كارهة نفسي من هالحالة صرت أكره قلبي ودي أقفله وأرتاح

أنا بنت ناضجة ومتأخرة في الزواج، مشكلتي قلبي تعلق بإنسان معاي في الدوام، وهالشخص عرفت ان منفصل عن زوجته مب ساكنة وياه، وعنده عيال لكن بدون طلاق رسمي، المشكلة أني لا إراديا انجذبت لأسلوبه وتعامله الراقي واهتمامه فيني ، ومرت فترة طويلة يعني تقريبا سنتين أو 3، لكن لين ألحين ماحس ان فيه منه أي مبادرة أن يتقدم لي أو يفكر فيني كزوجة، وأنا كارهة هالحالة أللي أنا فيها من الوسواس والتفكير، وعارفة انه هالشخص ما ينفعني من ناحية الطبقة الأجتماعية والمركز الأجتماعي من ناحية الأصل والفصل، ، أولا عنده 4 عيال ومب مستقر لا متزوج ولا مطلق، وحالته المادية شكلها متوسطة واقل يمكن لان ساكن مع اهله، يعني لو فكر وخذني ما بيوفرلي الأشياء اللي انا كنت اتمناها وانحرمت منها في بيت اهلي مثل السفر والكشتات وخاصة ان راتبي مب عالي وبحتاج في المستقبل زوج يسندني مب انا ال اصرف عليه، وبعد أحس ان مب من النوع اللي يصرف يعني مب كريم يعني من ملاحظتي الدقيقة له وبعد لاحظت ان ما أييب طاري عياله اللي عرفت انهم ما بين بيت اهله وبيت اهل زوجته ماحس مهتم فيهم وايد . لكن رغم هذا يمكن بسبب تعاملي المستمر وياه يوميا قلبي تعلق فيه واعرف ان هالشي غلط لكن مب بيدي، كارهة نفسي لان وصلت عمري لدرجة ان هالشخص لو تأخر او غاب عن الدوام يصيبني قلق نفسي وأوسوس وأفكر، وكله خايفة اني أيي اليوم اللي اسمع ان هو ارتبط بحد او رجع لزوجته (مع أن لو رجع لزوجته بفرح له لان اهون عندي من ان يرتبط بحد وانا جدامه) يالسة أدعي يوميا ان أيي نصيبي قبل ماسمع هالخبر اللي احس بيقطع قلبي وبيجرحه، ماعرف شو الحل مب متحمله نفسي ولا قادرة أركز في شغلي ولا في حياتي، اتمنى أتزوج وأنساه لان للأسف قلبي أرتبط بإنسان أحس ان مول مافي تطور فحالته يعني مافي أي دليل او كلام يدل ان بيتقدم لي، وحتى لو تقدم بدخل في سين وجيم مع اهلي لان ما بيوافقون من ناحية اختلافات بين عايلتنا وعايلتهم في المستوى الأجتماعي، يعني مافي شي بيشجعهم يقبلون فيه خاصة ان مب جامعي ودرجته الوظيفيه مب عالية، وراتبه منخفض وعنده عيال ومب مستقر ولا يملك بيت ، يعني مافي شي بيخليني أقنعهم فيه، ماعرف شو أسوي المشكلة ان قلبي مب راضي ينسى او يفهم ان هالأنسان ما ينفعني فشو فايدة التعلق هذا والقلق والتفكير فيه، صدقوني انا أحس ان خوفي كله من اني أسمع خبر ارتباطه لان اعرف ان بيجسيني هم وحزن وبنكسر لانها استوت فحياتي قبل سنين ومابا أرجع اكرر لكن القلب التعيس هذا ما يتعلم ، واصلا بدون ما يستأذن القلب فجأه يتعلق ، شو الحل وليش تفكيري جذي متعبني يوم ان ما ينفعني واني اتمنى الأحسن ليش مب قادرة أنسا هالحالة، مابغي اتريا لين ما ينكسر قلبي وأطيح في صدمة ثانية.

الله يكتبلج اللي فيه الخير اختي
انا اقول لاتعلقين امال كبيرة بالزواج منه لكل الاسباب اللي ذكرتيها
وبعد من رايي تشغلين نفسج بأي شي عشان لاتمين تفكرين فيه يعني ملي وقتج بأي شي
بس لاتخلينه هو شغلج الشاغل بتتعبين اكثر وبعد ارضي بالنصيب وباللي ربج كاتبنه سواء رد لحرمته ولاخذ وحدة غيرج عادي كل شي وارد مب معناتها انتي فيج عيب ولاناقصنج شي بالعكس كل شي نصيب وانتي ماتعرفين وين نصيبج موفقة اختي والسموحــــة

ربي ييسر لج الخير

هالانسان مـــــــــــــــــــــول ما ينفعج اختي

بالتوفيق ما قلت لج كل هالكلام الا لان قلبي عليج والله ..

الله يكـون في عووونج اختي

الله ييسر امورج يارب

الله يسر أمورج ,,

اختي كل باين جدامج مثل الشمس ! وعشو محطيه آمال ؟؟ عقيه ورا ظهرج ولا تفكرين به طول .
الله يهطيج مرته اللي هيه أم عياله معلقنها وانتي شو تتريين منه باجر ؟؟ بياخذ منج اللي يباه وبيفرج شرات ما معلق أم اعياله ، الغاليه فكري فعقلج موب بقلبج ، والله بيكتب لج اللي أحسن منه ان شاءالله ،، والحل الوحيد انج اتغيرسن مكان شغلج يعني تبتعدين عنه