فستان بنتي لثاني يوم العيد بالتور والدانتيل . مع أم خليفة

طبعا خلصت الإجازة وأحين فضيت أحطلكم موضوعي اليديد …. هذا الفستان خيطته حق بنتي ولبسته ثاني يوم من العيد …. وشكله كيوت …. الخامات الي ستخدمتها ( حرير هندي وردي – تور ذهبي – وداتيل ) طبعا بتحتاجين سحاب وجيبون عشان ينفش لفستان وبطانه حرير عادي من نفس اللون . المسألة كلها إبتكار في ابتكار …. يعني أنا رسمت الموديل في مخيلتي وحاولت أطبقه على بترون عادي وأضفتله بعض اللمسات … أخليكم مع الخطوات….

1. رسمت البترون وقصيت على أساسه الجزء العلوي والتنورة من تحت

وهذي القطعة من التور نطبقها على بعض على شكل مثلث ونقصها بشكل دائري من أسفل

2. نبدا نخيط الدانتيلات على الصدر والأكمام

3. نقص التفتة (البطانة) على الباترون أو قياس قطعة الصدر ونمد خط لين الأسفل (طول الفستان المرغوب فيه ) بحيث يكون نفس وسع الفستان من أسفل.

ولا تنسين تقصين الجيبون( مب شرط يكون نفس طول الفستان)

3. بمكينة الأوفرلوك نخيط بداية قصة حردة اليد بخياطة عادية لمسافة تقريبا 4 سم ، و بعدين نزيد شدة الخيوط (تقريبا على رقم تسعة للثلاث خيوط) عشان نحصل على زم في الوسط …وقبل ما نوصل للنهاية ب 4 سم نرخي الخيوط نفس ما بدينا

وهذا بيكون الشكل

4. نشبك قطعة الصدر مع القطع الخلفية من عند الأكتاف

بعدين نثبت الأكمام بالدبابيس ونخيطهن

5. نثبت الدانتيل على قطعة التور ونخيطهم مع بعض بالمكينة

6. نثبت التور من الأمام

والجيبون من أسفل

ونخيطهن مع بعض بمكينة التنظيف (الأوفرلك)

وهذا شكله من الأمام

6. نخيط الجزء الأمامي مع الخلفي من الجوانب بداية من إسوارة الكم لين نوصل لأسفل الفستان

7. نركب السحاب من الخلف

8. نثبت التور من على الأطراف بشكل زم ونخيطه

9. نركب البطانة من الداخل ونخيطها

10. نركب المطاط على اليد مع مراعاة مط الشريط وإنتي تخيطين عشان يعيطج الزم المطلوب

11.نثبت الدانتيل من الخلف عند خط الخصر بشكل مثني ونقص الزيادات

12. نثني القماش عند الذيل ونخيطه ونزين الحاشي بالدانتيل

وهذا شكل الفستان النهائي