انا واختي والحرب العالمية الثالثه

شحالكن خواتي

الصراحه ابا شوركن فسالفتي اختي اللي اكبر عني معرسه وانا وهيه دوم مشاكل صح اننا نحب بعض ونخاف على بعض بس اطباعنا مختلفه وهاللي يسبب المشاكل اختي مشكلتها عنيده وايد وتحب الناس كلها تمشي على شورها وتتحكم فيهم وانا ما احب هالشي انا احب اكون عادي لا اغار من فلان ولا علان عقولت ابويه بارده برود الثلج ما اهتم للشي واختي عصبيه جبريت ما نقدر نقولها شي حتى قبل ما اعرس من كانت تدخل البيت ادخل انا حجرتي وايلس عاللاب ما فيني على صراخها وهيه موول ما يعيبها شي فينا انا وخواتي اللي اصغر عني يعني مثلا نحن ما نحب نلبس عبي ملونه مثلها وهيه ما يعيبها هالشي فينا ونحن بعد نستحي وايد نسير بيتها خاصه اذا عازمه حريم اخوان ريلها نحن مب وايد معاهم فما نختلط معاهم وايد هيه يعني حمياتها عادي يدخلن غرفتها ويطالعن شو عندها وما عندها وانا والله راقده فبيتها شهر كامل كنت استحي منها بشكل فضيع حتى سوالفي معاها عاديه ما احس اننا خوات مثل كل الخوات احس شي حاجز بيني وبينها حاولت كم من مرة اتقرب منها بس ماشي فايده دوم تيلس تعايرني بحمياتها هن يسوون ويسوون مع انهن بنات عمي بس جريئات وايد ونحن امي معلمتنا ما نفرض عمارنا على حد اختي تبانا نكون مطيحين الميانه وايد معاها ونحن ما نحب لان هيه من عرست واشتغلت تغيرت وايد يعني تكبرت شوي حتى من فترة بنت يارتنا ربت تمت تقول انا ما احبهم وما بسير مع انهم ييرانا من زمان والحرمه يوم اختي ربت زارتها ما قصرت بس هيه شايفه نفسها عليهم واذا تذكرتنا وسوت لنا شي تتعمد تخبر عمتها وحمياتها كم دفعت وشو سوت يعني تحرجنا حتى قمنا ما ناخذ منها شي لو نحن خواتها واذا كننا فبيتها كانت وايد تحرجنا جدامهم حتى اننا نرد البيت ونتم نحلف ما بنسير مره ثانيه هيه تحب تتحكم بالناس اللي حولها وايد يعني جنها ريال مب حرمه وانا بطبعي كتومه ودوم ساكته بس اخر مره انفجرت عليها وصارخت عليها مع اني حامل ومب زين بس صدق الضغط يولد الانفجار بخبركم ليش صارخت عليها انا وايد مع امي وكل ما يداوم ريلي ايي عندها ايلس معاهم واختي تشتغل لين الساعه 2 وتسير جامعتها وما ترد لين الساعه 10 فليل وهيه دوم تخلي ولدها عندنا يعني من 7 الصبح لين الليل وحليله ما يشوفها وغير هذا كانت تسير الجيم وكل يوم صالون ومرات تتاخر لين الساعه 12 يعني شو ذنبه ولدها ما يشوفها من 7 الصبح لين اخر الليل حرام قلبي يعورني عليه موول ما تحس ومره كان محموم العصر وتعبان وايد واتصل بها اقولها بشل بشكارتج وبنوديه العياده ما طاعت تخليني قالت انا بيي وبوديه تخاف الرمسه توصل لعمتها وتنازعها انزين مره من المرات اميه يايبه لاخويه اللي فسن ولد اختي لعبه ويوم يا ولد اختي شافها تم يصيح يبا يشلها معاه واخويه يصيح يباها لعبته انزين نش ولدها وضرب اخويه بلعبه مثل المطرقه هيه ويابسه بعد عراسه اخويه تيبس من الصياح انا ما رمت اسكت قلت لها شهاده وعندج وشغل تشتغلين بدال ما اتمين هايته لين اخر الليل ايلسي ربي ولدج ما خلى ما ضاربه وتراه يفطن يعرف انه غلطان تمت تصارخ عليه وانا اصارخ من صوب يعني متفيجه تخق جدام حمياتها شنطتي ماركه مادري شوه وشوفو حنايه فصالون الفلاني وعلاني وولدها مخلتنه ولد البشكاره الصراحه تقهرني تبا كل شي يمشي بشورها بس انا ما بست لها زود خلاص تعبت يعني مره استوا موضوع يخصني وخواتي يعرفن وهيه لا اتصلت لي انا فمول الامارات مع ريلي ما قالت بتصل بعدين لا تمت تصارخ عليه فالتيلفون وانا مما بصارخ جدام الاوادم تميت اصيح وطلعنا ردينا البيت مب شي يقهر والله لو اقولكم خواتي ما يحبنها ما تصدقون اذا فالصاله نخليها اروحها ما نيلس معاها لانها ملسونه وتيلس تعلق على كل حد جنها هيه كامله والكمال لله والناس كلها ناقصه حتى ريلها ما يقولها شي يقرني والله

كيف اتصرف معاها مع ان مره من المرات كننا ايام المدرسه وا نرمس بعض هيه كانت تصيح ليش نحن خوات وا نرمس بعض طبعها يقهرني ما اتحملها

هيه ويوم كنت بايته فبيتها انا كنت دايما اشتري مجله تراثيه وعندي اعداد هيه ما عندها وانا عندي اعداد ناقصه هيه عندها تخيلو عقب ما رديت البيت اتصلت تصارخ تتهمني بسرقت مجلاتها صدق تميت اصيح من الخاطر يعني هذا يزايه مجابله ولدها من الصبح لين حضرتها تشرف

اااااااااااااه تعبت شو اسوي والحين رمضان ياي

شو تبيني اقولج والله اذا كلمتها الوالده قالت انتو تكرهوني وانتي ما تحبيني وانتي وانتي وامايه عشان المشاكل تسكت عنها شو بتسوي بس اخواني كم كلموها ونازعوها بس ما تيبها الرمسه