مبروك لنا عرايس عيد الفطر
اتمنى نتجمع الحينه ونتناقش في ترتيباتنا ومشترياتنا كل وحدة تدخل تجاوب عشان كلنا نستفيد
تاريخ عرسج متى ……..
فستانج جاهز او تفصيل و من وين وبكم …………
مكياجج وتسريحتج عند منو وبكم
كوشتج من وين وبكم
طقم الاساسي لي بتلبسينه في العرس و بكم
زفتج وزفة ريلج من وين وبكم
واهم شي الشوز لي بتمشين فيه من وين وبكم 
مسكتج من وين وبكم
قميص نوم اول ليلة من وين وبكم
كل هالاشياء اشوفها اهم من الزهاب لان نحن متعودين نتشرى ودوم نتشرى بس الاشياء لي فوق اول مرة نسويها ولازم نركز عليها
انا تقريبا خلصت الاسبوع اللي طاف اغلب الاشياء واتري ردودكم وتفاعلكم وبجاوبكم بالتفصيل
والحين بنام عشان MY SLEEPING BEAUTY
معقوله محد رد وينكم يا عرايس العيد لازم نتفاعل ماباجي شي على اعراسنا ورمضان مابنروم نسوي شي اختي قبل " سنين عرسها كان عقب رمضان وتلعوزت لانها اخرت تشياء وايد نبى تفاعل يا عرايس العيد
اختي نصيحة , حاولي تجهزين زهبتك وتحجزين لكل شي يخص العرس قبل رمضان , وتفرغي في رمضان للعبادة والدعاء ان يبارك لك الله في زواجك ويرزقك الذرية الصالحة
الله يتمم لج على خير حبيبتي ويسعدج وألف مبروك 
وانا عرسي بعد العيد ان شاء الله في فندق كورال بيتش في عيمان
بعدني ما خلصت الحجوزات محتارة بصراحة وفستان عرسي خلصته من زمان الله يتمم لنا كلنا على خير ان شاء الله
ربي يتمم لكم على خير يارب
انا عرسي تأجل لبعد العيد والحمدلله مخلصه كل شي تقريباً
عرسي 26/8
فستاني خذته من دار ساره أجار 16000
مكياجي عند ليالي 6500
الحنا خبيره السودانيه
الكوشه وكل تجهيزات العرس ع المعرس
الطقم الرئيسي كان من ضمن الزهاب لانه عليهم الذهب
الزفه بعدني محتاره ماسويت شي
الشوز مع الفستان
قميص النوم الرئيسي اتوقع 1250
المسكه بعدني ماشفت المحلات
والله يتمم علينا بخير يارب