خسرت أعز صديقة على قلبي،، و السبب .

السلام عليكم خواتي،
بقول القصة باختصار، و أتقبل ردودكم كيف ما كانت..

أنا من 3 سنوات تعرفت على هالبنية، و بالنسبة لي كانت أعز صديقة على قلبي، و مثل ما يقولون كنا best friends
ضحينا بوايد أشياء بس عسب نتم ويا بعض، و الناس كلهم كانو يحسدونا عالصداقة القوية اللي بينا

و حتى دخلنا الجامعة ويا بعض عسب ما نترك بعض، كنت مستحيل أتخيل إني أقضي يوم واحد بعيد عنها، مستحيييل،، هي فكل لحظة فحياتي، تعلقت فيها بقوة، كنا ربع مب مثل أي ربع، كنا ويا بعض طووول الوقت

لين ما يا ذاك اليوم، و صار مشاكل من ورا شي لين الحين أنا مب فاهمتنه، قالتلي خلي التظاهر و التمثيل لأن كل شي واضح، لكن أي تمثيل و أي تظاهر ربي يشهد إنه ما عندي خبر،،

بعدها صارت تشوف كل تصرف أسويه، و كل حركة، كل شي، أنانية ف أنانية، مع إني و الله ما سويت شي حق عمري، أنا مو النوع ياللي ممكن تفكر بنفسها، بالعكس أشوف الأنانيين بنظرة كره و ما أتحملهم

و كبرت المشاكل و وصلت لدرجة مب طبيعية، سمعت كلام ف حياتي كلها ما سمعته
و فالآخر عطتني ياها فالفيس قالتلي انسيني و انسي اني فيوم من الايام كنت ربيعتج و انها ندمانة على كل لحظة عاشتها وياي و خلتني امسح رقمها و بلوك عالمسن

فجأة كل شي اخترب، فجأة أغلى إنسانة على قلبي شافتني عدوة لها، فجأة صرت أكثر إنسانة أنانية ف عيونها، حاولت أتكلم وياها أكثر عن مرة، و فكل مرة كانت تقول إنه كل شي واضح و إني أعرف كل شي و لما كنت أقولها و ربي ما أعرف شان تقول إنتي ولا شي ينفع وياج لا كلام و لا غيره

و الايام يالسة تمر، و الحين عدا قريب الشهر على اخر مرة كلمتها فيها، والله حاز الموضوع ف خاطري، ما أتحمل إني أجرح إنسان، كيف لو كانت أعز صديقاتي

والله قلبي يعورني كل ما أطالع صفحة المسن، و كل ما أشوف الفون مالي، حياتي صارت فاااضية من بعدها، صرت أتحاشى الناس اللي حوالي، أمي تسألني عنها و أختي و كل ربعي الثانيات و ما أعرف كيف أرد

اللي اعرفه انها ما تبى تكلمني لاخر لحظة فحياتها، فاني اردلها هذا شي مستحيل بالنسبة لها
و ما اعرف شو اساوي بحياتي بدونها

ترا عندي وايد ربع ثانيات و كلهم غاليات على قلبي، لكن هي غير، هي كانت كل شي، و في وايدات يعرفون باللي صار، و كلهم يقولولي هي اختارت هالشي خلاص خليها، لكن كل ما افكر فيها اتذكر كلماتها و ايلس اصيح وين ما كنت، حتى لو فالشارع دموعي تنزل بروحها

ما أقدر أنسى، و ما اعرف شو اسوي الحين
ابي نصيحتكم