدوام ريال عود وابو عيال دايما كان يعاملني باحترام ودوم يقولي انتي بنتي الصغيرة واختي الكبيرة وكان يعرف رقمي لان احيانا عقب الدوام كانت تستوي بينا اتصالات عادية في حدود الشغل وطبعا هذا كله بعلم اهلي ، وهو يقرب لنا من بعيد ، انا دووم كنت امدحه يدام فاطمة واقول عنه كيف انه انسان محترم ….الخ
عقب شهرين من دوامي بالضبط يتني الصدمة !
زقرني وقالي فلانة تعالي ابيج في موضوع ، يوم شفته شكله قلت ف خاطري الموضوع ما يبشر !!!
بدأ بمقدمة يمدحني ويمدح أهلي وتربيتنا !! قال لي فلانة : أنتي تعرفين فاطمة !؟
انا اهني استغربت قلت :@@ كيف تعرف فاطمة !
قالي بقولج الموضوع من اخر هالبنت تسويلي مشاكل واانا انصدمت لما عرفت انها ربيعتج ، قالت لي : انها خذت رقمي من تلفونج وانج دوم كنتي تمدحيني وانها انعجبت فيني وحبتني وقالي لي عقب ما عرفت انها من صوبج هددتها وقلت لها انه بيخبرني كل شي ،، تخيلو شو سوت // أخ يا القهر :وانا دموووووووووووووووووع واصيح واقوله انت جذاب
يقولي : تمت اطرش مسجات وكلام وصخ استحي اقولج بس براويج وانتي اقري واخرتها تمت اطرش صور فاضحة !! ووصلت لين الحرمة وتسويلي مشاكل
والله يا بنات انا منهاااااااارة واصيح وتمنيت الارض تنشق وتبلعني !! لهل الدرجة الوقااااااحة
كرهت الشغل كرررررررررهته ,,
قال لي الله يخليج وقفيها عند حدها وانا اصيح واشوف صورها ف موبايله اخ يا قلبي

هي الي كانت تسوي عمرها شريفة مكة ، اخر شي هذا كله يطلع منها

اتصلت في اختها وانا منهارة واقولها : عن السالفة
اختها

صااااااااااااااااااحت وقالت لي تعبت معاها !!
قلت لها : ليش ؟؟ انتي تعرفين عن سوالفها ؟؟
قالت لي الله يخليج استري عليها ياما سوت جي وياما سوت وانا اصلبها واضربها واحرمها واوديها دروس ومحاضرات !!
وقلت لها :: بس هي ما يبين عليها
جان تقولي : هذا قناع عسبت تغترون فيها !! ما تبى تخسركم بس في نفس الوقت عندها حركات بطالية في دوامها وقالت حتى لما كات في الجامعة بعد جي !!
كرهتها كرهت كل شي الموضوع مب بس لين اهني
هي اعترفت لمسؤولي وقالت انها تحاول تسوي علاقة مع اخوي وتبى تكسبه وقالت انها طلعت رقم ثاني عسبت ما تنكشف ولا اخوي يكشفها// اخووي الي في حياته ما حط عينه في عينها !! الي دوووم يحترمها الي يوفرهم لهم كل شي وما يقصر معاها
طيب ليش : تخيلو وقاحتنا
تعرفون شو قالت : قالت انا انقهر واغار يوم اشوف ربيعتي الي هي انا علاقتها اوكي مع كل حد وايد حبوبة !! << لهل الدرجة تكرهني , لهل الدرجة الحسد !!
عقب كل ها قولو شو اسوي :::
الموضوع صار له فترة بسيطة ، وانا طلبت من اختها انهم ما يزورون ويتحججون ، بس الوالدة تعبانة وايد متضايقة تبى تشووفهم !!!!
شو الحل انا كرهتها حسيت اني طول هالعشر سنوات كنت عمية !
كيف وثقت فيها !!
وخايفة من سمعتي ياما طلعت وياها وعلى قولت اختها نها تعرف شباب الدنيا !!
يعني كم واحد شافني وياها و يعرفها وخذ فكرة مب زينة عني

يا بنات انا كرهت الشغل كرهت / على فكرة عقب هالسالفة اختها طلعتها من الشغل وحرمت عنها الموبايل وكل شي
بس انا كرهت الشغل ما عرف كيف اتعامل مع مسؤولي وهو دوم يقولي انا ندمان اني راويتج وخبرتج بس خفت عليج كنت اباج تتحذرين وخفت على سمعتكم كعائلة !!

انصحوني قولو كيف انسى الموضوع ؟؟ كيف ارد مثل ما كنت .. ؟؟ وامي وابوي وخواتي ؟؟ شو نقولهم // اختها ما تبى حد يعرف الموضوع !! عيل شو اقول حق اهلي

الله يجزي على كل وحدة ترد على موضوعي او ترفعه
واسمحولي على الاطالة بس حاولت كثر ما اقدر احطكم في الصورة معاي

مثل ما قلت لكم الموضوع ما يتعلق فيني ! اتمنى ان الله يفرجها عليها والله مب شوية صدمة عشر سنوات