السلام عليكم
مرحبا يا امهات الحلوين ..
انا اريد اوقف المرضعة عن بنتي و احس ان هالمرحلة بتكون اصعب من تدريب استخدام الحمام …
هي الحين عمرها سنتين و ثلاث شهور .. و ما تأكل وايد و اصلا ما حاسه تاكل يا دوب تتطعم الاكل .. عشان جذي حاسة اني موضوع المرضعة بيكون صعب ..
من عمر سنة انا احط لها حليب طازج في المرضعة مب البوردة ..
و ما ترقد الا و المرضعة في حلجة و احيانا تنش فالليل تصيح تبا المرضعة .. و احيانا تطلب حليب فروالة فالمرضعة فترة النهار ,,(انا صراحة غلطت ما عودتها ع الكوب )
و سالت زميلاتي فالدوام قبل قالوا لي عااادي عقب بروحها بتخلي المرضعة .. ومفيد حقها الحليب
بس اللي صار طلعت لها سوسه صغيرة في ضرسها ولما وديتها العيادة قالت لي الدكتورة .. هذي ما اسوي لها شيء بهذا العمر لكن سبب السوسة هو ان المرضعة ف حلجها فالليل حتى لو اغسل اسنانها ما بتستفيد ..
شووو اسوي
أنا جربت الملح عند ولدي وبالمرة نفع
بالليل كان يريد يشرب قبل لا يرقد بس تعود على الكوب وما تعبني الحمدلله..
عوديها على الأكواب الي فيها جي الوان و مصاصات من فوق
تكون أشكالها غاوية انا وقفت المرضعة عن بنتي في عمر السنتين و نص
كانت تأخذها بس قبل النوم
بس صدق بهدله
عوديها ع الاكواب الحلوة اللي تلفت انتباها
و اشتري لها طقم صحون و اكواب خاص فيها و مميز و يا حبذها لو تخلينها ف بوكس اونها هدية
و صدقيني بتتغير بس يبغي لهم حد يمكر عليهم ها اليهال
نفس ولدي
الحين سنتينوش4 شهور ومايفارق المرضعه حتى لو فاضيه بس صارلي اسبوعين احاول امنعه
ما اخليه يشوفها عشان ينسى واشتريتله كوب عليه حيوانات احط فيه مقدار بسيط من الحليب
ولما ينش ف الليل اشربه الحليب بالبيب مثل لاكنور و بفضل الله نساها