الطلاق ارحم لي

لا حول ولا قوة إلا بالله

غاليتي ,, ربي يصبرج ويعينج على هالريال (ابتلآء للأسف )

صراحـة ما أعرف شو اقولج وشو أخلي

وماعرفـــت كيف أبدأ

يعني الصبر زين والحرمـة تتقي الله في أهلها بس مب لدرجــة الضرب ,, كله إلا العنف ما ينسكــت عنه

أنا ما أبغاج تخربين بيتــج أختي أو تطلقيــن

بس في أمور لازم توضح حق ريلــج ولازم يفهــم انج انسانــة خلقج رب العالمين وكرمج عن سائر المخلوقات

وماعاش من يذلــــج لا الريل ولا غيره ..

أختي شوفي حد عاقــل وحكيم من أهلج أو أهلــه يكلمــــه

أو انتي اذا ما تقدرين تتواصلين معاه بالحوار رغم اني أفضل الحوار

بس إذا ما تقدرين اكتبي له رسالــة أو ايميل

اشرحي له وعبري عن نفسج لا تكبتين كل هالسلبيــة في داخلج مب حلو حقــج

ولا حلوة حق ولدج كل يوم يشوفكم جي ويعيش بين اسرة مهدومـة بيطلع الولد متعقـد لا سامح الله

حطي لج اساسيات غاليتي لزواجج

اشياء بدونها ما يقوم الزواج

الإحترام ,, التقدير ,, المودة والرحمـــة

هذي اشياء لازم تساهمين فيها انتي وريلـــج

يمكــن ريلج تاب عن الي كان يسويه إذا هي خلاص اختي ها صفحة وانطوت اطويها ولا تكدرين خاطرج بها

انتم طرفين في اسرة وحدة ولازم اثنيناتكم تتعاونون على انجاح العلاقـة ولا بيكون الفراق حل حقكم ..

كلميه أختي وخبريه يغير تصرفاتــه ,, وانتي راجعي نفسج يمكن تصارخين عليه وايد أو ما تتمالكين أعصابج في الكلام

يمكن ساهمتي بالمشكلـة بدون ما تحسين

ترى الكلمـة الطيبــة تطفئ نيران القلوب

حاولي تصلحين أختي الصلح زين ,, وشي حلو ترجعون المشاعر الإيجابية بينكم وياحبذا يكون طرف دخيل حكيم بينكــم

بس اذا ما استوى وريلج ما تغير فالموضوع واضح ,, والحل بين

الصبــر والإحتساب والدعاء له ربي يهديه

قيام الليل والاستغفار وحتى الصوم غاليتي بيساعدج في رفع معنوياتـــج

وهداك الوقت استخيري قبل لا تاخذين اي قرار

وربي يقدم لج الي فيه الخير