سعر دهن العود في الهند

انا راده من الهند قبل كم شهر وهالاسعار قبل كم شهر
بالنسبة لمحلات بيع العود ودهن العود عندج واايد منهم المشهورين هريس واجمل والمدينة وان شاءالله ماشاءالله وعبدالرشيد
انا مريت عليهم كلهم ماعدا عبدالرشيد
أجمل مووول ما ينفع ولا تفكرين تروحين له كل العالم تسير له ترا كل دهن العود مغشوش ماله ومخلوط معاه عطور وكحول
أحسن دهون عود عيبني من ناحيه ثبات الريحه وجمال الريحه وثقل دهن العود تحسينه اصلي مب مخلوط معاه كحول فهو عند ان شاءالله ماشاءالله وارخص واحد بينهم كلهم على فكرة
خذي الكمبودي والأميري من ان شاءالله ماشاءالله
الكمبودي ما يكلف وايد اتوقع حسب ما اذكر التولة ب3000 روبية عطانا يعني مال 180 او 190 درهم (قبل كم شهر الدرهم ب16 روبية ) كل ما خذتوا أكثر بيعطيكم خصم حلو ونحن شحنا وايد من عنده
أما الأميري فهو أحسن وأغلى أنواع دهن العود التولة حسبنا لها بعد عصاااار ومكاسر ب 16 الف روبية يعني ألف درهم لكن الله حق انها خباااااااااااااااااااااااااااال حطيت شوي منه بايدي لكن تمت مال يومين ونص وهنااك نغسل ونشتغل ونعقم ايدنا كل ساعه وتمت ريحة الكمبودي مال يومين اما الهندي القديم ما عيبتني ريحته واايد كانت بالنسبة لي قوية (انا احب الروايح الخفيفة فما يازت لي ريحة الهندي القديم) اتوقع تولة دهن العود الهندي القديم بنفس سعر الكمبودي ب3 الاف روبية
بالنسبة للعود الخشب كانت التولة بألف روبية فخذت انا 5 تولات ب 5 الاف خذت عود خشب اميري بعد احسن الأنواع بس ما حبيت مال ان شاءالله ماشاءالله الي عند المدينة كان واااايد احسن منه

أما محلات المدينة الأسعار شوي كانت اغلى
الأميري التولة بحدود 18 الف روبية حلوو كان لكن ان شاءالله ماشاءالله أحسن واقوى وريحته اتم اكثر (هذا تمت مال يومين) عاليوم الثاني خفت الريحة واختفت لكن مال ان شاءالله ماشاءالله قدرت اشم الريحة باليوم الثالث بس خفيفه كانت
الكمبودي ب3500 روبية (يمكن ينقص لج كاسريهم)
الهندي القديم ما اذكر اتوقع بعد بنفس سعر الكمبودي
لكن من المدينة خذي العود الخشب الصراحه روووعه لما حرقناه جنه نحرق لبان من كثر الصمغ الي فيه وريحته روووعه ولا يطلع ريحة الخشب المحروق لانه رطب خذت عود خشب اميري حسب لي ال5 تولات ب6 الاف روبية شوي أغلى عن ان شاءالله ماشاءالله لكن احسن منه بواايد بالخشب بس دهن العود ان شاءالله احسن

هريس
الأميري ب 22 الف مب لهناك حلو بس بنفس كواليتي المدينة اتم الريحة مال يومين عاليوم الثاني تخف وتختفي وسعره واااااايد غالي
باجي الاشياء ما استمتها من عنده لاني اوريدي كنت ماخذه من المدينة وان شاءالله ماشاءالله

