السلام عليكم يا امهات …
اشحالكم …. ؟؟
بغيت اعرف مثل ما هوه مبين من العنوان ,, فـ اي سن تدخلون عيالكم الحضانه .. وبعدين الكي جي 1 ؟؟
انا بنتي عمرها الحين سنتين و3 شهور ,, عقب 7 ايام بتكمل سنتين واربع شهور …
افكر اوديها الحضانه على شهر 12 ,, لأني في شهر 1 بربي ,, وهيه واااااايد متعلقه فيني ,, وتغار علي وايد من كل حد ,, وما شاء الله عليها حركيه وشقيه وعنييييييييييييده .. مسيطره علي انا وابوها بعد ,, ما تخاف مني ولا من ابوها …
اليوم عاد رحت وديتها الحضانه قلت بجرب وياها ,, وخاصة انه بنت اختي ف الحضانه ,, بنت اختي اكبر عنها بسبع شهور ,, وديتها ع الساعه 11 وعيبها ويلست وياهم .. ما صاحت ولا يت صوبي انشغلت وياهم ,, وتميت اتمشى ف الحضانه قلت اكيد بتصيح وبتدورني .. تميت تقريبا ساعه اشوفها ما صاحت وعادي يالسه وياهم …
وبعدين طلعت م الحضانه وخليتها ,, والحمد لله تمت وما صاحت .. وركبت وي بنت اختي ف الباص ,, وراحت وياها بيتهم …
بس الحين يوم أسألها بتروحين باجر السكول ,, تقولي لأ 
واقولها بتروحين ف الباص تقولي لأ ,, ما اعرف اكمل وياها اوديها ولا توها صغيره ؟؟
وما ادري ليش احس ضميري مأنبني >_< لأني من صغرها انا اربيها بروحي ,, انا م النوع اللي اوسوس .. يعني ما اخلي الشغاله تقرب صوبها ابدا ومالها اي علاقه فيها ..
وف الحضانه اغلبهم فلبينيات ,, يعني كأني ما سويت شي >_< بس المدرسات بريطانيات مسلمات ,, ومدرسة العربي والدين عربية …
وخوالي بعدها ما فصخت الحفاض ,, يعني هم بيبدلولها ,, ومن اللي سمعته عن طريق المناديل المبللة ,, وانا من فتره طويله مودره هالطريقه يعني لازم ادخلها الحمام كرمتوا واغسلها كل ما ابدللها ….
ما اعرف واااااااااااايد محتاره ,, واليوم حسيت اني بعاني وياها بسبتي انا ,, تعرفون ليش ؟؟ احس يعني خيفانه عليها ومنحبطه ,, واحس اني بعاني وياها ف الكي جي 1 دام انا من الحين جيه ,, يعني مب متصوره اني اوديها مكان واودرها .. مب عارفه كيف اوصللكم اللي ف بالي >_<
قولولي هالسن زين الها ف الحضانه ؟؟ يعني ادخلها ولا شو الراي .. من خبرتكم ؟؟
وشي ثاني .. اصلا متى المفروض يدخلون اليهال كي جي 1 ,, اختي تقولي من سن 3 سنين يقبلونهم .. صح ؟؟
اللي عندها خبره وتجربه يا ليت تفيدني لأني محتاره ومنحبطه …
ولد اختي توه من يومين مكمل 3 سنين .. ومن بداية هالفصل كانوا مدخلينه pre-KG
وبنوتة اختي الثانية نفس الشي .. بس هي أكبر بـ 3 شهور تقريبا …
عالسنة الياية انشـالله KG1
سنتين و4 شهور حرام أحس توها بيبي =(
بس لو الوضع بيكون صعب عليج ويا البيبي اليديد … اممم تودينها أحسن!!
وهي أكيد بتتأقلم خاصة ان بنت خالتها وياها فالحضانة ^_^
وعن الحفاظة وباجي التفاصيل … انتي تفاهمي ويا ادارة الحضانة وفهميهم عالطريقة اللي تبينهم يتعاملون وياها …
وهم أكيد يودون اليهال الحمام هناك!! ما بيتعايزون عن بنتج ^_^
هلا اختي بنوته ,, تسلمين ع الرد …
خوالي ف شهر 6 بتكمل الــ 3 سنين … قلت خل اوديها من الحين علشان تتعود ,, وبعدين بييني بيبي ثاني اباها تنشغل عني ,, ويبالها وقت لين تتعود وانا بعدين ما بفضالها مثل الحين …
بالنسبة لسالفة الحفاض الحمد لله استفسرت ,, وطلع يودونهم الحمام كرمتوا …
باجر بعد بوديها وان شاء الله خير … بجرب وياها اسبوع وعقب بقرر …
بس المشكله شكلها ف الماما >_< انا يعني …
خيفانه عليها واحاتي واوسوس ,, واحس خوفي هذا كان بيكون مثله لو كنت بدخلها كي جي 1 ..
الله يعين وان شاء الله خير ……
وين الباجيات خبروني عن تجاربكم ,, وفي اسن تدخلون عيالكم الكي جي 1 ؟؟
انا نفسج محتاره ولدي الحين سنتين و4 شهور وانا حامل وانا وااااااااااااايد متعلقه فيه يعني انا اللي دوم وياه فعمري ماخليته عند الشغاله او حتى عن اهل ريلي
الله يعينا
الله يعينج اختي …
ترا الحمال هوه اللي يجبر الوحده تفكر فـ جيه .. وبعدين منها يتعلمون ,, بدل تضييع الوقت ف الشطانه والشقاوه خلهم يتعلمون من صغرهم احسن …
وانا مثلج اباها تنشغل عني ,, لأني عقب بحس عمري مضغوطه بين طفلين ,, ع الاقل فتره الصبح تنشغل عني وافضى للبيبي ولا بينهد حيلي …
حرااااااااااام والله ادخلونهم ف الاعمار حتى لو كنتي بتربون انا بنتي يوم ربيت كان لها سنتين واربع شهور مع انها وايد متعلقه فيني بس خليتها اتحب اختها دم اخليها اترضعها او اتيب لها المصاصه وساعات اقول لها انا بسير الحمام خلي اختج عندج كنت احسسها انها هيه الكبيره ولازم اتخاف ع اختها الحين بنتي عمرها 5سنين والله لو اختها شي عورها اتم اتصيح عليها انتوا فكروا من هالناحيه لازم اتقربونهممن بعض مش تبعدونهم
بنت الاسياد ,, كلامج صح الغاليه محد قال شي …
بس بعد اليهال لازم يتعلمون ,, مب سالفة انا نبعدهم عن بعض …
الياهل لازم يدخل الكي جي بعمر الــ 3 سنين ونص مثل ما هوه معروف ,, وبعض الروضات الخاصه تقبل من 3 سنين .. بدل يلسة البيت والشطانه والركيض احسنلهم يروحون يتعلمون ,, وترا هالسن المناسب للتعليم …
بنتي ان شاء الله بدخلها الكي جي السنه اليايه ,, لأنها ف شهر 6 بتكمل الــ 3 سنين …
علشان جيه ابغي اعلمها من الحين ,, ابغيها تتعود وتطلع وتختلط باليهال لأنها وايد متعلقه فيني ,, وهالشي مب لمصلحتها ,, عقب بعاني وياها ما بترضى تهدني .. خل تتعلم من الحين ان في ناس ف الدنيا غير ماما >_<
الله يعينا ع تربيتهم وتعليمهم التعليم الصح ,, خاصة الحين التعليم كل ما ياه ويصعب ..
تسلمين ع المرور الغاليه وكل حد له وجهة نظر ^_^