آخر اخباري وايد اتحسنت عن قبل الحمدلله :)

السلام عليكم
شخباركم خواتي؟
اكيد اغلبكم تذكروني وتعرفون قصتي ويا اكتآب بعد الولادة ومعاناتي النفسية الصعبة لدرجة وصلت مرحلة التفكير بالانتحار من كثر اليأس والعياذ بالله لني ما كنت في حاسيتي من تأثير الحبوب المدمرة والمهدئات اللي كانو يصرفونها لي من الطب النفسي في مستشفى حكومي!
نصييحه أي وحده يمر عليها هالشي عقب الولادة أو أي وحده من اهلكم ولا ربعكم لا تفكرون تروحون عند دكاتره وتاخذون حبوب لأن اكتآب بعد الولادة فترة مؤقته وتعدي مهما طالت ومهما كانت الحالة شديدة لأن هالحبوب دمار العمر كله! أم ربيعتي من 27 سنة تاخدهن من يوم ربت في بجرها لين الحين ومن نفس المستشفى اللي عطوني..
نحن محتاجين توعية أثناء فترة الحمل عن الاكتاب والتغيرات النفسية والفسيولوجية بعد الولادة و كيفية التعامل معاها لأن ما كان عندنا فكرة اصلا خصوصا البجريات الصغار ! المفروض تكون فيه دورات ومحاضرات وكتيبات خلال مراجعات الحمل لأن هالمرحلة خطيرة وحساسة وتصيب 15% من النساء بعد الولادة بدرجات متفاوتة وانا اللي شفته و مريت فيه مب شويه الله لا يقدره علی أي وحده يارب
عند الأجانب قبل الولادة يروحون يحضرون كلاسات متخصصه في كيفية التعامل مع البيبي والتغلب علی اكتاب بعد الولادة و الضغوط النفسية والتأقلم مع الحياة اليديدة وحتى كيفية الولادة الطبيعية والقيصرية والنتائج اللي تترتب عليها و تكون الوحده مستعده من كل النواحي اما نحن نهتم بالاستقبال والكشخه وترتيبات المستشفى وملابس البيبي والماركات والجلابيات الدانتيل و الاطقم والنتيجة المأساة اللي مربي فيها!
كنت وايد خوافه ميته خوف وانا سايره المستشفی و اتبهدلت اتعسرت ولادتي بهدلوني في مستشفی الأموات الرحم مول ما يفتح عندي غير 1 سم كم يوم مرقديني الطلق يزييييد بشكل فضييع ومصممين ع الولادة الطبيعية مب راضين يدخلوني عملية ويشوفون حالة الفوبيا اللي انا فيها بس ما يقدرون هالشي للأسف خلوني لين ما دخلت حالة هستيريا من كثر الصياح والخوف والألم والفحص الداخلي كل ساعة خلاص اتخبلت عليهم قمت اصارخ وأصيح واضحك نفس الوقت و اخربط واهاذي واسبهم وارافس و أقوم من السرير اشرد عنهم و اجلع الوايرات و يردوني بالغصب و يعطوني أبر مهدءات و مسكنات قوية في الوريد و كمامة الأكسجين عشان ادوخ و يهدوني ومصممين ع الولادة الطبيعية لين ما نشف الماي كله عن البيبي دخلوني قيصرية !!
و ما كنت مستعده نفسيا للعملية ولا أعرف شي عنها نهائيا ولا اتوقعت أن ولادتي بتكون قيصرية و عقب ما طلعت مصدومة من ألم الجراحة و إني ماقدر اتحرك و كل ما أكح ولا أشرق أحس تطلع روحي و يوم حركوني عقب العملية هاي بروحها معاناة ثانية وكلها عوامل أثرت في دخولي حالة الاكتاب الحاد والشديد لدرجة اني ما كنت اكل أبد ولا أرقد بالأيااام ولا اكلم حد وطول اليوم صياح و احوط فالبيت ومنعزله بروحي ومالي خاطر في شي واهملت نفسي و بنتي و نشف الحليب و نزل وزني 10 كيلو و شحبت واصفريت قالوا خلاص بتموت آخر شي و عقب 20 يوم ودوني حق دكتور نفسي بطلب مني وبدأت قصة الدمار ويا الحبوب النفسية والتفاصيل ذكرتها في مواضيع سابقة …
المهم اني عانيت واااايد لين ما قطعت هالحبوب لأن بعضها كانت إدمانية وتاثيراتها الانسحابية وايد قوية بس الحمدلله اني اتخلصت منها بإرادتي لأن صدق الدكاتره النفسيين اللي عندنا المفروض يعالجون حيوانات الله يعزكم ما يعرفون شي غير الأدوية بجرعات فضيعه ماشي جلسات نفسية ولا طرق علاج حديثه !
حاليا كملت شهر تقريبا من قطعت هالسموم والحمدلله أرقد بدون حبوب اللهم لك الحمد والشكر وأحاول أعيش حياتي بس بعدني تعبانه وكل شي ماله طعم لا الأكل ولا النوم ولا الزيارات ولا الطلعات ولا الشوبينغ ولا السينما ولا السفرات مع اني اسوي هالاشياء كلها أحاول اجاهد نفسي و أقاوم الأفكار السلبية بس بدون أي متعه أحس اني ميته من داخل و مشاعري متبلده كافي أي انفعالات ولا احاسيس حتی تجاه ريلي اما بنتي بديت شوي أحس بالأمومة معاها بالتدريج أحس ان هي اللي بتردني للحياة فديتها و بروحي اجابلها واعابلها
بس تعبانه لاني متشتته أحس مافيني تركيز ولا اقدر أتذكر شي ومافيني طاقة أتعب من أي مجهود وماقدر أتذكر وهالوضع متعب وحتی ويا ريلي ماشي علاقة زوجية بس اتابع ويا دكتور نفسي اجنبي يعطيني نصايح وارشادات ويدعمني وهو ضد الادوية وقللي حالتج كانت ما تحتاج اصلا حرام انهم عطوج بس انتي قوية ومميزة وايد و فعلا راقية وهي مرحلة موقته بتعدينها بالتدريج خلال 6 شهور وبتتغلبين علی كل شي و بتردين مثل ما كنتي واحسن أن شاء الله
و الخبر الحلو اني حصلت وظيفة الحمدلله و مسويه بزنس بسيط اشغل نفسي و ناويه أكمل ماستر بإذن الله ومستمرة ع الحجامة والعسل الطبيعي و فيتامين دال …
انا إيجابية .. انا متفائلة .. انا احب الحياة
بعد 5 سنين اشوف نفسي واقفه ع المسرح أوقع كتابي الأول و أقول الآن انا دكتورة جامعية و أم ل 3 اطفال و هذي هي تجربتي مع اكتاب بعد الولادة ^_^

