[. . . البحث عن الفستان المثالي ،،،

شعورج بالنظافة والانتعاش مهم جدا ، يساعدج في عملية الاختيار وعند تجربة الفستان ، بحيث يعطيج الصورة الأفضل لكيفية احساس وملمس الفستان عليج أثناء المناسبة،،

في بنات للأسف تروح تجرب فساتين وهي من الصبح مب متسبحة أو بنفس الوضعية اللي كانت فيها طول اليوم ، وهالشي غلط لأنج مب متحضرة للفستان ، بمعنى يوم بتلبسين الفستان للعرس أو الملجة أو أي مناسبة كانت ، أكيد بتكونين متعطره ومدخنة وحاطه لوشون وكل مستلزمات النظافة ، هالاحساس لازم يكون معاج أثناء اختيارج للفستان ، لأنه بيساعدج تحكمين على الفستان اذا مناسب أو لأ بشكل أفضل ،،،

|2| مكياج :

حطي مكياج خفيف أقل شي كحل و قلوس بلون أو بدون ، بس شي يضيف رونق لبشرتج ، لا تسيرين تجربين الفستان وويهج مزيت أو بنفس الميك آب من الدوام سيدة للفستان ، هالشي غلط ، بشرتج بتكون تعبانة وشكلج بيكون باهت ، بالتالي صعب تحكمين اذا لون الفستان مناسب لج أو لأ ،،

وهالنقطة مهمه لأن حتى الفستان الأبيض له تدرجاته اللونية اللي تتناسب مع بشرات بدرجات لونيه معينة ، فمهم تكون بشرتج صافية (فاونديشن خفيف + كحل + قلوس أو Lip color + بلاشر ) بيكون كافي حتى يعطيج فكرة عن اتجاهج مع الفستان أو يمكن الألوان اللي ممكن تحطينها لمكياجج ،،،

|3| شعرج نظيف :

نعم لازم يكون شعرج مغسول ونظيف مب مزيت ومدهن من أسبوع ..! وأهم شي يكون مستشوار ، لا تقولون ماقدر وحق شوه ، هذا فستان ليلة العمر أو فستان ملجة أو مناسبة خاصة شي يعنيلج الكثير أكيد تبين اختيارج يكون صح ،، السشوار مب بالضروروة كامل للشعر ، يفضل أن يكون على الأقل القصة وتجفيف جيد للشعر كامل ،،
لا تروحين وشعرج مبلل ولا تروحين وهو باهت ومزيت ،،،

ليش طبعا ؟ بقولكم ليش ، لما بتجربين الفستان وعلى حسب قصة الفستان ،، يسهل عليج الشعر النظيف اللامع والمستشور أن تلعبين فيه أثناء ما تجربين الفستان ، بيعطيج فكرة عن أفضل طريقة لتصفيف شعرج للمناسبة ، راح تقدرين ترفعينه فوق بإيدج أو تنزلينه بأي طريقة كانت ،، خصوصا اذا كنتي حاطه في بالج تسريحة معينة أو حركة خاصة للشعر ، راح تقدرين تتخيلين الشكل النهائي بصورة أفضل وبالتالي يسهل عليج معرفة ما اذا كان الفستان ملائم للصورة اللي تطمحين لها،،،

|4| ألبسي ملابس مريحة وسهلة :

لا تروحون تجربون فساتينكم في بيجامات النوم ، أو ثياب فيها قطع وايدة وصعب تخلعينها ، ولا تلبسين جييز راص أو تروحين بنفس ملابسج من الدوام ، الكلية إلخ ،،،

خليج بثياب جديدة متعطرة ومدخنة ،، جسمج مرتاح مب مشدود وأهم شي ثياب بقطعة وحدة ،أسهل لج أثناء تبديل الملابس وتجربة الفستان ،، نصيحتي البسي جلابية بس ايدها مب تكون معقمة وفيها أكثر من فص ، خليها سيمبل ، أو Leggings اذا ما كنتي من النوع اللي تلبس جلابيات،،،

|5| ملابس داخلية ممتازة :

نعم نعم وألف نعم ،، اللي تروح ومب لابسه ملابس داخلية أو لابسة شي جديم أو الـ Bra مب جيدة الفستان مليون بالمية بيطلع بايخ عليج لما تجربينه وما بيعطيج حقج في الفستان ، بتضطرين ترجعين مره ثانية ، خصوصا اذا احتاج الفستان إلى إعادة خياطة القياس ،، منطقة الصدر مهمة وفي الغالب الفستان مشغول في هالمنطقة، فمهم جدا َ أنج تلبسين الملابس الداخلية اللي تناسب حجمج ، أو الـ PUSH UP bra اذا كنتي ناويه تلبسينها للمناسبة ،،،

|6| الكعب العالي :

طبعا مب فلات ، ولا زنوبة ،، ومب شرط اللون ، المهم شي بالطول اللي أنتي ناوية تلبسينه ،، صح في محلات توفرلج كعب بس كعبهم ما راح يكون بنفس قياسج في الغالب ،، لذلك يفضل اتيبينه معاج الكعب اللي بتلبسينه عسب ما تتوهقين عقب في القياسات اللي تخص الطول Dress Length ،،،
اللي تتعب من الكعب ، شيليه معاج في كيسه وخليج بالفلات ،،،

|7| مشد للجسم :

اذا بتلبسين مشد للجسم سواء لمنطقة البطن أو البطن مع الأرداف ،، البسيه لما تجربين الفستان ،، مب تقولين بلبسة وقت المناسبة والعرس لأ شلي هالفكرة من راسج ،، البسيه حتى القياسات تصير صح ، وتجوفين شكلج بالفستان صح ،،،
المشد يعطي جسمج رسم مختلف تماما عن لما ما تكونين لابسته ،، فخليج منتبهه لهالنقطة ،،،

الوقت المناسب للفستان المناسب :.

وهالنقطة ضرورية جدا جدا جدا ..! حطي في بالج تروحين في أوقات نفسيتج تكون مرتاحة ، مب طالعه من الكلية أو الدوام وركض على السوق ،، لا روحي أيام تكونين مأجزة فيها ناشة الصبح على راحتج ، مب مستعيله ،، هني بتختارين الفستان وأنتي في راحة تامة ،، وما راح تحسين عقب فترة اذا جربتي الفستان وهو عندج أنج ندمانة أو مب مناسبنج ، لأن الظروف اللي اخترتي فيها الفستان كانت مناسبة كليا ^_^
.
.
وبالتوفيج لـ كل العرايس يارب ،،،
أدعولي أحصل فستان عرسي المثالي ^_^

ملاحظة : الموضوع أنا كتبته وما أحلل لأي حد ينقله لأي موقع ثاني بدون ذكر المصدر واسم [..دانــة..] ،،،