قصة ولادتي مع ابرة الظهر ومستشفى النور اليديد .

ولادتي كانت في مستشفى النور اليديد مع الدكتوره ماجده يوم الجمعه الساعه 6:50 الصبح بتاريخ 23-1 ويبت بنووووته حلوه الله يحفظها يارب..

اول شي نشيت يوم الخميس الصبح مع عيالي عشان المدرسه وبعد ماطلعو كنت حاسه بشي غريب مع اعرف شو هو مش ويع بس متملله واحس انه شي بيصير اليوم والي زادني اني كنت مزجمه واحتقان في حلجي..المهم حاولت ارجع ارقد مافي فايده نشيت اتريقت وسرت العياده عشان الزجمه خلصت ورجعت البيت الضحى بس كان مغص خفيف اييني ويروح..يبت عيالي من المدرسه وانا راجعه في السياره حسيت ان الويع شوي قام يزيد..اتصلت بربيعتيه جان اتقولي اشربي خروع اذا زاد معناه ولاده..شربت وبعد ساعتين يعني الساعه 4 بدا الويع يزيد ونزل عليه خيوط دم بسيطه كلمت اربيعتيه جان اتقولي ابشري اليوم ولاده والدم معناه النفس تفتح..تميت امشي في البيت واشرب ماي زمزم واقرا ادعية تسهيل الولاده لين الساعه 6 رجع ريلي من الدوام قلتله يالاه بسير اشوف كم سانتي اذا مش وايد بسير امشي في الحديقه الي عدال المستشغى…سرنا واول ما دخلنا جان يقولولي الي في عنبر الولاده انزلي الطواري وهم بيكشفون عليج هناك اذا فيج ولاده بيحولونج هنيه..نزلنا الطواري وكان زحمممممه جان يحتشر ريلي قالهم والله ما تكشفون عليها هنيه ودوها فوق احنا عيل حق شو حاجزين الرويال نبا خدمه مميزه هب الحرمه تتويع واتقولون اتريو في الطواري واتصلو حق المسؤل ((سواها سالفه هههه وانا ساكته مابا اتكلم قلت مايخصني كفايه الي فيه))

المهم ودوني فوق غرفة الولاده واتصلو بالدكتوره قالت خلاص سوولها الي تباه وخبروني كم سانتي فاتحه جان اقولهم في قابله بريطانيه انا اعرفها اباها اتصلو فيها وفعلا اتصلوبها قالت نص ساعه وبكون موجوده..يت وكشفت جان اتقول من 3-4 سانتي قلتلهم قولو حق الدكتوره لا تيين الحين لاني اعرف اني بطول..قالولها ماطاعت ويتني..هالكلام كان الساعه 8 وشي تقريبا..عقب يوني بيركبولي المغذي ولاني وااااايد خوافه يوم ظربوني الابره انغمى عليه وارتبشو النيرسات والدكتوره فتحت عيني لقيتهم متروعين هههههه جان اتقولي القابله انتي ابره جيه سوت فيج شو بتسوين فينا فالولاده…المهم الويع كان خفيف لين الساعه 10 رجعو فحصو كان نفس الشي قالتلي الدكتوره شوفي الطلق مش منتظم وهذا معناه النفس ما بتفتح اذا على هالوضع شو رايج تاخذين طلق صناعي؟؟ قلتلها انا مجربه في بنتي قبل صارتلي نفس السالفه وحطولي طلق صناعي وبغيت اموووت وبصراحه مش مستعده اعيش هالتجربه مره ثانيه قالت خلاص خذي ابرة الظهر قلتلها اوكي…سارت طلبتلي دكتور التخدير وخبرت ريلي اول شي قالي لاااااا ولو صارلج شي دكتورتج ما بتنفعنا في شي قلتله بتوكل على الله وشوي الا الدكتور داخل مسكه ريلي من يده وطلعه بره وقعد يكلمه قريب ال20 دقيقه وعقب دخل عليه مبتسم قالي اتوكلي على الله..خذت الابره والله ما حسيت بشي وتم الدكتور واقف شوي قالي يوم بتحسين بريولج اتنمل خبريني وقلتله قال خلاص انا بسير وكل ما اتحسين بألم الطلق قولي عشان يزيدونلج الجرعه وركبولي الطلق الصناعي في المغذي…وتميت على هالحال من الساعه 10 لين 4 الفجر منسدحه اسولف مع خواتي وريلي واطالع التلفزيون واقولهم يوعانه ابا اتعشا ههههه متفيجه قالولي ممنوع لان البيبي دقات قلبها اتزيد واذا كلتي بتتنشط زياده وهذا مب زين..شوي دخلت علينا النيرس قالت مدام شو نوع البيبي الي فيج عشان نجهز سرير البيبي عندنا يا ازرق او وردي قلتلها مادري قالولي ولد بس دكتوره وحده قالتلي بنت يعني ماعرف جان يقولها ريلي هاتي الوردي وانا اقوله لاااا جان يقولها هاتي الوردي انا ادري انا ربي ما بيخذلني وبيرزقني الي في خاطريه ضحكت النيرس قالت باييب الاثنين وفعلا حطت الوردي والازرق…

