السلام عليكم
انا توظفت جديد وعندي تدريب وراح يحضر لي الموجه اول حصة بحياتي يعني انا ماعمري درست تربية اسلامية درست قرآن وماحد حضرلي والحين راح يحضر لي رجل اول مرة وأنا استحي من الرجال وبس استحي صوتي يرجف فورا وهو يبي يشوف صوتي وادائي اهم شي
ياربي ساعدوني كيف ابدأ الدرس ؟يعني شو الخطوات اللي تقولها المعلمة كي تمهد للطالبات الدرس
بالمختصر كيف ابدأ مالي عارفه؟؟؟وللعلم يمكن ادرس رابع وخامس
الله يفرج عن كل وحدة ترد علي كربتها ويسعدها اللي تساعدني
بسم الله الرحمن الرحيم أختي الغالية كوكو فوفو أنا أشوف بلدج المريخ يعني اللي على المريخ بعد يحضر لهم الموجه!!! أسولف معاج
أهم شيئ لا ترتبكي ولا تخافي واعتبري أنج بروحج بس بالصف أنت والطلاب يعني حاولي أنج ما تشوفي الموجه خليج طبيعية
وأول ما تدخلي أكيد تسلمي على الطلاب وبعدين تسمي بالله وتصلي على النبي وتراجعي معاهم التعليم القبلي يعني تسأليهم شو آخر درس خذناه واسأليهم سؤال أو سؤالين بس أيكونوا سهلين حتى ايجاوبوا معاج وبعدين لازم تسوين تهيئة للدرس اليديد ولو كان عن طريق اللعب وايد بتكون التهيئة حلوه يعني ممكن تسوي كلمات التهيئة داخل بالونات وتخلي بعض الطلاب أو الطالبات ما ادري شو ادرسين!!ينفخون البالونات ويوم تنفجر البالونه خلي الطلاب يجرون الكلمة ويكتبونها على السبورة وبعدين خلي طالب يكتب عنوان الدرس كامل يعني ايرتب الكلمات وحاولي انج ما اتطولين وايد بالتهيئة يعني خمس دقايق تكفي
وبعد ما تكتبين عنوان الدرس والتاريخ على السبورة الحين دور الأفكار اللي هي أفكار الدرس اليديد اكتبي ثلاث أفكار اتكفي ودونيهم على السبورة أو على بطاقات او على شفافية كيفج وخلي الطلاب يقرون الأفكار وبعدين ابدئي بالشرح يعني اشرحي كل فكرة من الأفكار ولا تنسين تعززين الطلاب يعني اللي ايجاوب تعطينه حلاوة او قلم رصارص ….الخ
وبعد تعززينهم معنوي يعني خبرينه بارك الله فيك ممتاز رائع يعني من ها الكلمات,,, وبعد ما اتخلصين الشرح اسأليهم عن الدر س كامل يعني أسئلة خفيفة سهلة وهاي ايسمونه تقويم ختامي !!!!! ولو اتشغلين لهم انشودة بعد حلو يعني يوم تعطينهم ورقة عمل ايحلونها يعني حاولي أنج اتسوين الصف مجموعات وتعطي كل مجموعة ورقة عمل وشغلي الأنشودة ويوم اتخلص أي مجموعة اغلقي الانشودة ان شاء فاهمة عليّ !!
وفقك الله وسامحيني على الإطالة ولو تبين أي شئ احنا حاضرين انعين ونعاون
الله يجزيك الخير اختي الخزامة
طيب انا برأي فكرة البالونات حقت اطفال وانا حدرس رابع وخامس وهالجيل تعرفينهم وايد مكبرين اعمارهم واحس اول مرة قدام الموجه مو حلوة انفخ وافقع بالبالونات …مادري شو رأيك…
أنا حدرس تربية اسلامية طيب عندك طريقة تانية كيف اوصلهم للدرس مثلا يصير تكون قصة أو غيرها مادري علميني وشو المناسب
وأنا بإنتظار المعلمات الأخريات يساعدوني
وينكم يامعلمات التربية الإسلامية
يعتمد على الدرس اذا كان يصير تقولينه على طريق قصه لاتقصرين وخاصه الصغار يحبون الدرس يلي على طريقة قصه اوطريقة افكار متسلسله وسهله حتى يفهمونها ومترابطه حتى يحفظونها بالترتيب وحداري ان طولين عليهم في فكره وحده
فديتج طبقي الموجود في دليل المعلم .. الموجهين هالفترة يقولولج لا تطلعين عن الدليل و الدليل فيه كل الخطوات
صح بتحسين برهبه أول الحصة و خلاف بتنسين أنه موجود ^_^
حاولي تنادين الطالبات باسمائهن لان هذا يدل على انج عارفة كل بنت في صفج .. إذا قدمت الطالبة إجابة صحيحة عززيها معنوياً و ممكن بعد تشترين هدايا رمزية توزعينها في نهاية الحصة عالمتميزات أو اللي شاركوا معاج في الحصة
صح و استخدمي وسائل حديثة في التدريس .. مثل عرض الدرس عن طريق الـpower point باستخدام جهاز الـdata show و تفنني فيه عكيفج .. و الله يوفقج