وعليكم السلام ورحمة الله تعالى وبركاتة..
الحمد لله على سلامتج وتوكلي على الله والله بيفرج همج
نصيحة صغيرة لا تظهرين اي شيئ جميل بحياتج للناس سواء بالواقع او هني قلت
هالكلام من واقع ما كتبتي في مواضيعج السابقة واتوكلي على الله وحصني نفسج وريلج وبنتج

نبينا محمد صلى الله علية وسلم اللهم امين يارب العالميين

حبيبت قلبي فرحت لج
يشهد الله اني اعتبرج احت لي ودعيت لج من كی قلبي في بيت الله الحرام
حبيت موضوعج وكم التفاؤل فيه يارب عساج فهالحال واحسن دوم
وربي لايبلی مسلمة بهالاكتئاب

الحمد لله على سلامتگِ
عزيزتي ،،، طهور بإذن الله ،،،،
عزيزتي ثقي بأن الله معگِ ،،،،لا تقولي
لا أستطيع ،،،، و لكن قولي سأفعل هذا بإذن
الله و حوله و قوتهِ ،،، كوني قويةََ من أجل إبنتگِ
و أهلگِ و زوجگِ ،،، أنصحگِ بقراءة سورة الملگ،،، قبل
النوم ،،،، و ثقي بأن هناگَ رب كريم ْ لا ينسى عباده ،،،،،
اهتمي بإبنتگِ ،،، حفظگِ الله و رعاگِ ،،،،،

جميلة جدا روح التفاؤل التي عدت بها
اعجبتني لحظة الانكشاف امام الذات ومرحلة قبل وبعد
في اعتقادي انتي قمتي بمرحلة مهمة جدا : انج عدتي للحياة بكامل ارادتج
عدت للحياة وبايدج

عودة العلاقة بينج وبين زوجج هي بداية الشفاء التام

الحمدلله ع سلامتج وشخصيتج القويه وطاقتج الايجابيه

وبليز اول ما ينزل كتابج خبرينا عشان ندعمج ونشتريه ونسويلج ماركتنق

ماشاءالله يا راقية احلى كلام قريته الصبح ومبروكة الوظيفه حبيبتي تستاهلين كل خير