السلام عليكم ورحمة الله وبركاته
قريت موضوع في احد المنتديات عن الاخطاء في البناء وحبيت انقل الموضوع للاستفاده ..
كل وحده تكتب الغلطه الي غلطتها في بناء بيتها او امور غفلت عنها وكانت مهمه حتى الي بيبني يتفادى هالغلطه ويتعلم من هالاخطاء ..
او حتى معلومه مهمه في البناء والنصايح للي بيبنون بيتهم ..
و ان شاء الله نستفيد من بعض
موفقه اختي
وانا ببدأ …
نحن حاليا نبني والله يسهل وانخلص ان شاء الله … لكن للاسف الشديد اني ما سويت ستور في البيت وهذا جــدا جــدا مهم …
نصيحه للي بتبني ان شاءالله انها ما تغفل عن هالنقطه
هلاااا خواتي
نصيحة للي يبنون بيت العمر ركزو ف الخارطة التفصيلية للبيت
مش الرسم التخطيطي العادي ..لا قصدي التفصيلي الدقيق اللي يفصل لج كل زاوية وكل ركن ودريشة وباب و …الخ
في اشياء وايد احنا نغفل عنها ..وننصدم منها ع الواقع
لأان الكلام اللي ينقال للاستشاري مرات يكون غير عن المثبت ف الاوراق
ونصيحة ثانية شوفوا وين بيكون الجهاز الرئيسي لموزع الكهرباء
انا غلطة بيتي انه ياي في الصالة الرئيسية وف جدار مهم
يعني تقدرون تخلونه تحت الدري أو ف احد الممرات أو صالة جانبية
أهم شي ما يكون ف مكان واضح ويخرب عليج عقب أفكار الديكور
وبعد أي شي بتاخدونه للحمامات تاكدو انه ووتر بروف حتى الاضاءة الخارجية
لأنه اذا ماكان ووتر بروف بيخترب على طووووول
والشي اللي أتمنى يكون ف بيتي وندمت اني ما سويته اللي هو
"اللفت" الاصانصير
الصراحة مهم ف البيت ولو ماتسمح الميزانية الحين سوي له ترتيب حق المسقبل
بحيث تخلين له مساحة من البيت وما تتوهقين عقب ف التكسير
^_^ موضوع حلو بالتوفيق
ندمت على اني سويت الصالة المفتوحة من فوق والاستشاري صمم انه يكون في اعمدة عشان تمسك الصالة صح انه شكلها حلو بس الاعمدة مخربة
المشاركة الأصلية كتبت بواسطة فوفو فوفو 
والشي اللي أتمنى يكون ف بيتي وندمت اني ما سويته اللي هو
"اللفت" الاصانصير
الصراحة مهم ف البيت ولو ماتسمح الميزانية الحين سوي له ترتيب حق المسقبل
بحيث تخلين له مساحة من البيت وما تتوهقين عقب ف التكسير
صدقج نحن مسوين مكان حق اللفت … لكن الغلطه ان المكاان مواجهه للصاله .. وهالمكان خذ من مساحة الصاله وضيقها شوي …
لكن شفت بيت مسوين فيه الاصانصير في زاوية البيت ومكان مرتب وحلو ..
فالي بيركب ينتبه لهالنقطه …