قصة ولادتي الغريبة والغير متوقعة

السلام عليكم ورحمة الله وبركاته

شخباركم خواتي العزيزات والغاليات

أولا : حابة اشكر كل وحده باركت لي على الولادة

ومثل ما وعدتكم اني اكتب قصة ولادتي عشان تستفيدن من تجربتي

الله يسلمكن انا الدكتورة عاطتني موعد ولادة من 27-10- إلى 1-11-

وانا تعبت شوي في شهري الثامن في رمضان لانه مريت بظروف مع الوالدة مسكينة بس مرت على خير ولله الحمد هذا طبعا كان في رمضان

ومن بداية الشهر التاسع في نهاية رمضان كنت احاول امشي شوي كل يوم وعقب العيد بعد امشي
وكانت دكتورتي تنصحني بالمشي وعطتني تمرين اسويه كل يوم عشان يوسع الرحم وينزل البيبي

وكنت بعد احاول اسوي هالتمارين كل يوم

نسيت اخبركم شي انا في ولادتي الأولى ولدتني الدكتورة بعملية قيصرية لانه على قولتها البيبي نازل بويهه …….

وكنت ادعي من عرفت اني حامل للمرة الثانية انه الله يسهل علي هالمرة واربي طبيعي ما تتخيلون يا بنات كيف كنت خايفة بس اتوكلت على رب العالمين ودايما ادعي واصلي استخارة انه الله سبحانه يسهل علي الولادة في ساعة منسية واتكون فالليل وانه الله يسهل لي دكتورة زينه وقت الولادة

والحمدلله الله سبحانة ما خيب ظني لاني كنت متيقنة من الاجابة

الحين يا يوم الولادة " 18-10- "

انا عادة كل جمعة اسير بيت اهلي نجيل عدهم " يعني نتغدى مع بعض " واروح بيتي فالليل وكنت سايرة يوم الجمعه "17-10- " عدهم ومن الصبح وانا حاسه بآلام واقول في خاطري عادي هذا منان يسير ويرد لاني كنت احس فيه يوميا من دخلت شهري التاسع ….. بس الغريب فيه هذاك اليوم انه يروح ويرجع كل ساعه وبعد اقول عادي …وسرت السوق العصر اتشرى ويوم رجعت البيت شربت جرفة

" على فكرة الدكتورة نصحتني اشرب كل يوم كاس جرفة من دخلت التاسع وفعلا انا سويت اللي قالت لي عليه "

نرجع لموضوعنا الله يسلمكن شربت جرفة وقلت لخدامتي اتسوي لي دلة زعتر مادري كنت حاسة انه فيه شي

عقب المغرب اتصلت لدكتورتي وخيرتها بالآلام قالت لي تعالي الساعه عشر يوم بسكر العيادة عشان ما يكون فيه زحمة

وسرت الحديقة عقب المغرب امشي وامشي والآلام كل ما ياها تتقارب واتزيد وانا اتويع ورديت البيت وقمت اشرب من الزعتر الين الساعة عشر سرت العيادة

والحمدلله كانت خاليه ……. شوي وفحصتني الدكتورة وقالت لي ما شاء الله تبارك الرحمن الرحم عندج فاتح 4-5 سانتي …. وان شاء الله الليلة بتربين …..بس اسمعي كلامي وسوي اللي اقولج عليه عشان اتربين طبيعي ان شاء الله ….قالت اول شي بعدلج راس البيبي عشان ينزل اكثر فالحوض وينزل طبيعي " طبعا لا تتخبرن عن الألم " لكن الحمدلله على كل حال

قالت لي اسمعي …… سيري البيت ولا اتسيرين المستشفى اصبري وخذي دش دااافي وعقب اشرب زيت الخروع مع عصير برتقال ….وامشي امشي لا تيليسن ويوم بتشوفين الألم زااااد وما تقدرين تتحملينه هذيج الساعه سيري المستشفى واذا تعبتي او صار اي شي لا سمح الله كلميني وتعالي العيادة

وقالت انا باتصل المستشفى بشوف منوه مناوب عشان اوصيهم عليج ومسكينه فعلا اتصلت ووصت الدكتورة المناوبة علي

وانا سرت البيت وسويت اللي قالت لي عليه اتسبحت بماي دافي وحسيت بخيوط دم تنزل

وشربت زيت الخروع وقمت امشي وامشي

صح نسيت كنت اكل تمر بعد وشاله ورقة فيها ادعية واقرى الادعية واكل تمر واندعيت حق كل البنات انه الله يسهل ولادتهم ويرزق كل محرومة من الحمل بالذرية الصالحة ان شاء الله

