تمنيت الارض تنشق وتبلعني

طبعا انا هاذي لي اول مشاركة ف هذا القسم … وحبيت انزل مشكلتي وابي منكم المساعدة …

انا وايد تعبااااانة ونفسيتي هالاياام كل ما ايييها تتعب أكثر عن الايام القبلية ؟؟؟؟ وهالفترة خاصة احس مستواي نزل ف الدراسة قمت اكره الدراسة واكره شي اسمه كلية وشي اسمه امتحانات تنسد نفسيتي عن المذاكرة وخاصة لما صارلي هالموقف معني خريجة ع الفصل الياي ان شاء الله … انا بنت وحيدة بين خواني عندي اخوان 2 توأم صف رابع الله يخليهم لنا … من 5 شهور توفى ابوي ف حادث سيارة مع اخوي الكبير … الله يرحمهم ويغمد روحهم الجنة …. وانا من دشيت هالكلية من 3 سنين واحين انا سنة رابعه ما عرف حد من البنات ما تعرفت ع حد والحمدالله كنت مرتاحة وكنت من المتفوقات ف الكلية من طالبات الامتياز كنت من البيت الى الكلية ومن الكلية الى البيت …. ف يوم من الايام من شهر تقريبا يت بنت خالي عندي ف الكلية تتدرس معاي وتعرفت ع بنت وهاي البنت تبي تشوفني وتمت تحن ع بنت خالي وتقولها خاطري اشوف بنت عمتج قالتلها اوكي بس اتصلها واشوفها اذا فاضية بخليها اتي بنت خالي اتصلتي وقالتلي فيه بنت تبي تشوفج قلتها موب مشكلة انا احين ياية صوبكن … ورحت صوبهن وسلمت عليهن وتعرفت علي ربيعتها … وانا الصراحة بس كنت سوالف عادية اسولف معها عن الدراسة بس ولا مرة لا انا ولا بنت قلنا لها انه ابوي متوفي ولا مرة كلمناها عن خصوصياتنا … يعني سوالف عادية وسطحية … ومن اسبوعين عرفت انه ابووي متوفي بمعني اني انا يتيمة … توقعوا شو كانت ردة فعل هالبنت ؟؟؟ يت البنت عندي وقالتلي مستواج موب من مستواي وانا بنت عز وانتي بنت يتيمة وانا ما ارابع مثل الاشكااال …. هاذي اللحظة تمنيت انه الارض تنشق وتبلعني ولا اسمع هالرمسة من عندها …
ابي اعرف ليش الايتااام شو فيهم ؟؟؟ ليش الناس يوم يعرفون انه نحن ايتام يتغيرووون علينا ؟؟؟ ليش نحن شو ناقصين عنهم ..؟؟ وهالفترة كله اتم اصيييييح ومضاايجة حيييييل ونفسيتي زفت ف زفت ولا اعرف شو اسوي ويا هالبنت ؟؟؟ انا كتمت كل ها ف قلبي ولا قلت لحد حتى بنت خالي ما تعرف ع الموقف اللي صارلي …. ومن يومين تعرفت ع بنت هالبنت بنت ناس اجاويد بنت طيوووبة وهي لما شافتني وايد ارتاحتلي وانا ارتحت لها يوم الخميس يت عندي وتمت تخبرني عن اسرارها وانا انتهزت الفرصة وخبرتها عن الموقف وهي اضايجت وايد من البنت وخاطرها تصفعها لو تشوفها … وحضنتي هالبنت وتمت تهديني وانا اشكيلها الحال واصيييح …. وطلعت تتدرس معاي نفس التخصص ( قانون ) … واحس هالفترة انه اخواني فاقديني .. يبون يقعدون ويااي وانا كله ف غرفتي اصييييح ولا اشوووفهم الا وقت الغدا والعشا بس ….

واحين يتني حالة نفسية من الموقف كل ما اذكره اتم اصييييح ؟؟؟؟

شنوا الحل احيين وياااها ؟؟ شو اسويبها ؟؟

ادعولي الله يوفقني ويفرج همي ؟؟؟؟؟

السموحة بس أختي…..ما عليج منها….
كوني واثقة من نفسج….والحمد لله أبوج خذته المنية من فترة قصيرة، يعني أنت حسيت بحنان أبوج واهتمامه ومسؤوليته فيجن وحبه لج، خذت منه أكيد أخلاق طيبة…واكتسبت أشياء روعة….

وين أنت من رسول البشرية-صلوات ربي وسلامه عليه-الذي منذ ولد وهو يتيم، ورغم ذلك قاد البشرية أجمع، وتحمل من الكافرين ما تحمل…..

لو انا منج برد عليها وبقولها .. لو ابووج توفى كيف بتكون مستواج؟؟؟؟

ان شاء الله….ربي بيسخر لج بنت حلال طيبه اتصادقج…..ولاتضاقين عمرج وتمي قريبه من اخوانج .