الحمد لله ربيت بسلامة

بخبركن بتجربتي الاولى في الحمل وكيف كانت لين ماربيت

الحمدلله رب العالمين

هدا اول حمل لي يعني حامل فلبكر … كنت ثجيلة من بداية حملي وكل احد يشوفني فبداية الحمل يقول الله يعينج في الاشهر الاخيرة. يعني مشيتي تغيرت وايد صرت امشي شرات البطة وماقدر امشي وايد ونزل على دم في الشهر الثاني والحمدلله عدت هالفترة بعد ما ترقدت 4 ايام فالمستشفى وبعدين طبعا الحموضه دوم عندي والترجيع لين اخر شهر وفي الشهر الثامن كل ما اراجع العيادة يقولون انتي عندج الضغط اقول لهم لا ويطلع عزكم الله بروتين فالبول ما كنت اعرف شو السالفه ولا مافهمت شو البروتين ولا شو يسوي انا اتحرى التهاب لما ارد البيت اتم اشرب الماي على وعسى يروح خخخ

المهم وبعد في الشهر الثامن قالوا لي بتفصيل الممل حد في عائلتكم قصير مافهمت عليها قلت لا ماشالله كلهم اطوال لما يلست افكر قلت لها تقصدين قزم يعني قصير قصير تقول هي انصدمت وبعدين قالت لالا طالع راس البيبي كبير قلت لها عادي ابوه راسه كبير اسوي عمري فاهمه عسب ما اخاف ….وحولوني على مستشفى توام سويت طاف فالمرة الاولى بس فالمره الثانية جبروني وخرعوني وسرت توام وسولي الاشعة مالتهم وقالوا نفس الرمسة الراس كبير وهذا وراثة يمكن وكل شي طبيعي والحمدلله ما كنت افكر في هاشي بس كنت افكر اني ابا اربي بعد رمضان في العيد عسب اصوم رمضان كامل وطبعا جدموا لي موعد الولا دة لين10 -9
المفروض 23 – 9 وتموا يجدمونو وياخرون وبعدين اسالهم متى بربي قالوا العلم عند الله …الحمدلله حطيت فبالي اني بربي على العيد تاريخ 5 – 9 الصبح نشيت وعزكم الله سرت الحمام ورجعت برقد الا اسمع صوت بق قلت خلني اسير الحمام كرمك الله لما سرت تحريت عمري سويتها لما حطيت الكلينكس اتارري الماي تبطل جان اعلى صوتي ووعي ريلي واتصل في امي واسير المستشفى شوية ماي نزل مع دم والرحم متبطل 3 قاسوا الضغط خذو مني تحليل الله يعزكم بول شافوا البروتين واصل 3 والضغط مرتفع يتني الدكتورة ورمستني عن حالتي وهي تسمم الحمل ولازم طلق صناعي عسب اربي بنفس اليوم لان اذا تم جي الضغط بياثر فيني وفالبيبي وخطر يسوي صرع .

وتوكلت على الله وقعت لطلق الصناعي كانت اتيني طلقات بس باردة وانا ماعرف الباردة من الحارة حطوا الطلق الصناعي ومغذي في يد والثانية دوا عسب ينزل الضغط وبدت الاوجاع وامي تكلمني وتهديني وتقولي قولي يالله يارب واتم اقرى سورة زلزلات وزاد الالم وزاد قلت لسستر ماستحمل خلاص وانادي امي خربطتها في صلاتها كل ما تيني طلقة انادي امي لين الحمدلله ربيت وامي طبعا فنص الولادة تصيح طلعوها ورى الستارة مارامت تستحمل والحمدلله نسيت كل شي الحين والحمدلله اضغط بدى يرد طبيعي هي نسيت كل شي من اشوف ويه ولدي سبحان الله مابي افكر في مرحلة الحمل ولا الولادة احاول انسى واهتم بولدي محمد نسيت ماخبرتكم عن راس البيبي طلع كتكوت صغير فديته واي احد يشوفه يقول هذا اللي راسه عود صدق مينن ولا حولوج توام ليش حتى بعد الولادة امي تحط عليهم تقولون كبير وتخرعون البنت الممرضة انصدمت تقول من قال لكم خخخخخ

ملاحظات :-

1- المستشفى اللي كنت اراجع فيه ما يلتزم بالمواعيد يعني موعدج 9 تدخلين 10
2-المستشفى اللي سويت في اشعة قالوا انت موعدج تغير من غير مايخبروني وقلتلهم انا من وين يايه وراي درب ….. والدكتورة الاولى تمت تحفر بطني بالجهاز واخر شي هيه مب فاهمه شي كانها تجرب علي
3- المستشفى اللي اراجع فيه الممرضة ولا اللي تسوي السونار قالت لي راس البيبي طبيعي ومافيه شي ودكتورة تتفلسف وتغير فالصورة خلتني مرتين اعيد السونار وضاربوا خخخخخ مع بعض

4- الصراحة الممرضة اللي كانت مع الدكتورة وقت الولادة كانت ملاك اسلوب راقي في المعاملة وادب واحترام حبيتها والله ساعدتني وايد وتهديني وايد الله يوفقها ويرزقها الخير فالدنيا والاخرة يارب