مساء الخير بنات
انا أبا ارائكم حول موضوع مضايقني انا و ما احس براحه
اختي ماخذه و احد عنده عيال ( 3 أولاد الاعمار 14 و 12 و 10 ) و بنت وحده مال 13 سنه
نحن الخوات نيمع كل جمعه بيت ابوي , بس اختي العوده اتي و اتيب عيال ريلها معاها و الأولاد يتمون بالميلس عند الرياييل و عالساعه 3 ريلها يبا يريح بدون حشره فيرقد بالميلس و عيال ريلها مع ولدها يتمون بالمدخل و المدخل عنا يم الصاله , وحشره و ازعاج , انا تعبت ما اروم اخذ راحتي باللبس ولازم احط شيله و حتى كلمت امي قلتلها ان يدتهم ام ابوهم أولى ان ريل اختي يحط عياله عند امه مب عنا !!
فردت امي علي ان الواحد يعرف من نفسه ان هالشي ما يستوي
و قبل يومين بنت ريلها يايه و بدون لا تتصل ان بنت ريلها يايه ( البنت زينه بس انا ما اتقبلها ) و الصراحه الوحده تبا تأخذ راحتها بالكلام و جي , ما قدرت اتحمل
انا ما احب اجابل الصغاريه مال قوم سنتين و طالع , امس كنت طالعه تمت تتصل فيني وينج قلتلها يايه بالدرب و دخل البيت بيدي عشا لنفسي و جان تقول بهد ولدي عندج يبا يرقد بيت ابوي , و انا مستغربه !! لان محد بيجابله غيري و انا مالي بارض و تمت تحتشر فقلتلها انا مب مجبوره اتحمل غير عيالي و ابوي و امي
امي من دول مجلس التعاون فكل 4 شهور تسير عند أهلها مال أسبوعين , و 2 من خواتي اجازه و انا مجابله ابوي و لو بيدي اشله عراسي الصبح قبل ما اسير الدوام اسويله ريوق و العشا بس الغدا يا ايب من بره او العامله اللي عنا تطبخ و هو ما يحب اكلها بس ما يقول , جان أقول حق خواتي ان ما بيستوي شي ان لو عزمتو ابوي عندكم بالبيت او طرشتوتي شوي من غداكم , و خواتي حق بيت اهل رياييلهم ما يقصرون بس مقصرين من ناحيه ابوي و امي , حتى لو يتصلون و يتطمنون عليه مال 5 دقايق . ادري ان كل حد و ظروفه بس في وايد اشيا امي و ابوي مب مجبورين يسون لهم و سوه . يعني ها يزات الاحسان
اختي العوده كله اتم اتزاعج عريلها جدامنا ( بالتلفون ) و اسلوبها زفت مزفت و كله اتذمه جدام عيالها و تتحرطم عطليقه ريلها ( لانه عنه عيال ) و ايبهم كل ويكند مال الخميس للسبت و يردون و اتم تقول كلام طالع نازل و تلعوز بنت ريلها ( لفظيا ) , جان اقولها انا ما الوم ريلج لو طالع بره او عرس عليج , نفسيه و سلبيه
ادري طولت عليكم بس قلبي متروسه و شكرا
تفضلو ادلو بدلوكم
انا محتاره انا صح و لا غلط
تمت الموافقة
في مثل يقول كبرها تكبر …. صغرها تصغر
مشكلة اختج …. الحل ….. عيال ريلها مرة تييبهم البيت ومرة لا بحيث اهل البيت ياخذون راحتهم شوي
ويتمون عياله بالميلس مع ابوهم حتى لو يبي يرتاح لأنه في بيت عمه والانسان ماياخذ راحته كثير الا ببيته
هالشي أختج تخبره وامج اللي تفهمها الوضع عسب لاينفهم الموضوع غلط
وطريقة أسلوبها معاه ماعليج إلا النصح وهاي حياتها لو اخذت بنصيحتج الحمد لله وإلا العواقب مابيتحملها غيرها
مشكلة خواتج … انتي يزاج الله خير بارة في أهلج عيل ماعليج من البقية
انتي نصحتي فلاتقارني حياتهم مع الغير لأن في ناس ربي رزقهم بر الوالدين وإن شاء الله إنك منهم
والمحروم من حرمه الله باب من ابواب الجنه
فعشان الغدا اطبخي من الليل وخلي الخدامه تسخن للوالد غداه او لما تردي من الدوام
أو طبخي له شيء خفيف واكسبي أجر في أهلج دون ماتناظري في خواتج
وصدقيني هالبر بتحصليه بحياتج وآخرتج
في هالدنيا قدمي النصح للي يواجهون مشاكل أو حياتهم غلط لأنه هذا اللي بيدنا واللي مابياخذ بالنصيحة
بيندم وقت مايفيده الندم
موفقة
ما شا الله على امج و ابوج كيف متحملين
و الله هالزمن زين ان الواحد يتحمل عمره و يالله عياله
انا اجوف دام اختج اتيكم التجمع خل ريلها يحط عياله عند امه و خواته هم أولى
و الله حتى لو هي مبتلشه بعيال ريلها تراه اختيارها و لازم تتحمل نيجه قرارها بس بالمقابل أهلها مالهم ذنب
الله يسهل عليكم .
اختك تحتاج حد يقعد معاها قعدة وتفضفض كل شي بقلبها وترتاح ساعته حتهداء اما اللحين تمر بوضع يخليها عصبية وتريد تحل الوضوع لكن مش عارفة كيف
حاولي تطلعين معاها مكان هادي وحطي االنقاط بالحروف
والله يسهل عليكم
الله يهدي الجميع يارب
موفقه