لكل اللي يتساءل عن تخصص Interior Design

بعد ماقريتوا سالفتي خخخخ

لأنه في بنات راسلوني يسألوني عن هالتخصص ويبون يعرفون عنه اكثر

فحبيت انزل موضوع للكل عسب تستفيدون وتعرفون شكثر مهم هالتخصص اللي الاغلب يقول انه ماله مستقبل او انه شي عادي

الاغلب حاط فباله هالتخصص هو عباره عن تزيين المكان من حيث اللون ولا طريقة توزيع الاثاث

طبعا في فرق بين decoration Interior design
الديكوريشن هذا هو يعني تزيين المكان وتنسيق الالوان وتوزيع الاثاث وهالشي مب لازم الواحد يدرسه لأنه اكيد وبلا شك لكل شخص استايله وذوقه الخاص
وما اظن في حد بيعنقش فالمكان وبيقول ديكوريشن خخخخ

امــــــا

الانتيريور هذا التخصص عباره عن تصميم كل شي يخص الاشياء الداخليه
يعني المتخصص بهالشي له الصلاحيه في انه يلعب بجدران الغرف المحلات ووووو بس مايقدر انه يغير الدرايش والفتحات او البيبان لأنه ها بيكون شغل المهندس المعماري المختص للاشياء الخارجيه
بس نحن نقدر انه نضيف او نلغي جدران من الداخل بحيث نشبك او نفصل الغرف او شو ماكان
وطبعا هالتخصص مب يعني سوي شي وخلاص لا هالتخصص يباله ابداع
بحيث انج تطلعين بافكار جهنميه
مثلا لو كان عندنا غرفه صغيره والمطلوب منا انه نحط فيها كذا شي
وطبعا مابيكفي
فنحن علينا التفكير بحيث انه نصمم دزاينات لاثاث بحيث انها تدخل للمكان وماتاخذ مساحه
مب شرط نروح محلات ايكيا ولا هوم سنتر
طبعا نحن يعلمونا انه مانروح هالاماكن الرخيصه والسبب رداءة النوع اللي يستخدمونه
فمثلا بروح اصمم شبريه ويطلع من تحتها التلفاز<<<<مثال
فانا جذي حافظت على المساحه
وفي شي مهم جدا جدا واللي هو
انه نفكر بانواع البناء اللي راح نستخدمها
يعني الصبغ ونوعيته الوانه
الارضيه نوعيتها والوانها
مثلا في اشياء ماتنفع نستخدمها للغرف ونقدر نستخدمها للصاله
وهذا شي لازم نكون عارفينه

حاليا انا اتكلم عن غرفه لكن تخصصنا يخلينا نصمم لمحلات لأستيج كوشات ولا لعرض السيارات او تصميم سيارات من "الداخل"
او فندق ووو اشياء واااااااااااايده محد يتوقعها انه اصحاب التخصص هذا مطلوب عليه يسويها

نرجع لأدوات البناء هني يعتمد على ضمير الشخص
نحن يعلمونا كيف نفهم العميل اهميه هالنوع من هالنوع
اكيد الواحد بيدور الرخيص مب الغالي
لكن لو كان الرخيص فيه مضره نفهمه ونقوله شو عيوبه ووو لين مايقتنع
يعني نحن ويا العميل مب ضده
لأنه لو راح الشخص بروحه ويشتري شي بيقولون له هالخشب وايد زين وغالي نوعيته زينه
هو بيصدق
لكن نحن نقدر نميز الزين من الشين من اللون والشكل وووو
فهني يعتمد العميل علينا بانه نحن اللي نخلص هالمهمه له

بتكلم عن دراستي للي كانت تسأل كم يبالها
فجامعتي زايد نحتاج 4 سنوات من تدخلين الجامعه لين ماتطلعين
تقريبا سنتين للتخصص

واللي تسأل عن الاماكن اللي نقدر نشتغل فيها
اماااااااااكن كثيره لدرجه انه وحده كانت تدرب عند روتنا ولا دناتا مال الطيران
عشان تصمم الطيارة من الداخل

واللي تقول انه اهلها رافضين ومب حابين التخصص

انا واجهت الكثير من الانتقادات والاستهزاءات عشان تخصصي بس يوم كنت ابدا كل بروجكت
كانو ينصدمون انه انا صاحبه هالتخصص بسوي هالشي

ونصيحه للي حاب يتخصص
هالتخصص حساس جدا جدا يعني اي غلطة فالمقاس ترا اللي بتسوينه بيكون مشوه
يعني لو قلتي مقاس الجدار طلع 10,1 فبقول 10 بس
ترا وقت الجد بتحصلين انه في خلل فالبناء
وبعد شي ثاني اللي حابه هالختصص لازم تكون انسانه قد الضغط الضغط الضغط
يمكن الكثير مايتوقع شكثر الضغط
بخبركم عن تجربه صارت لي
كان عندنا تصميم يخت
ومن كثر ما نسهر ونواصل لليوم الثاني
ياني انهيار خخخخخ
والساعه 3 الفجر انا فالمستشفى
حتى الدكتور قالي انتي تعبانه نفسيا بس حالتج ماوصلت للاكتئاب

انا ما اخوفكم لكن ابين لكم شكثر هالتخصص يحتاج له انسان فاضي وانسان قد الشغل

واي استفسار بنات انا فالخدمة : )

ودعواتكم الغاليات انه الله يوفقني فالدراسه ويصير عدد الاماراتيات اكثر من ……… اللي يقصون علينا