شوفي هذا رايي وتجربتي وانا اعرف بدهون العود والعود والعطور بشكل عام واعرف اذا خالطين به كحول او عطور ثانية لكن الدنيا أذواق وممكن الي ياز لي ما ايوز لج فاحسن شي تسوينه وهذا اانا الي سويته لما سرت هناك مريت على هالمحلات المشهورة واول 3 ايام ما خذت شي منهم ابدا بس اشم واخذ تسترات واحط على ايدي واطلع واتم خلال هاليومين اشم الي على ايدي والتستر (التستر عبارة عن قطنه ماسحين بها دهن عود) خليهم وياج وتمي شميهم خلال كم يوم عشان تعرفين اذا تخف الريحة او تتغير لانه بعض دهون العود تكون مخلوطة باشياء ثانية اول ما تشمينها حلوة لكن عقب من تبرد تقلب ريحتها لووعة وبعدها شوفي انتي شو عيبج وخذيه ولما تردين للمحل مرة ثانية المفروض يقدر هالشي ويسووي لج خصم حلو لو عندج حد بيسافر وياج سيروا ضربة وخذوا كمية كبيرة يطلع لكم خصم حلو

كلفتني تولة الأميري مع تولتين كمبودي وتولة هندي قديم و10 تولات خشب عود اميري 3 الاف درهم اماراتي

ونصيحة اخيره لما بتسيرين الهند لا تخردين ربابي هندية من هنا خردي بس 300 درهم ربابي والباجي خرديهم دولارات امريكية لانه:
1- هناك الدولار وااايد غالي ولما يتخردين الدولار لروبية يطلع لج بيزات أكثر عن لو تخردين الدرهم لروبية يعني الألف درهم يطلع لج بحدود ال400 دولار هال400 دولار لما تخردينها روبية يطلع لج 270 روبية زيادة عن لو خردتي ألف درهم لروبية على طول
2- كل المحلات يتخبلون عالدولار ويقبلونه واهم شي الفنادق
3- ما تحتاجين تحشين جنطتج ربابي واوراق نقدية وش كثرها والبوك طبعا ما بيسكر يبالج بوك عود
4- اذا زادت البيزات ورديتي الامارات بالسلامة بتزيد عندج دولارات بتردينها لدرهم من غير ما تخسرين شي لانه الدولار من العملات النادرة الي يبيعونها ويشترونها بنفس السعر تقريبا (هيج الايام اشتريناه ب 3.6 وبعناه ب 3.59 يعني تقريبا نفس الشي ما خسرنا شي مول) اما الروبية اذا زادت عنج بتخردينها هنا بخسر وما بتييب لج قيمه من جذا لا تخردين ربابي وايد الا شي يكفيج للتاكسي والبقشيش نحن صرفنا الربابي عالبقشيش والتكاسي عقب لاعت جبدنا من التكاسي صرنا نروح ونرد بسيارة الفندق مع سايق الفندق سيارة نظيفة ومكيفه والسايق مهندم ومرتب ومعلم الأدب ما يتفل لج وهو يسووق يارباه كانت تجربه وسفره لاعت فيها جبدنا لكن اضطرينا نسير عشان علاج وحسبوا لنا الساعه ب60 او 70 درهم اماراتي ضافوه لفاتورة الغرفة باجي مشترانا كان بالدولار او حتى الدرهم يقبلونه

ونصيحة اخيره اذا بتحجزون في قصر الهند تراااااه لووووووووووووووووووووووووووووووووووعة لانه بيلسونكم بالأبراج الغرف مستهلكه ورطبة ومعفنة والله ما رمنا نرقد 3 ايام من الريحة المعفنة ريحة الرطوبة الا اذا سكنتوا بالقصر نفسه وحجزتوا سويت عقب طلعنا مع انه كنا حاجزين 5 ايام ودافعين البيزات خلينا البيزات تولي وسرننا حجزنا بتريدينت سيروا تريدنت هذا فندق 5 نجوم ونظظظيف نفس فنادق الامارات ال5 نجوم نت ببلاش ويفتحون لج غرفتين على بعض والغرفة ب750 درهم تقريبا نفس سعر غرف قصر الهند الي يحسبون لج النت بالساعه عساهم القحط وماشي موكيت الأرضيات خشبية ما مثل قصر الهند ويا موكيتهم المعفن والرطب