قروب الرشاقة الصحية يلا نرجع 10 سنين ورا^^

صباحمسا الرشاقة والصحة والثقة بالنفس على كل رواد موضوعي

وضحة: ضحى انتي حلوة وجميلة ووالله لو تضعفين شوي بتكونين ملكة على الكل

ضحى : اي والله الكل يقولي هالكلام وانا افكر فعلا اضعف لكني احاتي الباجيات لو انا ضعفت بغطي عليهن كلهن ..محد بياخذهن حرام خلني متينة احسن ههههه"

بهالكلام او بمثله نسكت اللي حولنا و نرقد الضمير النايم اولريدي و نستمر بالبلع بعذر انا ما قادرين نقاوم الاكل و السناكس و الكافي و الدهون …لكن لين متى ؟؟ متى بنفكر بحياتنا بجدية اكثر ؟!! يوم بتنقضي احلام ايام العمر ؟ بعدما تمر مراحل الكشخة واللبس والاناقة ونحن نلبس xxxxxxxl

مب عيشة هذي و لا شرايكن؟!!!!!!!!

اكتفينا شحوم وترهلات واوزان زايدة وحان الوقت اناّ نفكر بصحتنا بجدية اكثر

يلا نبدا حياة جديدة باجسام جديدة ..صحة احسن و لبس احسن واناقة اكثر وثقة بالنفس اكثر واكثر

صفحتي هذي للي يبوا يبدو صح ..للمنضمات للنوادي الصحية او يسوون رياضة بالبيت و يسوون دايت صحي ..

لا للمجاعات .. لا لفقر الدم .. لا للاكل جدام التلفزيون والخمول والكسل

نعم للصحة و الحياة الوردية ..

بكتب يومياتي يوم بيوم ريوق وعشا وغدا وسناكس بين الوجبات ان الله راد واتمنى من الجميع المشاركة

موفقة ونحن وافقين وياج وبنساعدج

وصديقيني احلى شي انج بتبين اصغر من سنج وايد

مثلما قلت لكم بكتب لكم يومياتي .. شو بلعت شو سرطت وشو كلت

^^

امس لاني بعد "الايروبكس " كنت حدي يوعانة لاني مب ماكلة شي قبلا اسير >وهذا غلط طبعا

المهم ورحت ويا اخوية دبي بالليل >من الفجيرة لدبي دقة راس

و هو ما عنده بالسيارة الا جوكلت فكلت منه وعقب تعشيت برجر مشوي >اوني محافظة على الدايت وكلت صوابعي من الندم عقب

فاليوم بما اني خفاش احب السهر نشيت متاخر و خذت لي عصير برتقال فرش و فروت سلد الاثنين بدون سكر مضاف الفروت بدون ايس كريم طبعا >راعي الكافتيريا يعشق الايس كريم ولازم يحطه مع اني مب طالبة فالودة

و العشا بسوي لي بطاط مسلوق باكله بدون خبز > يقولون يمتص الدهون.. و عقب السلق بقطعه دوائر واشويه لثواني و احط له بهارات بس ما بكثر .. و بشرب لتر ماي على الاقل ان شاء الله

والرياضة بما اني ما سرت اليوم بسوي بالبيت رياضة وبمشي لساعة ان شاء الله >ويهي مورد من يوم بديت الرياضة ترى الدورة الدموية تتنشط و خف عني حب الشباب والله لاني بطلت دهون