خواتي دوووووووووم مايضبظ وياي المجبوس كل مااسويه يستوي مثل العجين
اقصد العيش اطبخ الدياي وكل شي اوكي بعد ماانقع العيش في ماي احطيه ع الدياي
واصب ماي لين مايكون فوق العيش بشوي واحط الملعقة اذا وقفت يعني كمية الماي اوكي
واذا طاحت انقص من الماي جربت هالطريقة بس ماشي فايدة
كل مااشوف احس ان العيش مااستوى ارد اصب عليه ماي وفي الاخير يستوي مثل العجين
وخاصة اخر الجدر 
والله اتفشل لمن اسوي مجبوس وفي الاخير مااحد ياكل 
بليز ساعدوني والله خاطري اسوي مجبوس مليت من العيش اللي اسويه نفس الشي كل يوم
بليز بنوتات ساعدوني واللي عندها بهارات حلوة ياليت تكتب لي اسمائهن والله يوفقكن 
شوفي فديتج المكبوس بالذات ما تحطين له شغلات وايده يعني مثلا ابتعدي ابتعاد كلي عن معجون الطماط والبهارات تكون بكميات قليله
ام الماي خلي العيش زايد عن الماي شوي وخليه على نار هادية ينطبخ واذا حسيتي العيش ما استوى زين تقدري تصبين مقدار فنجان ماي ترى عادي وراح يضبط وياج ان شاء الله بس المهم لا تحطي ابد معجون طماط ترى هو يلبك العيش
مشكورة الغالية بس ماتلاحظين ان المجبوس دوووم لونه احمر
كيف بيكون له لون من غير معجون طماط ؟
المشكلة اضيف بس يكون واضح انه مب مستوي وارد اضيف وفي الاخير ياخراشي يصير عجينة عيش
المعجون يخليه يلبك استخدمي طيب المعجون بس اخلطية بماي قبل لا تضيفينه يعني يكون خفيف جدا لان كنت كل مرة احط معجون يصير مثلج لغاية ما استغنيت عن المعجون ويكون لون المكبوس على لون الابهارات يعني مب شرط احمر
خطأأأ كبييييير أختي انك تزيدي الماي عن العيش لاحظي حبوبة ان الدياي بيكون تحت العيش فبالتالي ياخذ مساحة من الجدر لكن الصح انك تخلي العيش اعلي من الماي و تسكري الجدر زيين و اتركيه علي نار هاااادية جداً و لا تفتحين الغطا كل شوي
و انا الصراحة احب اسويه في الفرن علي حرارة هادية و اغطيه بفويل و اسوي فيه شوية ثقوب بسيطة
و الخطأ الثاني لا تقلبي العيش أبدا أبدا اثناء التسوية اتركيه لين يستوي و بالأخير لما تفتحي اذا حسيتي انه يحتاج ماي رشي بالملعقة رشات خفيفة و سكري مرة ثانية و اتركيه عالنار الهادية عشر دقائق اخري و سكري النار بعدها ولا تفتحي الا بعد ربع ساعة اخري بيكون استوي علي البخار الناتج من الحرارة و في نفس الوقت يكون هديت حرارته شوي لأن لو غرفتيه و هو كتير ساخن ممكن تتكسر الحبات و تعجن
و نصيحة لكي اختي طريقة الملعقة هاي الصراحة فاشلة لأن العيوش أنواعها تختلف و بالتالي بيختلف مقدار الماي اللازم لتسوية كل نوع
اما البهارات عادي (ملح – فلفل – هيل – قرفة ) ما يبالها شي مخصوص بس اذا سويتيه بالدياي زيدي عليهم الكاري و الزنجبيل و اذا باللحم زيدي القرنفل و جوزة الطيب
و قبل كل شيء سمي الله قبل لا تبتدي بأي طبخة و جددي النية انها خالصة لله و ان شاء الله بتضبط معك
أتمني أكون أفدتك
دعواتك لي بالشفاء أختي
دمتي بصحة و عافية
للرفع
أنا الحمد لله سويت مجبوس ومن أول مرة ظبط على طريقة منال العالم..اسم الوصفة كبسة الدجاج بالنخي أعتقد لكن سويتها بدون نخي..وطعمها روعة..بالنسبة للرز..كل كوب أرز يحتاج كوبين ماء أو كوب ونص حسب نوعه..شوفي شو العيار الأمثل للرز اللي عندك واستخدميه في كل الوصفات..بالنسبة للمجبوس هاي الوصفة فيها معجون طماطم على فكرة ما يخصه بتعجين العيش..لكن عشان يطلع نثري..عيار الماي هو الأساس جربي مثل ما خبرتج..(إذا سلقتي الدجاج بالماي وبتحطي العيش في نفس الماي قيسيه بالأول كم يطلع وزيدي ماي أو نقصي حسب العيار للي تبينه بعدين حطي العيش) ..الماي لازم يكون يغلي بقوة بعدين حطي العيش وقلبي..وخليه يغلي على نار قوية لين يصير الماي بمستوى العيش غطي الجدر وخليه على نار خفيفة اخف شي نص ساعة تقريبا (حسب كمية العيش)..شوفي الوصفة في اليوتيوب نصيحة..صارت معتمدة عندي في العزايم ونتريا البشارة