اشحالكن حرييم ، مشكلتي هي الملل ، نحن عايلة ما نطلع مكان و ما تشوفنا الناس ، كله في البيت يدران بيتنا ملت من ويوهنا ههههه ، اقدر اقول هالسبب انه نحن اكثرنا بنات و ما نسوق و ابوي عنده اشغاله من يوم نحن صغار جي لا الناس تعرف عنا ولا نحن نعرف عنهم مع نفسنا ، حتى جي مرات ما اقول ما بعرس بسبت هالشيء، المهم ما علينا الحين خلصت جامعة و ماجزة من من 3 اسابيع تقريبا والله ملانة طفرانة مليت كل اجازة نفس الشيء نعيد الروتين ياخي طفرة حتى اني خلاص ابا الجامعة اتي عسب اقضي ع الملل و من الملل احس جي استوي سخيفة و للاسف قمت اكلم شباب بس سوالف و ضحكك في الانستقرام مب اتصل عليهم اقضي وقتي اعرف بتقولي ها مب سبب عشان تكلمين شباب ترا ناوية اترك هالسوالف . المهم قولولي اشياء اسويها اشياء تحمس جيي ، و يزاكم الله خيررر
تمت الموافقة
انتي حددي اهدافج حتى تقضي ع الملل
خذي لج ورقة وقلم وحطي هالسؤالين
1- كم عمري ؟؟ 2- ماهي اهدافي ؟؟ ( زواج – احصل على البكالوريوس مثلا ………. )
3- كم هدف حققته في حياتي للان ؟؟ ( اكتبيها كتابة لاتكتبي حققت ثلاث اهداف لا ، لازم تجوفي شنو الاهداف اللي تحققت )
4- هل انا راضية عن حياتي للحينه ؟؟؟ 5- هل عندي استعداد للتغيير من الحينه ؟؟
6- شو ناقصني ؟؟ 7- كم ساعة فاضية فيها ؟؟
من خلال هلاسئلة جاوبي عليها بروحج واكتبي كل اللي بداخلج
صدقيني راح تعرفي ان في امور وايد ماحققناها ونتمناها وعندنا مواهب مانميناها
من هني بتتغير حياتج ان شاء الله للافضل
والنت ماشاء الله ماخلا شيء
نمي عقلج وفكرج الحياة ماتختصر في زواج وبسس
كوني علاقة طيبة مع اخوات عاقلات طيبات
خذي لج ساعه احفظي سورة من كتاب الله وحفظي خواتج
استثمري وقتك بالمفيد
قراءة قرءان
الاهتمام بنفسك تابعي مايناسبك
قراءة كتاب
تواصل مع اخوات طيبات للتناصح وتكوين علاقات طيبة
وقبل كل شيء الدعاء … بدون الدعاء كل الادوية ماتنفع 
والله يوفقج
وعليكم السلام والرحمه
حبيبتي الشباب مب عذر ترمسينهم نصيحه من اختي انجي بنفسج قبل لا تدمنين هالدرب وعقب يصير شي ما تبينه تخيلي الله كشفج جدام اهلج ؟؟ وبعدين فكري انه ممكن تموتين وانتي ترمسين واحد من الشباب كيف بتجابلين ربج؟؟ استغلي رمضان في التوبه
بما انج طالبه جامعيه ماشاء الله وين ربيعاتج؟ تواصلي وياهن خليهن يزورنج فالاجازه تولفي ويا بنات عمومتج وخوالج واذا حابه تتعرفين ع ربيعات عندج هني سيدات الامارات متروس انتقي وحده زينه تعرفي عليها تقضين وقت وياها … مثلا انا كنت كاتبه مره تعليق ع وحده كانت تشكي من الملل تقريبا نفسج وسبحان الله يتني خاص وطلبت تتعرف علي وضفتها وصرنا ربعات من كم سنه اعرفها
طبعا اول تاكدت انها بنت واخلاقها زينه انتبهي لهالنقطه
ولا انج سوي لج بزنس صغير او كوني مندوبه جي تقضين وقتج او اذا يخلونج دخلي دوره تحفيظ قران تتعرفين ع صحبه صالحه ومنها تحفظين قران بينفعج فاخرتج
او انج تستغلين الاجازه تهتمين بنفسج من خلطات وهالسوالف وتقرين كتب تغذين عقلج
اذا الوالد راضي وحده منكم تتعلم تسوق وتقط عنه شي زين جربوا تفاتحونه فالموضوع .
انا عندي الليسن وما أسوق عادي اطلع
مثلا عندنا في عجمان الاشتراك في الأترجة والمواصلات متوفرة وعندهم حضانة أحط ولدي عندهم وانا أراجع تغيرين جو جوفي مراكز التحفيظ وايد بتساعدج تحصلين صحبة صالحة والأغلب فيها مواصلات
لما أسير بيت اهلي الشارجة الحديقة قريبة أسير لها مشي
جوفي في النت أفكار للبيت وغيره ويلسي طبقي أو الأشغال اليدوية انا وايد أحبها
نظفي غرفتج لاتعتمدين ع الشغالة وتعوذي من الكسل و ادخلي المطبخ سوي خفايف وقدميها بطريقة حلوة
لو حبة حمرا في دلة وتضيفين خواتج دووم جيه اسوي يستانسون
تابعي حسابات مفيدة في انستقرام
الواتساب عودي نفسج ترسلين أذكار صباحية تفيدج وتفيد غيرج
وايد آشيا لو فكرتي مابتخلصين
لا تكلمين الشباب.اذا ادمنتي..بتروحين في ستين دهيه…
الملل بين قوسين ( الفراغ)
عدو الإنسان
و خاصة في مرحة الشباب
حبيبتي إنتي في أحلى مراحل العمر استغلي وقتج بالمفيد
مارسي هواياتج
تطوعي في الجمعيات الخيرية او الفرق ما شاء الله موجودين في كل مكان الحين
خذي تدريب في الدوائر الحكومية بتستفيدين وايد و كل الدوائر و المؤسسات عندها تدريب صيفي لطلبة الجامعات
عندج الاعمال اليدوية الطبخ التصميم
بس انتي حددي شو هواياتج شو مواهبج و نميها
زوري ارحامج و جيرانج انتي و خواتج ما فيها شي و اذا اهلج ما تعودو على هالشي الحين رمضان و فرصة حلوة للتغيير و لبدا شي يديد
بالتوفيق