الخاصية التوزيعية

خواتي اللي عندها فكره عن الخاصية التوزيعية ارجوكم تخبروني الحين لأني متورطه في واجب بنتي اللي في الصف الخامس ودخيلكم اليوم إذا امكن

تقصدين خاصية التوزيع اللي في الرياضيات ؟
كتبي لي الاسئلة وانا حاضرة

عزيزتي أنا معلمة رياضيات وبشرحلج ببساطة عن هذاالموضوع ..
مثال : استخدم الخاصية التوزيعية لحل : 3 × 24
الحل :
خلاصة الخاصية إن عملية الضرب تتوزع على عملية الجمع كالتالي:
اتركي العدد 3 كما هو مع عملية الضرب ، واستلمي العدد الثاني 24 وفككيه " الشكل المفصل" يعني 24 = 4+20
فتصبح المسألة 3× (4+20) الحين العدد 3اللي في الخارج يدخل ويضرب كل عدد في الداخل
3× (4+20) = (3×4) + ( 3×20)
والحين نطلع جواب كل عملية في القوس
(3×4) =12 ، (3×20 ) = 60
وأخيراً نجمع النواتج 12+60 = 72
والحين بحطلج المسألة بدون الشرح علشان تشوفين شكلها أثناء الحل :
3× 24 = 3× ( 4+20 )
= (3×4) + ( 3× 20 )
= 12 + 60
= 72
أتمنى أكون بسطت لج المعلومة والسموحة ..وأي استفسار أنا حاضرة

يزاج الله خير اختي أنين الحزن الصراحه
حتى انا كنت متخربطه في هذا الدرس لبنتي
وفهمت منج الحل الحين في ميزان حسناتج الغاليه

شكرااا

تسلمين اختي احساس منسي ..ومثل ما قلتلج حاضرة باللي تامرين فيه ..ومشكورة اختي راعية الزين عالمرور

ألف شكر للأخت أنين الحزن وعساني ما أخلا انشاءالله بصراحه انا مش شاطره في الرياضيات واتمنى تتحمليني لأنه شكلي بسأل دايما عن الرياضيات وخاصه مع هالمناهج الجديده اللي احس انها ما مرت علي ابداااااااااااا.