السلام عليكم ورحمة الله
اليوم حبيت افضفض واطلع الي بخاطري ..لاني دوم كاتمه مشاكلي وهمومي واحس بديت اتعب وايد
اول شي انا الحمدلله تزوجت بالبدايه حياتي كانت حلوه وكنت مرتاحه بعدين بديت اشوف تغييرات مثل
التدخل بالخصوصيات من العمه التدخل باللبس التدخل بالشكل حتى التدخل بالعيال مثل لا تجيبوا عيال لحد ما ولدي يكبر ,<اقول بخاطري انتي شو دخلج انا وابوه بنربيه ,,,,وغير جي ماشي اسلوب ابدا والله العظيم احس الصغار عندهم اسلوب اكثر منها .,.حتى بالطلعات يدخلون اذا طلعنا لازم تحقيق سين جيم عسب الطلعه …وبعدين بديت اشوف منها التفاخر والتقليل من مستوى اهلي اكثر من مره لاحظت هالشي بس اسكت واحترمها واقول مابي مشاكل ..يعني احس اني ما عندي شخصيه قدامها وما اقدر اقول شي .تخيلوا انها تصارخ ع ريلي قدامي وتعامل عيالها الصغار احسن من ريلي ..وتعصب اذا مثلا دخلت ارقد وقت الظهر يعني احيانا احس بالتعب وادخل غرفتي .وايد وايد لو حكيت كل شي ما بخلص ما احس نفسي حرمه متزوجه ولها حياتها الخاصه …ودايم الدوم تقلل منا انا وريلي …ما اعرف كيف اتعامل معها وشو اسوي ..ولا انا حساسه ومكبره الامور قولولي الله يخليكم ..
طبعا ربيعتي شموخ الغرام نزلت مشكلتي من قبل بس بشكل مختصر …والحين انا نزلتها واتريا منكم الحل المناسب .
سايري عمتج مهما كان هاي حرمه كبيره.. حاولي تكسبينها !!
ولا تحسسين ريلج بشي بالعكس خلج وياه
برايي من تظهرين ف بيت روحج بترتاحين
الله يسهل علييج
هي مب كبيره بس احسها متسلطه وايد …وتقول الكلام وماتحاسب ع مشاعر الغير…تسلمين اختي
ما عليه حبيبتي يا ما حريم صبرن اكثر من كذا عن نفسي والله صبرت وايد والحمدلله في النهاية ارتحت الحين عمتي تثقفيني اكثر من بناتها والله اني صبرت واااايد احس عمتج عسل مقارنة بام ريلي لكن الواحد لازم يصبر لان في النهاية والدة كنت دوم افكر كيف ارد عليها انسانه مثل امي..
عليج بالصبر وسايريها بالاخص اكسبي خوات ريلج ويوم باتظهرين خبريها واساليها اذا تبى تسير وياكم ترى كما تدين تدان باتدور الايامتمر وراح تستوين عمة..
ماشي الا انج تطنشين الي تسويه
واذا تضايجتي منها لاتخبرين ريلج حتى لو شي صار بينج انتي وعمتج خلي هالاشياء من بينكم
امممم حاولي انج تكسبينها بالهدايا انج تيلسين وياها تسولفين وياها تقربي منها
وايد في عمات جي
والله يعينج
الله يعينج فديتج ،
صبري و ان شاالله يوم بتظهرون فبيت روحكم بترتاحون
انا بعد ما اعرف اتعامل مع عمتي اعاملها بكل احترام و لطف و كل ما صرخت و لا نغزتني بسالفه اغير الموضوع عسب لا تكبر وايد الحين ما اتقول شي جدامي بس من وراي ترمس بس شو اسوي حاولت معاه انا سويت الي علي و الباجي على الله صابرة لانه ريلي ما يبا يخليها بروحها و يطلعني بيت بس الحمدالله على كل شي انتي اصبري و ان شاء الله تتغير عمتج عامليها بلطف كثر ما تقدرين لين ما هي تستحي اتقولج شي ان شاء الله ربي يفرجها عليج و يجمع قلوبكم على بعض