السلام عليكم أخواتي
أنا عندي مشكلة بسيطة وهي إني حامل ولله الحمد وعندي بنتي عمرها سنة و3 أشهر وأحس إني صايرة عصبية وعلى أدنى شي تستوي مشكلة بيني وبين ريلي (لأن هو بطبيعته يعصب على طول) بس بعد شوي عادي نرد مثل ما كنا ولا كأن شي صاير
مع ذلك أحس إن هذا المشكلة اللي استوت سوت فراغ بيني وبين زوجي لدرجة إن راح اليوم الشغل زعلان مع العلم إنه كان في إجازة سنوية وشغله مب في إمارتنا يعني بينام في الشغل لمدة 5 أيام
شو أسويله لما يرد البيت وكيف أتعامل ويا كل اللي استوى في الأيام الي طافت ؟؟؟؟؟
مع العلم إني كل ما أكلمه عن المشاكل اللي تستوي من بينا يقول لي هذا شي عادي ولازم الحياة الزوجية فيها مشاكل بس أنا مب عايبتني حياتنا جي لأن أول سنة كانت حياتنا أحلى من العسل وخاطري ترد هذيج الأيام……….
لا تبخلون على أختكم بالنصايح
أول نصيحة لج حبوبة
ابعدي عن الحنة والزنة والعصبية
هذي اول سبب للفراغ والفتور بين الزوجين
وخلج كووووول وحبوبة ومرحة ومشاكسة
الرياييل يحبون هالشي
صح انتي حامل والحمل غصبا عنج يخليج جي
لكن حاولي ترصين على عمرج
مثل ما انتي عارفة مرحلة حمل الزوجة تكون ثغرة ومدخل للخيانات الزوجية لأنه بعض الخدامات والعشيقات وبعض زميلات العمل يستغلون هالفترة لتكوين علاقة مع الريال
لأنه يكون ناقصنه شي
لا تمين تسألينه وايد انته ليش متغير علي
لأنه اخر شي بيمل وبيتشرب الفكرة وفعلا بيتغير عليج
يمكن يمر بضغوطات ولا ظروف وهالشي مأثر على علاقته فيج غصبا عنه
اصبري عليه شوي وان شاء الله بيرد بروحه كالعادة
بس اهم شي خلج انتي الكوول الحبوبة المرحة المشاكسة اللي توفرله الراحة والهدوء
مشكورة حبييتي شذى الأرواح على النصيحة فادتني وعطتني دافية
أنتظر نصايح أكثر
يختي معاج حق تعصبين
بنتج صغيرة وحامل بعد
الله يعينج
تعرفين حطي في بالج شي واحد
انه الدنيا الي انتي فيها مابتعيشينها الا مره وحده بس
ودام انه مشاكلكم سطحيه والا تافهه ماله داعي تكبرينها
انا بقولج شو تسوين
احسن شي انه تيلسين مع نفسج في هالكم يوم الي بيكون بعيد عنج فيها
يلسي فكري واذكري كل شي حلووووو مر في حياتكم انتوا لثنين فكري بتعمممممممممق
اي موقف اي كلمه اي حركه حلوه بينكم فكري فيها بتحسين انتي من خاطرج اتغيرتي وسامحتيه لو كنتي زعلانه
وبعدين كلميه ولو يكون ويه بويه وبهدوء وبدون حشرت لعيال احسن وقوليله انه انتوا لثنين غلطانين
وهاذي حياتكم مابتعيشونها غير مره وحده ليش تعيشونها بهم ونكد وحنه وصدعه اتفقي معاه انكم تساعدون بعض
على التغيير ووعديه انج ماتعصبين عليه ولا يعصب عليج على سوالف ماتستاهل ..
ودام انه الوفا والحب والتفاهم موجودين مابيصير زعل
بس اهم شي انه يكون التغيير من الطرفين ووعدوا بعض انه السوالف الي طافت والزعلات الي مرت ماتيبون طاريها مووووووول
وغيري من الروتين الي عايشتنه لاتقولين ماقدر وعيال حاولي قد ماتقدرين باي طريقه غيرييييييه
وكسر الروتين تراه مب شرط بالليالي الرومانسيه وبس فيه وايد اشياء تكسر الروتين واهم شي يكون بشي تحبونه انتوا لثنين
يعني حسي كأنها حياه يديده وتبين تعيشينها عشان تستانسين حرام يطوف شبابج في حياه كلها هم وقهر ويوم تعيزين تقولين ياليتني عشت شبابي
وان شاء الله تستفيدين من كلامي ويكون شي يديد عليج مب كلام مكرر 
وتتغير حياتكم للاحسن
جني قرقرت وايد
للرفع ومنكم نستفيد
الغالية
هذا شي طبيعي دام إنج حامل
بس قبل كل شي
ما تعرفين إنه العصبية تأثر ع الجنين؟؟؟
ختيه مب زين لج
ويمكن هالمشاكل كانت تصير بينكم لأنه في إجازة وكله عندج
بس دامه حالياً بعيد عنج يوم بيي ما بتخلين يصير بينكم أي مشكلة بإذن الله
لأنه بيكون بينكم شوق
وبتحسين بالذنب
بس ليش خليتيه يطلع وهو زعلان؟؟
ختيه
إذا هو عصب انتي سكتي
لا تراددين
تمي ساكتة
لأنه إذا الأكل زاد ملحه حد يقدر ياكله؟؟؟ فمب حلو حياتكم بشكل يومي تكون فيه مشاكل
والله يتمم لج حملج ع خير