مرحبا مرحبا رجعنا من يديد مع الجزء الثاني من السلسلة …
اليوم ماركتنا بتكون ان واي اكس واكيد الكل عارفنها ومجربنها وله رايه الخاص تجاه هالماركة خلوني اشاركم راي بها وبمختلف منتجاتها
باسم الله نبدا
ان واي اكس معروفة بتنوع منتجاتها والوانها وتدرجات الالوان
هاي صورة عينات من اشياء ان واي اكس الي عندي والي بنسوي عليها ريفيو اليوم
اول شي بنبدا به مستحضرات الشفايف الي عندهم
الارواج والقلوسات والمحددات (سوري نسيت اصور المحددات)
تحميل صور
ارواج ان واي اكس: تمتاز بالتنوع وفيه منها كوليكشنات وكل كولكشن يمتاز بخصائص غير عن الكوليكشن الثاني
اول كوليكشن وهو الكوليكشن القديم واسمه diamond sparkle lipsicks وهو اول روج من جهة اليسار
قوة اللون: قوي يغطي تقريبا لون الشفايف بشكل كامل
نوعية الروج: سوبر كريمي وبلمعه شيميري
ثبات اللون: سيئ بالنسبة لي ( كون الروج سوبر كريمي معناته راح يسيح وراح يخوز بسهولة اكثر عن الارواج المات الي اتيج شوي يابسة عن نفسي افضل الارواج الي تكون اقل كريمية قدر الامكان لاني احط الروج كبيس يغطي لون الشفايف وعقب احط قلوس عليه او روج ثاني يكون كريمي اكثر من جيه ماحبيت هالكوليكشن من الارواج وماعندي غير هالروج الوحيد من هالكوليكشن
هل راح اشتريه مرة ثانية : طبعا لا للاسف مانال اعجابي هالمنتج
الارواج الثانية من ايدد الكوليكشنات واسمها lip smacking fun colors
تمتاز هالمجموعة بانها اكثر ثبات ةاقل كريمية من الي قبلها وبالتالي ما تسيح ولله الحمد واعشق هالكوليكشن من الارواج لانه كريمية وبنفس الوقت ثابته وما تسيح وتمتاز بتنوع الوانها الي تتراوح بين الطبيعية الناتشورال والالوان الفاقعة
قوة اللون: قوي يغطي بين 60-100% من لون الشفايف (فيه الوان قوة لونها اكثر عن غيرها الفاتح قوة لونه شوي اقل فتغطي الشفايف بدرجة اقل يعني يظل لون شفايفج ياثر على لون الروج وبالتالي فان لون الروج بيختلف من وحده لوحده حسب لون شفايفها الي بيتداخل مع لوون الروج
نوع الروج: كريمي مات
ثبات اللون: ثابت متوسط
بشتريه مرة ثانية طبعا نعم وعندي تقريبا كل الكوليكشن من هالارواج
رائعه هالارواج للاستخدام اليومي
الكوليكشن الاخير اسمه matte lip stick
نفس مميزات الكوليكشن الي قبله لكنه النوعية ماله مخملية مات اكثر من انها كريمية وايد حلو التيكستر ماله مب يابس شرات ارواج اوفيس لا الروج نفسه مخملي مثل الموس فاونديشن الي طلع من مابيلين وايد روعه للاستخدام اليومي
بشتريه مرة ثانية :نعم
الحين دور القلوسات يالله كلمة روعه شوي عليهم هالكوليكشنين رائع بمعنى الكلمة وانصح الكل ياخده
القلوس الي شكله اسطواني اسمه girls gloss
بالمختصر ماعمري جربت قلوس مثل هاه
مميزاته انه التكستر ماله مخملي مب قلوسي لزج ثقيل مثل القلوسات الي نعرفها ولا يلصق لج شفايفج يوم تصكرين حلجج وتغطيته ممتازة 100% مات ورائع للاستخدام اليومي لانه يعطيج ناتشورال فينش ورونق حلو كانها شفايف طبيعية انا وايد طاح علي هالقلوس مع اني مول ما استخدم مكياج يوم اطلع بس هاه احطه حتى موانا بالبيت احسن درجه طاحت علي وتخبلت عليها هي nude جربوه صدقوني روعه هالقلوس
هالقلوسات ايوج الوان محدودة وكلها ناتشورال لانه هالقلوسات صممت للاستخدام اليومي وللوك الطبيعي
بشتريه مرة ثانية : اكيد واوريدي اشتريت اربع حبات من نفس الدرجة ^_^