والآلام كل ما ياها اتزيد وانا بموت من الويع كل ما اييني الطلق امي مسكينه مرت اخوي يمسحون ظهري وعقب حسيت اني ابا اسير الحمام من مفعول زيت الخروع والله من الالم كنت احس ماقدر اقوم واطلع من الحمام وانتو بكرامة
وكملت امشي وامشي والبيت كله على اعصابه وريلي فدييييييت روحه في عالم ثاني من كثر ما يحاتي حتى مب قادر ييلس

وعلى الساعه وحده خلااااااااص احس ما فيني حيل لانه الطلق كان كل ثلاث دقايق واتصلت حق دكتورتي وخبرتها قالت خلاص سيري المستشفى

طلعنا انا وامي ومرت اخويه وريلي واخويه

والله من التعب والالم " احس ظهري منكسر من النص " ومرت اخوي وحليلها تمسح ظهري في السياره وامي تدعيلي

وصلنا المستشفى وريلي فديته يركض وياب لي كرسي ويلست ودخلوني غرفة الفحص ودخلت علي الدكتورة وفحصتني قالت ما شاء الله انتي خلاااااااااااااص ولااااااااااادة بسرررعه دخلوها غرفة الولادة …..

دخلوني غرفة الولادة وقالت لي الدكتورة كل ما ييج الالم ادفعي عشان ينزل ويطلع الراس لانه ما اقدر اعطيج اي طلق صناعي او حتى اضغط على بطنج عشان انتي كنتي ولادة قيصرية قبل

وانا كا ما اييني الالم ادفع بس ماشي فايده

والشي الغريب يا بنااااات انه من دخلت غرفة الولادة برد الويع اتخيلو حتى الدكتورة اتقول لي شوه صار انتي يايه ولادة والحين برد الويع …. بس انا بصبر عليج فترة وبعطيج فرصتج كاملة

وفعلا وحليلها صبرت علي وانا بصراحة حسيت باليأس لانه كل ما ادفع يقولون لي ادفعي بنفس واحد
والله العظيم يا بنات يوم ادفع احس بويهي بينفجر بس بعد يقولون والله الراس بعده ما نزل والساعه ثلاث الفجر جلبتني الدكتورة على اليسار " على اساس ينزل البيبي اسرع " وطلعت قالت بروح القسم وبرجع والسسترات يقولون لي انتي بيدج اتساعدين عمرج لازم تدفعين صح عشان ينزل راس البيبي وانا بمووووووووت اقولهن دخلوا امي بشوفها …شوي ودخلوها واشوفها واصييييح هي ومرت اخوي واقولها مااااااااااااقدر خلااااص وهيه وحليلها اتصيح واتقولي اتحملي يا ميه الله بيساعدج وعقب يت الدكتورة وطلعتهم ويت دكتورة ثانيه واتقولي يالله حاولي عشان ما نولدج قيصرية وانا سبحان الله كان هذا الدعاء في اذني " اللهم يا مخرج النفس من النفس ويا مخلص النفس من النفس خلصني " واندعي في خاطري" يارب انته انبتت هذا الجنين فيني وانته برحمتك اتساعدني وتخرجه مني "

يارب …..واتذكر ولادتي الاولى ما حسيت بشي لانها قيصريه بس هالولادة فعلا صدق يوم يقولون تطلع روح من روح

والساعه اربع الفجر اسمع الدكتورة اتقول للسسترات خلاص الحين اشوف الراس شوي بتربي ساعدوني

وانا اصرخ يااااااااارب واتخيلو السسترات ثنتين يظغطن على بطني وثنتين عند ريولي مع الدكتورتين يصرخن يالله بوش يالله ساعدي عمرج خلااااص الحين بترتاحين يالله

والحمدلله الساعه اربع وربع طلعت بنوتي القمر الله يحفظها ان شاء الله

واقولهن حطوها على صدري والله يا بنات من حملت وانا ادعي يااااارب لا تحرمني من هاللحظه اللي اشوفها فيها بنتي او ولدي وهو يطلع مني …. وكل ما كنت اقرى قصص البنات ادعي يارب لا تحرمني من هاللحظة والحمدلله ربي كريم وعطوف وما حرمني من هاللشي

وشوي وطلعت السستر اتبشر اميه ومرت اخوي وريلي واخواني

وشوي ويابو بنتي وحطوها على صدري فدييييييييييت روحها وعقب طلعوها حق قوم اميه برع

وشوي ويت الدكتورة عشان الخياطة طبعا اتعور واتحسين فيها بس مب مثل ألم الولادة …..سبحان الله هيه اتخيط وانا اسمع أذان الفجر واحمد الله

طلعوني وكل حد يصيح من صوب اميه ومرت اخويه وريلي فديته في حالة

اللهم لك الحمد على هالنعمة والله يرزق كل محرومة يا رب بالذرية الصالحة ان شاء الله

سامحوني على الاطاله يا بنات وسامحوني على القصور واكرر شكري لكل وحده باركت لي والله يسهل على كل وحده ان شاء الله واتمنى تستفيدون من قصتي