مشكلتي غريبة وانا اعترف انها غريبة يمكن وايد بيستغربون من عرضي للمشكلة ويمكن البعض يعتبره شي تافه
لكن انا قررت اعرض لكم مشكلتي يوم شفت تعاونكن في المنتدى ونصايحكن الصريحة لبعض
مشكلتي من ست سنوات تقريبا يوم كنت في المدرسة
اتعرفت على صديقة وكانت علاقتنا من بعيد لبعيد بس من أول لحظة شفتها حبيت هالانسانة وااايد وارتحتلها ما دري كيف حسيتها وكانها اختي … أغليتها واااايد لدرجة ان ربيعاتي كانوا يحسبون اني احبها مثل الحب اللي يصير بين البنات وللأسف كان وايد منتشر في مدرستي…وهي بعد حسبت ان الموضوع جذي!!
عسب جي كنت اخاف اتقرب منها او احاول أبين لها وتفهم الموضوع غير اللي في قلبي وانا والله كنت بس اريدها تكون ربيعتي وحبيتها في الله ولله لكن محد فهمني
مرت الأيام وانا على هالحالة لين خلصنا المدرسة وافترقت عنها
وعلاقتي فيها عادي مب صداقة لهناك يعني ما كنت اقدر اجوفها او اكلمها حتى ومشكلتي من يوم ابتعدت عن هالانسانة حياتي اتغيرت حاولت وااايد اني اكسب صداقتها ونكون ربايع عادي لكن كل ما أحاول ما ألاقي تجاوب منها يعني هي مب عارفة شي واحيانا تستغرب من تصرفاتي…واللحين مرت تقريبا ست سنوات لا شفتها ولا شافتني وخلال هالسنوات مكالماتنا معدودة يعني أحيان مر سنتين ومانرمس بعض
يمكن هالشي طبيعي لكن المشكلة عندي مب عارفة حتى اعيش حياتي صح ..ما أقدر أطلع هالانسانة من قلبي كييييف؟؟
مع اني نسيت حتى شكلها كيف
أحبها وااايد والله يشهد اني ما حب سوالف البنات الاعجاب وهالخرابيط انا انسانة ملتزمة وعااقلة وهي بعد واحبها لأنها وااايد ملتزمة وتخاف ربها لكن لا قادرة انسى الموضوع واكمل حياتي عادي ولا قادرة أوصل لها..حسيت خلاص هالموضوع وصل لحد انه بيضيع لي مستقبلي انا مب عارفة اركز حتى في دراستي .. وحتى لدرجة اني علاقتي وي البنات مختربة كل ما اتعرفت على وحدة اقارنها فيها احس عمري أحيانا اكره كل الناس بسبة هالموضوع يمكن البعض يقولي ان تعلقي فيها غلط لكن والله والله اني أحبها في الله .. أدعيلها في كل صلاة وفي كل لحظة .. لو حد قالي عنها مريضة او بها شي او مضايقة والله اقعد اصيح وادعيلها ..انا مب عارفة شو الحل لهالموضوع أحس خلاص حياتي كلها اختربت وحالتي النفسية ادهورت
شو الحل لهالموضوع دخيلكن ساعدووووووووني شو الحل؟؟؟
غناتي استهدي بالرحمن الدنيا ما بطير بظيعين مستقبلج عسب وحده مب داريه عنج وعايشه حياتها فكري بعقلج ماما دامها هي مب مهتمه لا تهتمي بتلاقين احسن ومنها واللي تقدرج بعد وبتشوفين
بس لا ظيعي عمرج عشانها مايصير ماما والله مايصير
شكرا لج بركان الغلا تصدقين عيني دمعت يوم قريت كلامج
والله انا ادري اني ممكن احصل والدنيا فيها ناس ونا واثقة من عمري لكن والله حاولت وما قدرت
أعزها لدرجة ما في انسان يتخيلها والله ما يعلم بالضيقة اللي فيني غير الله والله يفرجها ودعيلي دخيييييييييلج
داعيتلج ياقلبي ولحينه ياذن داعيتلج بس والله ما يصير مانصير نهدم حياتنا عسب شخص عايش حياته ومب داري عنا
غناتي فكري في مستقبلج عاده الحياه قدامج بتقابلين اشيا اخس عن جي لازم تتحملين مايصير هي عايشه حياتها وانتي مظيعه حياتج فكري بعقلج ماما لاتفكري بعواطفج ماتفيد العواطف هالايام والله ماتفيد فكري بعقلج باعتج بيعيها الدنيا قدامج عيشي يومج وخلج منها
سالفتج شرات سالفتي ويا بنيه كنت اتمني صداقتها بس ،،، سالفه طويله مابملل بج بس انحلت وكان الحل اني اصارحها بس بعد فتره تقريبا سنتين ونص قلت لها كان ودي اكون صديقتج وعلاقتنا تكون قويه بس الله ماكتب وهالرمسه ذوبت هالحواجز كلها وسبحان الله كان ها الي فخاطرها بعد بس يوم شافتني ابتعدت مارامت تقولي ،،،جربي تقولين لها يمكن ع الاقل ترتاحين دام عندج رقمها قولي لها بكل عفويه وصراحه : )
والسموحه
اختج قلبووووون ^_^
اختي بركان الغلا والله كلامج يخليني افكر لكن كل ما قلت بنساها و خلاص وابتعد يصير شي ويخليني ارجع.. فيه تفاصيل ما قدر اكتبها بعد
بس ما عليه والله اسلوبج يريح ويخليني اعيد تفكيري شكرا لج من كل قلبي
قلبون هذا الشي اللي دايما يرجع الأمل لقلبي اني أحيان أحسها تعزني
انا ما ريد تفهمني غلط واتمنى ابينلها احساسي لكن الافكار والضياع اللي في داخلي يمنعني وما ألاقي الفرصة المناسبة أصلا تواصلي وياااها قليل واحيان أخاف اني لو قلت لها عن اللي في قلبي وما اهتمت شو بيكون موقفي…!!