حسيت بساعة الموت حد عنده تفسير؟!

صراحة ما عرفت وين احط الموضوع فكتبته هني..

بنات امس حسيت باغرب شي في حياتي… ولين الحين كل ما اتذكر استغرب واقول الحمدالله يارب على كل شي.. انا انسانة عندي شهادات الدنيا ووايد اقرا.. بس عمري ما سمعت بهذا الشي.. وخاطري اعرف اذا حد عنده تفسير او مر بنفس الشي..

امس انا كنت صايمة ايام القضاء.. وفطرت عادي وتميت سهرانة محاضرات واناشيد.. وشوي اذاكر لين الساعة 3 الصبح.. ولاني باصوم اليوم.. قلت خلني اصلي لين الفجر..
دخلت اتوضا.. وحسيت اني لازم اكتب الوصية .. استغربت لاني عمري ما فكرت بهذا الشي.. وقعدت افكر شو وصيتي..بس ما كتبتها..

صليت ركعتين واحس بشعور غير.. ما اعرف اوصفه… وعقب السلام مسكت المصحف وانا خايفة… عرفت بيقين ان خلاص بموت هالساعة .. حسيت شريط حياتي كله مر جدام عيوني.. وفكرت باهلي وكيف اموت ومحد منهم بيعرف الساعة..

بنات الموت كان قريب.. في شي كان على صدري… شي ثقيل.. ما اعرف كيف اوصف.. والاحساس ان هاي ساعتي..كنت خايفة بس احمد الله اني بموت على سجادتي..
وحسيت اني شفت اشياء غريبة.. المدينة المنورة وبيوت الرسول عليه الصلاة والسلام..بس ما شفت اشخاص.. لحظات بس..وما فهمت شو هذا.. تخيلات والا هلاوس.. انا ما كنت نايمة.. انا قاعدة على السيادة وماسكة المصحف؟؟

وما ادري كيف ساعة كاملة مرت..الا واسمع اذان الفجر.. قمت وصليت.. وطحت بنام.. وراحت كل هالاحاسيس.. يعني عادي.. ومن الخوف نمت بسرعة وقمت اليوم بس افكر شو استوى امس؟؟

انا ادور في النت من ساعتين مش محصلة تفسير.. ما عندي امراض الحمدالله وديني عادي ما اقول قوي..
بنات الاحساس اللي مر علي.. يمكن يكون اقوى احساس مريت فيه بحياتي.. كان اليقين.
اعرف ان ساعة الموت اذا يت محد يقدر يردها… واللي الله كاتبله الموت يموت في ساعته.. بس شو اللي استوى فيني ساعة الليل.. انا ما كان فيني رقاد واحلم.. ولا اني سمعت او قريت قصص وتاثرت..
ووايد قمت الليل وصليت عادي..بس ليلة امس.. اتنافض وانا اتذكرها..

حد عنده تفسير؟؟

مجرد وســآويس .. يمكن الشيطــآن يبــآ يلهيــج ..

لا تشغليــن فكرج وآيد واتعبيــن عمرج ..

كلنـــآ بنموت .. وأحلى شي موته وخـآتمه بالوضع الي كنتي فيهـ

على سجـآدة صلاتج وبيدج المصحف ..