بغيت مساعدتكن بأفكار ولكن الأجر من رب العالمين

وأهم شي واللي أجره وثوابه كبير عند رب العالمين … من ضمن عملي أني أطمئن ع المرضى يوميا وأمر عليهم وأحل مشاكلهم اذا كانت عندهم مشاكل … أبي أشياء تونسهم … تخفف عنهم يعني شو ممكن أسوي … أنا فكرت أني أحطلهم كتيبات وأدعيه في الغرف بس خاطري يكون بتنسيق حلووو … اللي عنده أفكار لا تبخل عليه يزاكن الله خير ..

وفي شي بعد واااااااااايد مهم … اليوم رحت قسم غسيل الكلى وقعدت مع المرضى هناك … اللي متفائل ومرتاح ومتقبل وضعه … واللي رافض وضعه ونفسيته وايد تعبانه .. واللي مب قادر يتأقلم مع جهاز غسيل الكلى واللي يفكر بموضوع الزراعه … أنا يلست وياهم ورمستهم وان شاء الله يوميا بروح بيلس عندهم قدر المستطاع أبا أحسسهم بالاهتمام … بغيت أفكار شو ممكن اسويلهم يعني أنا اليوم خذيت لهم مجلات للي يعرف يقرا … شو بعد ممكن أسوي … دخيلكن بنات عطني أفكار … وعندي الحين حاله منهم توه من قريب بدا الغسيل وحالته جدا تعبانه لدرجة أنه مب ملتزم بالعلاج أبد … أنا أول مره أرمسه اليوم ومع أنه كان يرمس عادي بس حسيت أنه مب متقبل حالته … ويوم سألت الممرضات قالوا نفس الشي … أبا أساعده عشان يتخطى هالأزمه وأبا أقنعه بأهمية العلاج شو تنصحوني أسوي … اهو ما شاء الله مثقف ويوم قلتله أييبلك كتب قالي اذا انتي تبين بييبلج … شو أسوي معاه برايكن …

في انتظار ردودكن خواتي

بالنسبه لمرضى الكلى تقدرين تحطيلهم بوسترات بشكل مرتب بحيث ما تخرب من شكل المكان

و مكتوب عليهن ايات مثلا الاايه من سورة البقره: و بشر الصابرين الذين اذا اصابتهم مصيبة قالوا إنا لله و انا اليه راجعون

و ذكريهم ان المرض يرفعهم درجات في الجنه ما كانو بيوصلونها بعملهم بروحه..هالشي ان دل على شي يدل على حب الله لهم و رغبته في رفعهم درجات و تكفير ذنوبهم

شوفي هذا البحث و ان شاء الله تلقين معلومات تفيدج عشان تثقفين نفسج اكثر بالنسبه لفضائل المرض للمسلم و يوم ترمسينهم يكون كلامج مقنع و يتقبلونه بصدر رحب

اولا زيارتج لهم ومداخلاتج معاهم لها اثر طيب في انفسهم…

وهي جزء من علاج حالتهم النفسيه ..