اللي تبى توفر ادش وتشوف تجربتي الناجحة 100%

مرحبا خواتي اليوم حبيت انقل لكم تجربتي مع التوفير واتمنى انكن تستفيدن منها وبدش في الموضوع على طول ( طبعا في البدايه عدد افراد اسرتي 4 اطفال اكبرهم في سابع ورضيع وانا وريلي وبشكارة وطباخة ودريولية كل شهر كنت اسير كارفور واشتري سامان ماتقل عن 3800 درهم هذا طبعا غير عن النثريات خبز وحليب وخضره بيض ازيد بعض الاشياء على اخر اسبوع يعني اصك 4000 بس كان عندي شعور بان هذا اوفر لان عيالي مب من النوع الاكول بس كنت ما عرف شو اسوي وقررت اني اسوي حل فيبت ورقة وقلم وبدأت اكتب منيو اسبوعي للطباخة عسب اوفر الطلبات بشكل اسبوعي وايب على المنيو وطبعا المنيو كان ريوق وغداء مع شوربة يوميه وغداء ريلي صنف غير لانه عندة السكر يعني اكثر عن صنف وعشاء واول الشهر طبعا اشتري المنظفات والاشياء اللي لازم اتكمل شهر بس اتصدقون كم عرقت معاي طلعت الاغراض 2500 شفتو كم الفرق وهذي تجربتي مع التوفير واذا شفت تجاوب ممكن انزل لكم المنيو اللي سويته بس اللي اباه منكم دعاء عن ظهر قلب بالتوفيق

ما فهمت عليج.
انا مثلج كلنا 7 ماشاءالله مع الدريول والطباخ والبشكاره
وتقريبا اصرف 6 الاف على المطبخ 3 الاف للكارفور و3 الاف للخضره والدكان والمخبز
وفوق هذا احس ما ناكل عيشه عدله شرات الناس هههههههه

ماشالله عليج مدبرة والله…
بس اللي بيته إييونه ناااس وااايد ولازم خضررررة وقهوووه وغيررره ..

2500 شهر كامل؟؟ والله حلو شكلج مدبرة منزل خطيرة

مرحبا اشكر اللي ردن علي واحب اضيف شي اني اول يوم كنت اسير الجمعية اشتري من كل شي 4 او5 يعني نجت والمثلجات او غيرها والمعلبات بالدرزن لكن الحين اشتري على حسب المنيو الموجد في الجدول الاسبوعي يعني كم مرة بناكل دجاج اخذ بالعدد وايد اشياء قننتها وتميت اخذ بالعدد والله اوفر بوايد لانه اول ماعرف وين كانت تسير الاغراض بس الحمدالله انا ما اقصر اشتري كل شي والمنيو منوع وايد ومثل ما قلت لكم اذا تبون ممكن انزل لكم اياه

والله زين ما شاء اللع عليج
عاد انا وريلي والخدامة بس اصرف في الشهر 3500 كيف عاد مادري هههههه
حطي لي المينيو خل نشوف كيف تمشين امورج
والله احترت الصراحة

كيف يعني
تحددين شو اللي بتاكلينه طول اليوم ولا طول الاسبوع وعلى اساسه تشترين الاغراض؟