الساعه 4 يت الدكتوره وكشفت جان اتقولي 6 سانتي بس لقت ان المثانه متروسه وطلع هذا سبب ما يخلي البيبي ينزل بسرعه وفضولي المثانه وفتح الماي وقام الطلق يزيد طبعا انا ما احس فيه بس يبين في الجهاز وكل ما احس لو بمغص خفيف اقولهم ويزيدون الجرعه ويروح الالم…خواتي وريلي كانو يتريون اذان الفجر وأذن 5:45 الفجر جان اقولهم لا تسيرون كلكم واحد واحد يسير لا تخلوني بروحي قالولي ويهج مب ويه وحده بتربي الحين خخخخخخ المهم سار ريلي اول واحد وهو طالع اقوله ادعيلي اخلص فيه رقاد ههههه وكل شوي حد يسير يصلي لين 6:15 بديت احس بالويع واقول حق القابله جان اتقولي لين اهنيه وخلاص ماقدر ازيد الجرعه اذا زدتها ما بتحسين بريولج وهذا الي احنا ما نباه..فكرت بيني وبين نفسي قلت خلاص بتحمل انا ما كفرت عن ذنوبي في هالولاده هههههه سكتت وتميت ادعي واستغفر ومن دون وعي كل ما يزيد الويع كل ما يعلى صوتي بالاستغفار والادعيه واشوف الدكتوره خلاص جهزت كل شي وكشفت جان اتقولي 8 سانتي وماشالله احس براس البيبي والحمدلله ما اضطرت تشق ولا شي تمت اتوسع بيدها لين ما نزلت الحلوه بنتي على طول حطتها على صدري جان اتقولي اختيه ولد قلت الحمدلله ويوم شفت ويهها مادري ليش ياني احساس انها مش ولد ماشالله عليها عقب جلبتها اختيه جان اتقولي لاااا بنت مش ولد قلت الحمدلله والشكر…الستاره مسكره وريلي وخواتي الباقيات معاه يقولولي يوم سمع ولد تم ساااااكت ويم سمع بنت اتشقق والضحكه شاقه الحلج ههههههه ومن فرحته فيها طلعت نسخه منه في كل شي…. المهم انا كنت طالبه من الدكتوره خياطه تجمييليه وعلى انها ما شقت اصلن في هالولاده بس سوتلي خياطه كامله…

للأمانه من الاثار الجانبيه لأبرة الظهر انها سوتلي صداع قوي لمدة 5 ايام..ومع ان بنتي اختي سوتها بس الحمدلله ماياها صداع ولا شي بس انا يمكن لاني اصلن كنت مريضه ومزجمه يوم اربي فالزجمه مع الابره سوتلي صداع..