بدل الروحه للصالونات والتعب وبدل مانطيح تحت يد وحده ماتفهم شي في البشرة وتخربها لنا، هاي الطريقة الصحيحه للفيشيال تقدرين تسوينها في البيت بروحج، كل اسبوعين او اكثر اعتقد كفاية حتى مانتعب البشرة وبعدين ماعتقد حد بيهتم ببشرتج وبيعاملها برقه وبيشتري لها أحسن انواع الكريمات غيرج، بسم الله نبدأ:
نحتاج الى:
غسول منظف للبشرة حسب نوعها – كريم مقشر حسب نوع البشرة – ماء دافي وفوطه وجه – قناع كريمي حسب نوع البشرة – كريم مرطب حسب نوع البشرة ايضا.
1- تنظيف الوجه:
باستخدام اي نوع غسول للوجه تحبينه ويناسب بشرتج وبالنسبة لبشرتي جافة جدا استخدم لها ميلكي كلينر
وبالنسبه للي بشرتهم دهنيه او مختلطه ممكن تجربون كلينك عندهم جل غسول ممتاز للهانوع
من البشرة.
2- مقشر البشرة:
انا استخدم مقشرGrapseed Facial Scrub من The body shop
هو بصراحه خفيف ويناسب جميع انواع البشرة وريحته حلوه، نوزعه على الوجه كامل وطبعا نترك منطقة العين وماحولها ونسوي مساج بحركه دائريه بشوي شوي اذا كانت بشرتج حساسه ونركز على منطقة الانف والجبهه للي يعانون من البشرة المختلطة، استمري في التدليك لمدة 5 دقايق ولما تحسين ان السكرب بدا يجف اغسلي الوجه بماي دافي وشيلي كل اثار الكريم.
3- الة البخار:
بعد ماغسلنا الوجه من كل اثار السكرب الحين نستخدم ألة البخار تنباع في كل الصيدليات ولها عدة ماركات كلها جيدة
نعبيها ماي وننتظر لحد ما البخار يبتدي يطلع ونخلي الوجه مقابل لها بس نحافظ على مسافة مناسبة لأن البخار ممكن يسبب حروق لاسمح الله من شدة الحرارة، بالنسبة للبنات اللي ماعندهم هالجهاز ممكن تيبين اناء فيه ماي حار وبنفس الطريقه وممكن تحطين فوطه على راسج عشان ماينتشر البخار في كل مكان ويبرد الماي بسرعه
تمي في هالوضعية مدة 5 دقايق، ممكن الاستعاضة عن هالخطوة بعد بأنج تغمسين فوطه نظيفه بماي ساخن وتحطينها على ويهج
وتكررين هالحركه 3 مرات، بس انتبهي لا يكون الماي وايد ساخن.
4- القناع:
للبشرة الدهنية يفضل استعمال قناع ذو اساس طيني او clay-based face mask اما البشرة الجافه فاستخدمي hydrating gel or cream mask. وأنا بشرتي جافة استخدم Wise women ماسك من The body Shop
نفرده عالبشرة ونتجنب منطقة العيون وماحولها ولا نسى الرقبة بعد ونخليه مدة 10 الى 20 دقيقه حسب مامكتوب على ارشادات كل قناع، وبعدين نغسل الوجة بماي بارد حتى نسكر المسام ونشيل كل اثار القناع ونجففه بلطف.
5- الكريم المرطب:
بعد غسل الوجه في الخطوة السابقه نحط الكريم المرطب اللي انتي دايما متعوده تستخدمينه كل يوم، أنا عن نفسي بعد بحث وتجربة وتعب بسبب بشرتي الجافة وايد استخدم Clarins مرطب البشرة اليومي.
وانشاءالله تكونون استفدتو من الموضوع واللي استافدت تدعي لي.
