خطوبة متعسرة . تعالوا خبروني شو الحل؟

بنات شخباركم .. انا عضوة يديده و توني فريش في المنتدى .. و اشتركت لاني حسيت ممكن الاقي الحل عندكم .. السالفه و مافيها الحين بقولها

من فترة شهر يو عرب بيتنا عشان يجوفوني و يتعرفون علينا و جيه .. و الريال جافني في مكان كنت اشتغل فيها شغل " بارت تايم " يعني مال اسبوعين جيه و بعدين مليت و طلعت .. يعني بس اكسب خبره لانه بعدني ادرس. المهم انا ما كلمته ولا شي الا في حدود الشغل و الادب .. و هو عرف اسمي و سار و سوا سيرج عني و قالي يا فلانه ( كان اخر يوم اداوم فيه) انا كلمت امي عنج و و قلت لها اني اباج وجيه .. المهم انا استحيت و قلت له " انزين انا شو اسوي" قالي بس اباج تعطيني رقم بيتكم او امج. المهم عطيته و انا زايغة .. و رديت البيت خبرت امي .. و امي قالت بنجوف و بنتريا اتصالها.
الحرمة اتصلت على طول ثاني يوم ..و حددت يوم في نفس الاسبوع و امي ما قصرت و يو بيتنا .. طبعا انا كنت وايد مستحية و صدق زايغة .. معنا اول مرة ايون و مافي شي رسمي بس يابو هدايا و اغراض وايده وياهم. المهم يت الام و اخته العودة و اخته الصغيرة و مرة عمهم. كل شي كان تمام .. يلستني عندها و تمت ترمسني و ادقق فيني و تمدحني مديح. كل شي حلو لين الحين ؟
بعد ما سارو خواتي و حرمه اخويا تموا يقولون انهم وااااايد رافعين خشومهم .. و الالماس من فوقهم و تحتهم و مادري كيف وما كان داعي ايبون الي يابوه انا حسيت انه ما يخصه و انا ما جفت منها شي ولا من خواته. امي ما عطيت رايها بالمرة ..
بس نبذه بسيطه نحن من عايلة عاديه لا هي غنية ولا هي فقيرة .. يعني الحمدلله بنعمة و مب ناقصنا شي .. و هو من عايلة وااااااااااااااااااايد غنية بزايده و هو بجرها .. فهلي حسو انه هم مادري كيف ؟

بعد ما طلعوا .. اليوم الثاني الام اتصلت وانها حبتني وايد ومادري شو و يبون الريال ايون عشان تعارف بعد .. يعني كل شي مال بسرعه بسرعه .. فأمي قالت لهم ابوها الحين مب في البلاد وهذا الصدق .. يوم بيرد بخبركم ..

الحين نتريال الوالد .. و امه كل يوم تتصل تتسلم عشان بس امي ما تنساها .. وخواتي و حرمه اخويا الي قاهرتني مادري ليش تعطي رايها يقولون انهم مب اوكي ومادري شو ..

انا مرتاحه للريال و كان محترم في الدوام وياي و مع غيري و عمره ما حاول انه يختلي فيني .. بالعكس يوم يجوفني مع حد اي يكلمني و جيه .. وصليت استخارة و حلمت حلم ارتحت له .. بس مادري شو اسوي مع خواتي ..

خبروني شو تحسون؟

تطورات في الموضوع ..

المشاركة الأصلية كتبت بواسطة salamh

اختى الناس شكلهم شارينج والريال مب راعى سوالف وياج على طول وخطب يعنى دخل من الباب مش من الشباك شو الغلط فى الموضوع اسمحي لى يمكن خواتج وحرمة اخوج غيرانين منج ومدام الحرمة تتصل ى امج وتسلم عليها شكلها شاريتج هى وولدها وانسانة محترمة وعند وعدها توكلى على الله ووافقى ومن ايجى ابوج خبرية بالموضوع وخليهم يجونكم وخلصوا الموضوع اختى الناس شكلهم طيبين والحمد لله الله مغنيهم وانشالله بيريحونج لالا تسمعين كلام حد والله يوفق

انا بعد اقول جيه .. بس هم قالوا يمكن يرفعونا خشمهم عليج و من هالكلام .. وانه للحين الريال هم ما جافوه ..

امي اعتراضها الوحيد انه الولد من سني .. بس هي قالت انه راي و راي ابوي هو المهم ..

المشاركة الأصلية كتبت بواسطة دلوعة الغرام

عسى الله يوفقج و يتمم لج على خير و ييسر امورج لا تعبين نفسج اذا الريال زين محد يقدر في ويهج و رايهم ما يهم اهم شي رايج و راي امج و ابوج
عسى الله يتمم لج على خير و لا تنسين تخبرينا بالتطورات اول باول

فديتج تسلمين عالرد ..

و لله كريم ..