اما القلوس المربع فهو من كوليكشن mega shine gloss وهيول نقيض القلوسات من الكوليكشن السابق تمتاز بالوانها الفاقعه والقوية والمتنوعه اغطيتها تاااامة 100% حتى الالوان الفاتحه بالضبط دكروني بقلوسات انجلوت وايف سان لوران الثجيله الي تغطيتها تامة
روعه للمناسبات ومعظمها بو-لمعه
بشتريها مرة ثانية : نعم اكيد اوريدي عندي كل الكوليكشن
نوعيته: قلوسي ثقيل لزج
المحددات
نوعيتها : كريمية متوسط
تنوع الالوان متنوعه جدا
تغطيتها فيه الوان تغطيتها 80-100% وهالشي رائع وللاسف في الوان وايد حلوة لكن تغطيتها مب لهناك بحدود 50% فقط وهالشي يقهرني لانه يظهر لون الشفايف وبالتالي لون الروج والمحدد مايطلع قوي ومضبوط
شي ثاني كون المحدد كريمي فهو يسيح نوعا ما حبيت هالمحددات وايد وروعه للاستخدام اليومي لكن ما تنفع للمناسبات والاوقات الي تبين فيها تغطية تامة ولفترة طويلة لانها بتسيح وبعد الاكل ما بيتم لج اي شي على شفايفج
باخدهم مرة ثانية : بعض الالوان نعم والبعض لا
الحين دور مستحضرات الويهه
تحميل صور
كريم الاساس من كوليكشن the make-up
نوعية الاساس: مخملي رائع ناتشورال فينيش
تغطيته: متوسطه
ثباته: ضعيف -متوسط (ينفع للاستخدام اليومي لانه تغطيته متوسطه ونوعيته مخملي فما يطلع لج او يبين كانج حاطه كريم اساس على ويهج لكن مشكلته انه ما يدوم وايد لانه ثباته خفيف يعني ينفع لكم ساعه مثلا الحلو فيه انه الفينش ماله ناتشورال
تنوع الدرجات متوفر فقط ب 5 او 6 درجات ولا وحده ناسبتني
بشتريه مرة ثانية : لا
البودرة من ايدد كوليكشن لهم اسمها saty maate but not flat`
ملمسها : ناعمه HD
نوعيتها: مات وحسيت كانه فيها حبيبات مب لمعه بس عاكسه للضوء يعني يوم تحركين ويهج ينعكس من عليه الضوء
ثباتها: ثابته استخدمها للمناسبات ما تكتل وتثبت الفاةنديشن عدل
تغطيتها : متوسطه
تنفع للمناسبات والاستخدام اليومي
بشتريها مرة ثانية يس يس
متوفرة بدرجات تناسب البشرة الفاتحة والسمرا
العلبة البيضا تحتوي على بلاشر وبرونزر من ايدد كوليكشن عندهم وايد حبيتها اتيج بدرجتين وحده لرونزر وبلاشر اغمج والثانية البلاشر افتح شوي بس ما حبيت الدرجة الثانية لانه حسيته شوي صعب بالدمج ومب ناعمه شرات هاي الدرجة الي خذتها وايد حبيتها
نوعيتها : البلاشر مخملي والبرونزر شيميري بلمعه
سهولة استخدامها: سهله وناعمة بالاستخدام
الدمج: رائع وسهل
ثباتها: ثابته
البلاشرات عندهم 3 انواع وكوليكشنات الكوليكشن التقليدي العلبة المربعه BP والكوليكشن الدواري الي كذا لون به MPB والبلاشر الكريمي العلبة المدورة لون واحد CBالكريمي للحيم ما جربته فما اقدر احكم عليه بس وايد يمدحونه الي عجبني به كثرة تنوع الالوان ونادر ما نحصل بلاشرات برتقاليه قوية فشفت الكريمي خذته بس للحين ما جربته اما البلاشرات الثانية تقيمها كالتالي
قوة اللون: قوي متوسط وبالتالي استخدامه بيكون اسهل وتحكمج بقوة اللون بتكون احسن بالذات لو كنتي مب متمكنه عدل من المكياج
ثباته: ثابت
سهولة الدمج: سهله
تنوع الالون : متنوع الى حد ما يعني للحين ابا اشوف درجات زياده منهم
بشتريهم مرة ثانية اكيد وان شاءالله ابا اسير اخذ درجة البنفسجي يديده نازلة
الحين دور مكياج العين
تحميل صور
الاي شادورات
قوة اللون: قوية
ثباتها: ثابته جدا
سهولة الوضع والدمج: سهل هالنوع وايد ناعم وينساب بسهوله على اليلد ومن على الفرشاه احسه انعم عن ماك لكن يظل ماك قوة لونه وثباته افضل عن ان واي اكس
نوعها: متوفر المات والشيميري
تنوع الدرجات كتنوعه الى حد ما
