السلام عليكم
حبيت انقلكم تجربتي في برج شاطئ الواحه قلنا بنحجز يوم عسب اليهال شوي يستانسون
الموقع :في المرسى بين الهيلتون والشيراتون هو اي في النص ومجابلنه جميرا بيتش وقريب من الممشى وعداله الكافيهات والمطاعم ومحلات التسوق ومجابل البحر
الغرف مافيها نت بس اللي حاب يستخدم النت فيه مكان خاص في الفندق
طبعا فيه مسبح وفيه صالونات للنساء والرجال وفيه سوبرماركت وكم محل تسوق
حجزنا شقه مكونه من 3 غرف و5 حمامات ومطبخ وصاله مع بلكونه مطله ع البحر وفيه غرفه اصغيره للحقايب والاغراض وغرفه اصغيرونه ثانيه مدري حق شو اظن للبشكاره يعني المجموع 5 غرف المطبخ مجهز من كل شي ثلاجه وفرن كهربائي وغساله ملابس وغساله صحون ونشافه ملابس والميكرويف وصانعه القهوه وغير عن الادوات الثانيه من ملاعق وصحون الخ وغير الميني بار وكل شي فيه فري
يعني الفندق ينفع للعايلات الكبيره شوي ولليهال وحق اللي مطولين بالاقامه
سوري ماصورت لاني كنت ناسيه الكيمرا وصور الفون مو لهناك فيبت لكم الصور من الموقع
الصاله
غرف النوم
المطبخ
الحمام تكرمون
اتمنى انه يعيبكم
بالنسبه للسعر هو يختلف طبعا
بس نحن حجزنا ب1800
تسلمين الغالية ع التقرير البسيط والممتع
ماعيبني وايد لانه فيه شاطئ و مسبح لاعت جبدي من الاجانب ..
صح كلامج الاجانب وااايد فهالبقعه وعاد تعالي جوفي اللبس الله لايراويج ماخذين راحتهم ع الاخر
بس شونسوي الجود من الموجود
مشكورة خيتو ماقصرتي اهم شي استانستي ..
بس ماذكرتي شي عن الخدمة و عن رتبة الفندق هل هو فايف ستار؟؟ … و مشكوررة فديتج
اختي الهوجاس
صدقتي والله انا صرت انقرف من الاجانب بالفتره الاخيره الله يعين اهل دبي عليهم …
شكله حلو ^^
بس شو تقييمج له؟
وعن الاجانب انا صراحه وحده اسوي لكم اكبر طاف وجودهم والعدم واحد..اسوي عمري مااشوفهم واستمتع بالمكان ليش اغصص على عمري وانا رايحه استانس^^