سوالف آخر الليل . مع وحدة تسعى للذرية

بنات بأختصار أنا أحبكم ومعاكم من زمان ويمكن أكون من مؤسسات هالقسم الله العالم< والله عضوة موب ادارية او مشرفة
وأسمحوا لي أني داشة بأسم غير أسمي، والسبب أني على البساط أحمدي وأكتب كل مشاعري

عموما أي أسم بدخل به
ربي الشاهد اني احبكم وأتمنى ربي يرزقكم بذرية صالحة سليمة ومعافاة ومن حفظة كتابه

ذكرت أكثر من تجربة خضتها في السعي للذرية وفي هالقسم
زمان
وأنقطعت
وخضعت لتجربتين قصدي ثلاث وماذكرتهن وأنحرمت من قربكم ودعواتكم والله يسامح إلى كانوا السبب
أخاف بعد نجرح مشاعر حد ويطلب مني أغير أقوالي

بنات بإختصار خاطري أكون أم
90% من مراحل العلاج أنا روحي لان ريلي ضد العلاج يقول ربي بيرزقنا بدون هالتخبيص
الحين وانا أكتب تنحجب الرؤية ماقدر اشوف من دموعي لان توني قارية قصة
على هذا الرابط (حملج اتأخر و العمر يمر ….. تعالي اقري قصتها و ابكي على ما فاتج)

تقول نستغفر أفضل من التعب

ونعم بالله، بيده الرزق وبيده كل الكنوز
لكن أنا أسعى
أسعى وأثق أن ربي عالم بحالي وضعفي
وبيرزقني

فشلت آخر محاولة محد يعرف عنها إلا بشكارتنا (لأنها إلى تضربني بالأبر) وقبل السحب بيوم زوجي الى انصدم وكان بيكنسل كل شئ

سعيت لمركز كونسيف عند دكتور بنكاج، مابي اطفال انابيب ابي ادوية لتحسين جودة البويضة
وطلع عيني عشان يصرف لي هالادوية
ومواعيد وتعرفون الدرب لشارجة
وحاليا انا خارج البلاد ومعاي ادوية مركز كونسيف وتحسس بطني من هالادوية وتعبت في الغربة

بنات انا كاتبه هالموضوع أبي دعوة وأبي حد يمسك بيدي ويوقفني على حيلي
العمر يمضي وكلمات دكتورة كبيرة من دكاترة بوظبي زرتها قبل رمضان السنة الي طافت بأسبوعين بس
هي ضد اطفال الانابيب لانه اصلا موب تخصصها ورحت لها من كثر الزن من الناس انه لازم ازورها
قالت انتي خلص
خلص مخزون البويضات عندج
قهرتني وانا مبتسمه مابي ابين لها
قلت ربي الرزاق
وكل مابتسمت وزدت من الايجابيه
كانت معاي سلبية اكثر
طلعت من عندها وأنا أتخيل (عين السيح) الحبيب الغالي
منو ياترى بتكمل وياه الدرب
وأنا
وين بكون

كتمت بصدري ومحد عرف شو قالت
أترييت أخوي العود يرد من دراسته برى في اجازته
عشان اسير انا وياه عند دكتور وليد
دكتور وليد صاحب الابتسامة والامل والطاقة الايجابية ربي يرزقه ويوفقه ويبعد عنه عيال الحرام ويجعله ممن يخدمون هذا الدين

طبعا مانجحت التجربة لكن طلع مني بويضات وايد رغم ان جرعات الابر بسيطة مقارنة بالسفاحين ضربوني بابر قد تصل في اليوم الى 450
وهم سبب نقص عدد البويضات

سبب فشل العملية ان جودة البويضات ردئ

أتذكر يوم سرت للدكتورعشان أخبره ان الدورة جتني و أبي أبدى معاه من يديد وكنت هادية جدا، لكن هو تقولون ميت له ميت وحاله حال وحزين
كنت بقول ياعمي فلها موب اول مرة
عد وأغلط سويت العمليات شرق وغرب
بس نفسي
نفسي
حد يشرح لي شو السبب ، أدري ان ربي هو الي يرزق
لكن لكل شئ في الوجود سبب
وأنا أبي أعرف الأسباب
تعب جسمي من الأبر
وأنهد حيلي
وظهري تعب
وزني زاد
وريلي زهق
وأنا لي رب كريم
قسما بعزته وجلاله أنه بيرزقني
والله بيرزقني
ولكن لكل شئ ميعاد
وكل شئ بوقته حلو

سامحو قرقرتي آخر الليل
بس كنت محتاجة أسولف معاكم
عن مشاعر وحده تبحث عن الذرية

أحبكم أخواتي الباحثات الساعيات

أخيتكم في كولن حاليا
وتبلع حبوب يوميا (DHEA) وجلوكوفاج
اماباقيادوي ماعاد قدرت ابلعهن

تصبحون على طاعة