الابرة سببتلي تشنج في العيادة،والحمدلله عل الصحة

بغيت أخبركن عن الحالة اللي صابتني أمس ، والحمدلله إني الحين بخير بعدما حسيت باني خلاص بموت ، والموت حق ، السالفة إني أمس كنت صايمة وكان عندي موعد عند الدكتورة ………….. ، وصلت عندها قبل المغرب وسجلت اسمي وعقب طلعت لين ما يوصل دوري ، وقت المغرب فطرت على عصير وتمر ، وعقب رديت العيادة ، وكل شي تمام ، دخلت عندها وكلمتها عن الألم اللي سببته لي الإبرة
( تنشيط بويضات ) كنت ماخذتنها يوم السبت ورجعت أمس الأثنين عشان المراجعة ، قالتلي ما يخص الابرة بالألم ويمكن هذا شد عضلي ، وقالت بتعطيني شراتها وحدة وبعد نوع ثاني يسرع في التنشيط ، يعني ابرتين ، وأنا أقولها بتعب لأني أتألم قالتلي ، روحي وخذي حمام حار وبندول ، قلت أوكي وما خبرتها إني كنت صايمة وما فطرت عدل ( هاي الغلطة الكبيرة ) انزين خذيت الابرتين وكان عندي ولدي ، واتصلت لريلي عشان ينتظرنا وطلعت أبغي أسير صوب المصعد عشان أنزل، وقتها حسيت الدنيا ادور فيني ، وما كنت أركز في شي ، احساس فظيع ، عقب قلت لازم أقاوم عشان ولدي وأرجع العيادة ، وصلت لين الباب ومسكته عدل عشان ما أطيح ع الأرض ، وعقب وصلت لين داخل وزقرت ع الإخت ( يزاها اللخ خير كانت يالسة وساعدتني ) يلستني ع الكرسي وقتها حسيت بهبوط فظيع ، وكنت أبغي أطيح ، قلتلهم ما أقدر أيلس أبغي أرقد ، والممرضة ترجع راسي ع وراء ، وعقب دخلوني ورقدت ع السرير ، وبدت حالة التشنج الله لا يراويكم ولا يبليكم ، أحس أصابعي صابهن مثل الشلل ، الحمدلله على الصحة ، وجسمي يرجف من لساني لين ريولي ، وويهي قالت الدكتورة صار أصفر ، وقامت الدكتورة تصفعني وترش علي الماي ، ومرة تسقيني ، ما قصروا ، وريلي يتصل وردت عليه الدكتورة ، طبعا هو زاغ وصعد ويوم شافني اتصل بالاسعاف ، والدكتورة تقوله ما في داعي بتصير أحسن ، هي خافت ، وأنا أرتجف وأصيح وزغت على إيدي ، وتخيلت إني أتم ع الحال تحكم في أطرافي ، والله كانت ليلة صعبة وعيالي حليلهم زاغوا ، طلبلي ريلي عصير وحليب وشربته ، وكان ريلي معصب ليش ما عندهم حتى كرسي متحرك أيلس عليه ،وقامت الدكتورة تقولي ها نقص كالسيوم وطبعا خبرتها عقب إني كنت صايمة وما فطرت عدل ، وقالتلي ليش ما قلتيلي ، أنا طبعا ما حطيت في بالي إن هذا كله بيصيرلي ، وعقب راح التشنج ورد ويهي طبيعي ، بس تم الألم في ريولي ، وطلعت عقبها ، وحليلهن الحريم أخرت دورهن ، وعطلتهن ، إن كانت وحدة منهن تقرأ الحين كلامي فتسمحلي ، وبالنسبة للحرمة اللي ساعدتني أقولها يزاج الله كل خير ، والمهم عقب روحنا البيت وتم راسي يعورني لين الحين ، اسمحولي طولت بس بغيت أخبركن تجربتي