خطيبي العزيز

السلام عليكم ورحمة الله وبركاتة ..

شحالكم خواتي ؟؟

موضوعي اليوم عن خطيبي العزيز الله يحفظة .. أو بالأحرى عني ..

خطيبي حبوب قلبة طيب ورحيم يحبني واايد الحمدلله ..

المشكلة أني أخاف من الرجال .. لأن كل رجل قربت منه فحياتي أذاني وأقربهههم لي .. والقهر أن هالرياييل من أهلي اللي مفروض يكونوا سند لي

بس للأسف كل واحد أمنتله جرحني جرح مايبرى فحياتي ,,

ياما قلتله ان من نتزوج ونكون ببيت واحد بنسى كلل حياتي اللي قبل ببدأ من يديد وكأني وحدة ثانية .. يعني حاطة أملي فيه أنه بيعوضني عن

خيبات الأمل اللي صارتلي ..

وهو من الحين مايقصر معاي ..

بس هالحالة اللي فيني هالخوف اللي علق فيني من تجاربي كيف أتخلص منها ؟!!

مش بس من تجاربي .. من تجارب الناس من القصص اللي أسمعها من الخيانات .. من حكمة ان الريال مالة امان ,, خوفي يتجدد ,,

أرجع أهدي نفسي أقول حتى لو يوم من الأيام راح الحب اللي بيننا قلبة الطيب مابيظلمني ..

أتمر فترة نتم سمنة على عسل مثل مايقولون الحمد لله ومثل أي زوجين إلا ماتجي الخلافات ..

بالعادة لو تزاعلنا مااحب أكبر الموضوع ,, أكلم نفسي أقول يابنت لاتخلي الشيطان يدش بينكم ولا له داعي التغلي والخصام

ناقشية بالمشكلة ودوروا الحلول وتجاوزوا المشكلة .. وفعلا حتى لو انا زعلانة منه افتح السالفة ونتفق لو ان يتم الجفا شوي لين ماتصفا

القلوب بالنسبة لي مااحب الخصام لأني ماابا اي واحد فينا يتعود عليه وأن كان بالبداية يوم بيصير أسبوع وشهر الله لا يقدر ..

أنا وحدة صريحة جدا أطلع اللي بقلبي وارتاح واصك السالفة .. هو نظامة التطنيش كل مايضايق مني يقول طاف وبنسى .. بس عقب فترة

أشوفة يتذكر المواقف اللي قص على عمرة انه بينساها ياما قلته ان القلب مثل المراية إذا مامسحنا عنه الغبار كل ماتجمع مابنقدر نشوف شي منه ..!
يقولي إن شالله ويرجع لطبعة الكتوم المطنش ..

وبهالفترة كثرت المشاكل ومن ارمسة يقولي انسي ويخاصمني .. أنا تعبت أكرة الخصام لأني أشوفة يبني حواجز وبداية الجفا .. نفسيتي تعبت

وفوقها تمشكلت مع اهلي بالبيت مثل مايقولون المصايب اتي مرة وحده .. طوول اليوم تميت بروحي وحسيت ان في مية وحدة مني براسي يرمسون بنفس الوقت الشيطان لعب بأفكاري عدل ..

وأغلب هالأفكار كنت الوم نفسي أني أمنتله وايد وعطيته الثقة وايد وأني حسسته أني كلي له لين ماضمن أن مهما يسوي فيني برجع أتفاهم وياه وبسامحه ..

بهالوقت حسيت أني مو بس خايفة إلا مرعوبة منه وأتخذت وضعية الدفاع مثل مايقولون قسيت عليه وايد برمستي بقراراتي وكل مازاد ألمي منه زات قسوتي عليه ..

حاليا تجاوزنا هالمشكلة صارحتة بكل شي واعتذر أنه سببلي هالإحساس وعدني أنه دوم يصارحني عشان مانسمح للحواجز بينا ..

بس عقدتي ماراحت …

أنا قبل لايخطبني ويدخل حياتي .. كنت قافلة على مشاعري بسرداب بأعماق قلبي .. كنت مثل المرأة الحديدية شبة خالية من الاحاسيس ..

لأني كل ماوثقت فحد طعني .. كل ماأمنت لحد خانني لين تعلمت ماأثق فحد ..

ورغم أني أموت عليه بس بأعماقي أخااف يسوي فيني مثل ماصارلي من قبل ..

الحين ابا المشورة من خواتي اللي عاشروا رياييلهم سنين .. بعد ماخف الحب وبقت العشرة ويو العيال وزادت المشاكل .. واللي أخبر مني بالحياة الزوجية ..

أنا نوعا ما عايشة بتوتر أوقات أبينله اني صلبة وواثقة من نفسي عندي القدرة أتحكم بمشاعري ,, وأوقات اسلملة كل شي واحس انة الأمان والحماية والسند …

وبصراحة أحب الوضع الثاني أكثر ..لان دور المرأة الحديدية تعبنيييييي .. وأبا أتخلا من خوفي منه لأني أحبه ولأني ابا ابدا

معاه حياتي الجديدة ومو ناوية أرجع أعيش مع اللي تعبوني بحياتي مرة ثانية ..

لاتقصروا علي بالمشورة ..