مرحبا خواتي
اكتشفت إن ولدي عنده حساسيه من السماسيم
يوم يقرصه سمسوم ينتفخ المكان اللي مقروص فيه
سواء ريوله او ايده
وايد متلعوزه وياه وماعرف شو السبب مع ان ماعندنا حد جذي لا أنا ولا ابوه
واااااااااااايد ينتفخ ويوره لدرجه مايقدر يمشي عدل
لو سمحتوا إذا حد يعرف عياده وإلا حد مر بها الموقف قبل ايخبرني
اخاف يأثر عليه مستقبلا ويتطور هالشي
يزاكم الله خير واللي ماتعرف ترفع الموضوع
هلا اختي انا بعد فيني هاي الحساسية
ورحت العيادة وعطوني دوا مال الحساسية اللي كرتونه اصفر وابيض بتاكد من الاسم وبخبرج
لكن الاحسن تودينه العيادة لانه هالدوا فيه كورتيزون
انا يوم تقرصني سمسمومه اتورم كلي واختنق وينخفض ضغطي وممكن اموت لو مالحقوني للطوارئ 
صارت لي 3 مرات ويعلم الله شفت الموت بعيوني اختي راقبي ولدج زين لا يكون يتحسس وايد مثلي هالحاله وايد خطيره والله اذكر مره قرصتني بحديقه في بوظبي وصلت الطوارئ على اخر انفاسي الدكاتره عطوني ابر ادرينالين وانا عندي القلب من الخوف طلعوا وخلوني ماعرفوا شيسوون لي والله ستر ونفعت معاي
السمسوم جدا سام لبعض الناس وخواتي مب مثلي بس عندي اخ واحد نفس حالتي
ديري بالج وانتبهي وولدج ياليت بس على تورم القرصه انتبهي لتنفسه وكل جسمه
انا ماروح حدائق لهلسبب وشايله هم اني بسكن بالعين من السماسيم وعندي بجنطتي ابره ادرينالين للطوارئ لو انقرصت اضربها لروحي
تخيلي كل هذا السماسيم !! سبحانك ربي
مابا اخوفج بس هالحاله موجوده والله يسلمه لج ويحميه ويبعد عنه الشر
الغاليه
ربيعتي مثلج توصل لها المرحله تتورم بكبرها وتوصل لمرحلةالاختناق
بس قالتلي انها قبل كانت مثل ولدي تورم وتيبس بس لكن الوضع تطور أحين عندها لمرحلة الاختناق
والله خايفه عليه تتطور هالحاله عنده
راقبيه اختي وخلي بالج عليج ودوم انتبهي لايكون في بيتج سماسيم ورشي دوم عن الحشرات
ونصحوني لو قرصتني سمسومه ممكن احط مكانها بسرعه شريحة ثوم وادعكها زين بس للحين ماجربت