الجامعة الامريكيه في الشارقه

انا بغيت استفسر عن الجامعه الامريكيه اللي في الشارقه

انا الحين اعيد الثانويه لانهم قالو لي يبون نسبه 80 مع ان عندي دبلوما في الاي تي

سوالي هل هو صعب القبول عندهم او لا ؟؟ وشلون نظامهم اذا ماجبت التوفل ؟؟ والدراسه عندهم شلون ؟ وهل الجامعه قويه ولا لا ؟؟ وبغيت اسال شلون سكن الطالبات واذا في سكن خاص قريب وين بالضبط
على اني انا بنت وماسوق شلون اوصل للجامعه يعني شلون المواصلات ؟؟

اسمحوو لي على هالاساله

فالبدايه طبعا لازم اتيبين التووفل عل ايامنا كان 530 لكن ماعرف اذا زادوه ولا للحين نفس الشي و ما يقبلون بغيره

افرضي مانجحتي فالتوفل…شو بيصير؟
بتدرسين فالجامعه انجليزي و بس…. يعني مثل ماتقولين يعلمونج عالتوفل وعلى هالحاله لين ما تنجحين… يعني الواحد يضيع من عمره

هل تقدرين تدرسين موا ثانيه مع الانجليزي؟
لا … عقولتهم انتي تعتبرين ما دخلتي الجامعه بعدج و ماتقدرين تاخذين اي مواد من مواد الجامعه

كم سنه تقدرين اتمين و انتي بعدج ما نجحتي فالتوفل؟
على ايامي كان سنتين…. لكن عقب ما بنت عمت امي و اخوي دخلو الجامعه و ما نجحو عقب سنه قالو لهم بنسحب منكم المنحه ((يعني على ايامهم خلوها بس سنه))
لكن الحين صراحه ماعرف

شو يصير عقب النجاح من التوفل؟
تمتحنين مواد مستوى… مثلا على حسب تخصصج …. اذا تدرسين هندسه بتمتحنين رياضيات و فيزيا و انجليزي
و الي كانو وياي مانجحو ولا انا طبعا….. الا العباقره الهنود او الدحييييحه … ((مع اني على فكرة كنت شاطرة وايد و بالذات فهالمواد اموت فيها))

بخصوص السكن … في سكن للطالبات داخل الجامعه يعني قريب تقدرين تروحين مشي من السكن للجامعه بس يباله شوية مشي
و في جمعيه و صالون و مطاعم طبعا

اذا انتي مب من الشارجه في باصات توصل لباقي الامارات…. لكن ماعرف شو نظامهم لاني كنت فلشارجه و ما احتاج سكن لكن ربيعاتي بعضهم كانو فالسكن

قبولهم صعب ولالا؟
ممم ماعرف… لاني انا كنت يايبه درجه وايد اوكي فالثانويه ف ماكان يحتاج مني شي ان ادخل

الدراسه صعبه ولالا؟
الدراسه ((معقده بمعنى الكلمه))… يعني انا من النوع الي يجاهد عشان يحصل فوق 95 لكن عندهم صرت اجاهد عالنجاح
مع اني اسير و اسال الدكاترة و و و … عندي طلاب يعرفون طبيعة الاساتذه و عندي امتحانات جديمه ممكن اتي منها افكار و مع هذا تخرجت ب اقل من 2.5 لكن الحمدلله

مابي اعقدج…. مافي شي اسمه مستحيل في الدنيا…. بالذات انج بتكونين فالسكن يعني فاضيه للدراسه
لكن يباله واحد مو بس فاهم… الا عبقري
يعني مثلا… عادي تدرسين شي و تلاقين غيره فالامتحان…. تتعقدين تقولين كيف جي فحياتنا ماتخيلنا امتحانات بهالصعوبه… لان الجامعه صارت تطلع اي استاذ سهل مع طلابه و تشد عليهم

مثلا لو المعدل 70 و انتي 50 راسبه
و طبعا يعتمد من استاذ لاستاذ .. في اساتذه زينين و في نحيسين
في ناس وايد تغش و تخلي المعدل بالبراد 76 مثلا و يكون عالي .. فالمساكين الي درسو و ما يابو درجه الاستاذ ما يقدر يساعدهم
او تلاقين اييب المرة الي عقبها امتحان اصصصعب عشان يطيح الكل

المهم… الواحد لو يحاول اكيد بيقدر لكن بسس ابي اوضحلج كيف الجامعه معقده عشان تعرفين قبل ماتدخلين

بنت خالي دخلت… مع انها ما شاء الله شاطرة وايد و انجليزيتها توب و خذت تخصص تموت فيه و نسبتها فوق 90 او 95 ماذكر
تخيلي مارامت تكمل و طلعت من الجامعه و غيرت الجامعه و الحين هي مرتاحه

بنت عمت امي دخلت الجامعه و ماقدرت تكمل التوفل و طلعت من الجامعه… و انقهرت لانها ضيعت من عمرها