فيه الاي شادوات الي اتيج كذا لون بعلبه وحده انا جربت الي 3 الوان بعلبه مستطيله الكواليتي مالها رائع ونفس هالكواليتي اما العلب الكبيره ام 12 لون واكثر ما جربتهم بس يمدحونهم في اليتيوب
الجومبو بنسل : غني عن التعريف ويعتبر شادوا كريمي ووايد يستخدمونه كبيس للاي شادو
قوة اللون: قوي جدا بتغطيه شبه تامه
نوعه: كريمي
ثباته : ثابت
عيبه الوحيد انه كريمي وبالتالي يمكن يسيح عنج لو حطيتي منه كمية كبيره ويمكن يعكك فوق الجفن لو حطيتي منه وايد كبيس عشان تحطينه كبيس مرري صبعج عليه وامسحي على يفنج
بشتريه مرة ثانية : يمكن اخذ اللون الابيض والاسود
اما البينجمنت
قوة اللون : قوي متوسط
ثباته: اممممممممم مب لهناك مقارنة بماك وايد وايد احسن عن بينجمنت ان واي اكس لازم تحطينه مع بيس
سهولة الاستخدام والدمج: سهل
نوعه : شيميري واحسه كانه قليتري مب مثل ماك تحسينه كريمي زياده وتقدرين تستخدمينه من غير بيس والبنجمنت بماك معروفة اقوى عن الاي شادو المضغوط لكن عند ان واي اكس الاي شادو المضغوط مركز وايد احسن (بنجمنت اوفيس وايد احسن عن بينجمنت ان واي اكس)
بشتريه مرة ثانية : امممممم معرف الصراحه لو طلعوا الوان اكثر بجرب ولو حسنوا التيكستجر وقوة اللون وثباته اكيد باخذه
وهني صورة سواتش (مسحه) لبعض الاشياء الي قيمتها براي ومن استخدامي للاشياء
هالصورة من غير فلاش
تحميل صور
بفلاش
تحميل صور
تحميل صور
واخيرا خلصنا
وايد قرقر بهالجزء لانه قيمنا اكثر عن شغله
صح في بعد عندي الكونسيلر من ان واي اكس وايد روعه اسمه conceler in a jar والحين من الكوليكشن اليديد منزلين بيس للاي شادو ب3 دراجت الابيض المات وابيض فيه لمعه ولون البشرة الي متوفر بدرجة وحده فقط لما سرت وتناسب البشرة الحنطية المتوسطه فقط فخذت الابيض وجربته يثبت الاي شادو ولا يعكك لج الجفن ولا يلعوز الدنيا ولا يسيح لانه التكستر ماله مخملي مب كريمي وهالشي مهم مراعاتا لجونا الجميل الي كل شي فيه يسيح وللبشرة الدهنية
الكونسيلر مخملي بعد وتغطيته بين 70-100% على حسب استخدتمج لوتبين تغطيه اقوى حطي كمن طبقة منه ولانه مخملي ماراح يعكك ولا يسيح ولا يبين لج خطوط وتجاعيد على العكس يبين طبيعي وبتغطية مخملية ما صورتهم عاد سامحوني عقل ما نزلت الصور شفتهم جدامي ^_^
واخيرا خلصنا الجزء الثاني
دعواتكم لي بالتوفيق
اي استفسار او ملاحظة او مشاركة في رايج لو استخدمي الماركة عيبج او ما عيبج بليز فيدينا وشاركينا نتعلم من تجارب بعض احنا ولو عندج ماركة حابة نسوي عليها ريفيو بعد خبريني لاني احب اجرب واحب اعرف كل الماركات يمكن تكون ماركات يديده للحين ما جربتها اكون حابة اجربها
موفقة
أهلين علوه حبيبتي
انا جربت الفاونديشن وفعلا ماراح ارجع اشتريه مره ثانيه لسبب واحد فقط وهو ان لوني مب موجود عندهم واللا هو ثابت وطبيعي
البودره بعد حلوه
الايشدو صدق ايشدو يعني ما بيتغير عقب ساعتين ثلاث
الارواج ما عجبتني وايد حسيتها خربوطه (ما عرفت أوصف أحسن ……sorrrrrrry )
محددات الشفايف روعه …ثابته والوانها عجيبه وحلوه
الاسعار معقوله نوعا ما بالنسبه لهالنوع
مشكوره حبوبة
من هالماركة جربت الارواج وعيبوني وايد وودي اجرب الالوان الثانية
الجمبو بنسل حلو بس انسى استخدمه ههههه
وودي اجرب الايشدو والبلشر والجلوسات
الجلوس الناتشورال شو رقمه او اسمه ؟ ممكن صوره له اوضح
ممتااااااااااااااااااز
هالماركه روعه خصوصا اقلام جامبوو قويه وثابته ناويه اخذ كل الالوان
محددات الشفايف والبلشرات حلويييييييييين
انا جربت الارواج المات وااااااااااايد عيبتني
شكراا علي الموضوووع