مشكلتي مع زوجي شو الحل؟؟؟؟ الطلاق و إلا الصبر

خواتي العزيزات
أنا اول مرة افكر اكتب عن مشاكلي في النت
لكن حبيت افظفظ لاني بموت و الله اعلم بحالتي
انا وايد اعشق ريلي وصارلنا مزوجين 15 سنة و عندنا عيال و الحمد لله
وهو يعرف اشكثر انا متعلقة فيه
مرت علينا مشاكل حليناها بينا و الحمد لله مثل كل زوجين
وهو ريال يصلي و يخاف ربه و يحترم الناس
لكن سبحان الله الشي الوحيد اللي ينقصه الناحية الرومنسية
يعني سالفة انه يقولي احبج او يفاجئني بهدية او انه ايقولي قومي بنطلع نتمشي هالشي ما بيحصل
حتى في المناسبات وانا اللي اشتري لليهال و اوديهم مدارسهم
المهم من كم شهر لاحظت عليه تصرفات منها اهتمامه بالعطور و صبغ اللحية و التأخر برع البيت و اليلسة في السيارة يرمس في التلفون و قام ما يطلعنا ابدا والسبب على قولته الدوام
المهم انا عدة مرات قلتله في شي ورا هالسوالف و كان يقولي ما في شي ليش تفكيرج شي
والله يا خواتي ربيت و ما لمسني اربع اشهور و السبب على قولته انه مريض
وهو عموما فيه السكري و الضغط و الكولسترول و انا صدقته
وفي يوم اجازة وهو راقد عدالي ياه مسج الصبح و انا كنت متعودة انه اتيه مسجات من الفجر و عمري ما شكيت فيه او فتحت مسجاته لكن في هاليوم سبحان الله قلبي نغزني وهو قام و قرا المسج و بعدين رقد عدالي
ويوم نش وراح يسبح ما ادري شو اللي خلاني افتح المسج
وانصدمت انه من حرمه لريلي اتصبح عليه
وسكت لاني بغيت اعرف اذا بيخبرني لكنه اتريق و سار ورد بعد فتره و حط الموبايل في غرفة النوم
واتفاجأت انه راد عليها بمسج ايوضح انه بينهم شي
ما قدرت ايود نفسي و الله اني حسيت اني بموت عقب هالعمل ليش و منو هذي و عيالنا
وانا اللي دايما كنت ايلس و اقوله انا مقصرة عليك بشي وهو يقولي لا وما حبيت و لا بحب غيرج
وانا ترا خواتي حلوة وكل اللي يشوفني يتحسبني مب معرسة
ما عرفت شو اسوي زقرته و مسكت الموبايل و قلتله فلان شو ها اللي اشوفه و منو هذي
والله اته سحب الموبايل و ظهر دون ما يشرحلي السالفة
وانا اتصلت على الرقم و اتأكدت انها حرمه لكن المصيبة انها معرسة
المهم ما بطول عليكم لكن كل يوم نتضارب و للحين مرت 3 شهور عرفت منو الحرمة لكن ما رضا ايقولي من متى يعرفها و ليش سوا شي و شو بينهم اكثر من المسجات
و انا اصريت اني اشوف صورتها و الله يا خواتي انها استغفر الله ما اقصد اهانتها و لكن ما فيها مسحة من الجمال
عيل ليش انا حلوة و جسمي مغري ما شي ناقصني و الحمد لله
ليش ايدور غيري
والحين انعرفت جزء من السالفة عن طريقها و زوجي ايقولي انا كاره البيت انت سبب الفضيحة
انا ما سويت شي
شو رايكم انا كنت بسير الها مكان دوامها و بسحبها من شعرها لكن فكرت فيه و ما حبيت افضحه
والوالدة مريضة و ما حبيت ازيد همها و مرضها
وللحين خواتي كل اسبوع نتضارب لان من حقي اني اعرف السالفة و هو مب راضي ايقولي شي
مب قادرة اطلع من البيت
كل ما اشوف وحدة مع زوجها اقول ليش سوا فيني شي؟؟
خواتي شو اسوي امس قلتله اذا تبانا نطلق انا ما عندي مانع
وهو ايقولي اوقفي وياي و اصبري لحد ما تنحل المشكلة ؟؟؟
شو رايكم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
شو أسوي و عيالي (عندي 6) شو ذنبهم؟؟؟؟؟
انتوا اتصدقون اني كنت اطرش له مسجات اصبح عليه او مسجات حب و ما كان يرد علي
واذا اتصلت فيه ايقولي مشغول
والله ان عمري ما دعيت على حد لكني ساعات من القهر ادعي عليها؟؟؟
لا اتقولوا اني مشغوله عنه
لا بالعكس و هو شاهد عل اني مب مقصرة
عيل ليش وهو الريال اللي ايخاف الله ؟؟؟؟؟؟؟؟؟؟؟؟؟

الله يفرج همج يا ربي ،؛

لا اختي لاتطلقين

فكري عدل والله يوفقج ويصلح امورج

اصبري لو مب عشانج عشان عياالج

بس شو بنقوول غيير الله يهدي رياييلنا ويبعد عنهم عيال الحراام

استغفررررررررري

حبيبتي احلى شي بالدنيااا الاسره يعني الزوج والعيااال واللمه ،، والله يلوم اللي يلومج واااايد صعبه الخيانه …
حبيبتي ما بقول لج اسكتي وبنفس الوقت لا تخربين بيتج بيدج ،،، حطي ببالج عزيزتي ..
انتي مب اول وحده ريلها يخونهاااا او يتزوج عليهااا وهي ماينقصهااا شي ،، طبع في اغلب الرياييل والمصيبه لمااا
تواجهينهم يقول لج اناا احبج وانتي ما ناقصج شي ؟؟؟ اوكيه ليش تخوني ؟؟؟ طبعاا ما عنده رد
حبيبتي هذا ريلج وابو عيالج لا تخلين وحده للأسف ماتربت عدل تأخذه منج .. حاربي علشاان بيتج وعيالج الريال مرده بيمل وبيعقل ،،
اصبري الغاليه وتوكلي على الله ورمضاان قريب ودعوت المظلوم مستجاابه ادعي الله يهديه ويسخره لج ولعيااالج
ونصيحه مني اتصلي للدكتور احمد النجاار ،، دكتور ماشالله فاهم وماره عليه حالات وايده اكيد بيفيدج ..
بس انتي لا تشيلين هم ربج كريم وقادر يغير حالج ..
الله يسعدج الغاليه واللي يتوكل على الله ما يخسر …

تفاهمي معاه لاتسكتين له وكلمي الحرمه وذكريها بربها وعقاب اللي تخون زوجها
وبنبهج بشي لاتخيرينا بموضوع طلاقج ولاتصبرين معاه انتي اللي عشتي معاه وانتي اللي تقررين
ابد ماتفكرين بالطلاق لانه هذا موالحل
والصبر زين ان شاءالله ربج بياخذ حقج منهم
وادعي فصلاتك الله يهدي زوجك ويصلحه
اصبري علشان عيالج ترى محد بيتحمل مسؤلية عيالج كثر الابو
والله يكون بعونج