رد على قايدات الريم

السلام عليكم ورحمه الله وبركاته
خواتي هذا رد لقايدات الريم إنا ام الولد وهي الي كتبته فيه شي منه جذب لكن مب مشكله الله مايضرب بعصا، يوم بغينا نخطب حق ولدنا دلانا واحد عليهم وسرنالهم وهم على قد حالهم وبيتهم بالايجار وكلمناهم وقلنالهم إن ولدنا مداوم من سنه وشرحنالهم إمكانياته وظروفه، وقالو أخوها هو ولي امرها المهم تمت الخطبة، وكانت الملجه في شهر 3 وكانت في بيتنا لان بيتهم صغير وخنخوش والملجه كانت حلوه وماقصرنا في شي وحددنا العرس في شهر واحد 2024 الولد بنى فالبيت غرفه وحمام بتكلفة 60 الف درهم وبعد ماحجز وخلص كل شي قالو معازيمنا بيوصل عددهم 1500 نفر، ردينا عليهم مانقدر العدد وايد ماقالو شي بس هم حاطين فخاطرهم، من بداية الملجه لين العرس شهريا كان يوديلها هدايه من غير مصروفها وقبل العرس بكم يوم الام اتصلت وقالت شو بتيبولنا الحينه والناس يسوون جيه والناس يسوون جيه ، رديت عليها خلي العرس يستوي ومابنقصر فيها لان الولد الحين مديوون وقبل العرس بيوم سوو حناء في بيتهم جدا بسيط والعرس كان في جمعية ام المؤمنين وحجزنا حق 500 شخص من صوبنا وصوبهم واستوا العرس,بعد العرس ولا يوم يلست فالبيت وحتى لو تيلس فالبيت تيلس على الابتوب ويوم تنام عند ريلها ويوم عند امها ولاجنها عروس يديه وتقول والله ماييني رقاد وقلنا مب مشكله المكان يديد عليج وبتتعودين وكلمتها بالزين وقلتلها أعتبرج مثل بنتي واذا شي فخااطرج خبريني هذييل نفس اخوانج وعمج حسبت ابوج..
ودايما غرفتها لايثه وحتى يوم تسحي شعرها ماتنظف المشط من الشعروقلتلها خليج نظيفه ودووم ادخني ودخني غرفتج انتي عروس يديده بس مايازلها,وعندي بشكارتين وهم الي يخدمونها في كالشي وفي يوم من الايام بعد رد ما رد ريلها من الدوام قالها حطيلي غدا قالت لا وماحطتله ويوم تطلع تطلع من غير شوره او تقوله انا سايره مكان وهي تكون سايره مكان ثاني وامها متفقه ودايره وياها ,, كملت 15 يوم وقالت انا حامل ابغي بيت وبشكاره بروحي لاني بيب ياهل ,, وقالت له يلا شل لحيتك وسير دور لك على شغل راتبه 18 او 20 الف وهي اصلا تعرف كل شي عنه ونحنا خبرناهم بظروفه الماديه اول باول عيل ليش وافقت عليه من البدايه وهو مايروم يعني بيسرق عشان خاطرها، وبعدين قامت تنام في بيت امها لمدة 5 أو 6 أيام ,, وعمت زوجي ساكنه معانا اتصلت في امها كلمتها بان تنصح بنتها وبعد مايازلهم ,, ولدي احتار وياها ولا يعرف شو يسوي نش واتصل فاخوها العود الي هو ولي امرها واخوها انسان ملتزم ومتفهم ومانعرف شو الحديث الي دار من بينهم وبين أخوهم مره وحده انجلبو اتقولون يتلهم حاله نفسيه الام واختها المطلقه وهي نقزو مره وحده ودخلو عليه يكلموني ويايبيين ربيعاتها وياهم غافلوني ودخلو غرفتها وشلو الذهب والاغراض كلها (داشين على طمع) الله مايعطي كالشي مره وحده لازم الانسان يصبر والام من واجبها انها تنصح بنتها عافاني الله كلهم نفس الطينه امها بروحها تناقز ووايد يهمها كلام الناس وتيلس تخربط علينا ومانفهم عليها وفيها حره لان كلمنا اخوها قالت يوم بيي ولدج بفره بحصى ,, المهم ولدي رد من الدوام وكان تعبان قالهم شو تبون وطلع عشان المشكله ماتكبر وهم يلسو عندي يخربطون ويصارخون وهي يلست فالحوش وتقول مابظهر من البيت لين يطلقني وعقب يوم شافت مافي فايده روحت وهو رد البيت وعقب شويه يت حرمته تمت تقوله لو ماطلقتني الحين انت مب ريال وتمت تردد هالعباره ,, ودخلت غرفتها ويلست تكسر الاغراض وعقبها يت امها واختها والام مسكت ولدي من فانيلته وتصارخ عليه ليش كلمت اخوها وانا يالسه ايرها من ورا ابغي اخوزها عن ولدي وهو مادزها عشان هي حرمه، لكن غلطت يوم مايبتلهم الشرطه,,ويقولون ان امها فيها القلب عيل وين سار القلب يوم امايتها كانت تناقز وصريخهم شال الدنيا شل ماتم حد فالفريج ماسمعهم، إلا بدخلت زوجي قالهم شو هالزعييج وهم طايحين فولدي سب وتقوله أنا بنت ريال وانت مب ولد ريال جدام أبوه (نحن أول مرة نصادف بشر جيه ) مب متعودين على هالاشكال. المهم قال أبوه ماعرفنا وحدة يظهر عندها الحمل خلال15 يوم من الزواج وقال اذا تبين الطلاق سيري المحكمة، نش ولدي سالها انتي صدق حامل ؟ ردت عليه حتى لو انا حامل تخسي انت تكون ابوه وقالت يلا طلقني ما عندك عشرين ألف علشان اطلقني حرج ريلي وقال هذيل مال شوارع يلا برع يالسبلان، والله لو شوية زادوها جان اتكفخوا منه لانه عصبي ومايداني هالحركات ( كلام وسخ اول مرة نسمع به) والحين يالسة في بيت أمها من شهر ونص واطرشله مسجات وتقول اذا انت ريال تعال نتفاهم ردعليها اذا بتفاهم بتفاهم ويا ريال يقصد أخوها قالتله انا عن عشر رياييل وفوق كل هالمواصفات الحلوة الي فيها حضرتها تبغي شهريا مصروفها 4000 درهم ياسلام عليها. والحمد لله ولدي صغير وأجمل منها وعلى قولتها ان سيارته تفشل والله ان سيارته أحسن من سيارتهم وتقول شهادته تفشل والله ان هي ماعندها ثانوية العامة وهو هاي السنة بياخذها انشاءالله والحمدلله ملتزم وخايف ربه ويداوم في هيئة الطرق والمواصلات في دبي ( وشو الي يفشل في هالشي ،هي إلا قاصة على ويها.

والله اني مصدومة
مو جنة زواج
جنة حرب
والحمد لله ولدج ريال ما ينخاف عليه
وشورة بايده
اذا يبا فامساك بمعروف او تسريح باحسان
والله يعينكم

لا تعليق

!!!!!!!!!!!!!!!!!!!!!!!!!!

.
.
.
.
.
.
.
.
.
.
.
.

الله يعوظه خير ويرزقه بنت الحلال اللي تستاهله

حشا مب بشر هاذيلا .. أنا ماحب أتعامل و يا هالنوعية من الناس

الله يهديهم .. ويعينكم ويفرج على ولدج يارب .. وتنتهي السالفة على خير آمين يارب

والله أحس أنه كل شيء ها الزمن مبني علي طمع